ഡിസംബര്‍ 31, 2022 മുതല്‍ ചില പഴയ ഐഫോണുകള്‍ക്കും ആന്‍ഡ്രോയിഡ് ഫോണുകള്‍ക്കുമുള്ള സപ്പോര്‍ട്ട് തങ്ങള്‍ അവസാനിപ്പിക്കുകയാണെന്ന് വാട്സാപ് അറിയിച്ചു. ഐഫോണ്‍ 5, 5സി മോഡലുകള്‍ക്കാണ് സപ്പോര്‍ട്ട് നിലയ്ക്കുക. ഏകദേശം അമ്പതോളം ഫോണുകളിലാണ് വാട്സാപ് പ്രവര്‍ത്തനം നിര്‍ത്തുക. നിങ്ങളുടെ ഫോണിന് സപ്പോര്‍ട്ട് നിലയ്ക്കുന്നുണ്ടെങ്കില്‍ വാട്സാപ് തുടര്‍ന്നും ഉപയോഗിക്കാന്‍ താല്‍പര്യമുണ്ടെങ്കില്‍ പുതിയ ഫോണിലേക്ക് മാറണമെന്നാണ് വാട്സാപ് അറിയിച്ചിരിക്കുന്നത്. ഐഒഎസ് 12ല്‍ പ്രവര്‍ത്തിക്കുന്ന ഐഫോണുകള്‍ക്കാണ് സപ്പോര്‍ട്ട് പോകുന്നതെങ്കില്‍ ആന്‍ഡ്രോയിഡ് ജെല്ലി ബീന്‍ 4.1ല്‍ പ്രവര്‍ത്തിക്കുന്ന ഫോണുകളിലും ഇനി വാട്സാപ് പ്രവര്‍ത്തിക്കില്ല. സാംസങ് ഗ്യാലക്സി എസ്2, എസ്3 മിനി എന്നിവ അതില്‍ പെടും. അസന്‍ഡ്ഡി അടക്കം 7 വാവെയ് മോഡലുകള്‍, ഓപ്ടിമസ് നൈട്രോ എച്ഡി അടക്കം 19 എല്‍ജി മോഡലുകള്‍, ഗ്യാലക്സി ട്രെന്‍ഡ് ലൈറ്റ് അടക്കം 7 സാംസങ് മോഡലുകള്‍, എക്സ്പീരിയ നിയോ എല്‍ അടക്കം മൂന്ന് സോണി മോഡലുകള്‍ തുടങ്ങിയവയുടെ സപ്പോര്‍ട്ട് അവസാനിക്കും. അതേസമയം, വളരെ പഴയ ആന്‍ഡ്രോയിഡ് ഫോണുകള്‍ക്കേ പ്രശ്നമുള്ളു. ജെല്ലി ബീന്‍ അവതരിപ്പിക്കുന്നത് ജൂലൈ 2012ല്‍ ആണ്.