സംസ്ഥാനത്ത് വീണ്ടും തീവ്രമഴയ്ക്കുള്ള സാധ്യത കാലാവസ്ഥ കേന്ദ്രം പ്രവചിക്കുന്നു.നാളെ ഏഴ് ജില്ലകളിൽ ഓറഞ്ച് അലർട്ട് പ്രഖ്യാപിച്ചിട്ടുണ്ട്. നാളെ തിരുവനന്തപുരം മുതൽ ഇടുക്കി വരെ ജില്ലകളിൽ തീവ്രമഴയുണ്ടാകും. ചൊവ്വാഴ്ച തിരുവനന്തപുരം മുതൽ തൃശ്ശൂർ വരെയുള്ള 8 ജില്ലകളിൽ തീവ്ര മഴ മുന്നറിയിപ്പ്. ബുധൻ, വ്യാഴം ദിവസങ്ങളിൽ 10 ജില്ലകളിലാണ് ഓറഞ്ച് അലര്‍ട്ട്.
തൃശൂരിൽ മങ്കിപോക്സ് ലക്ഷണങ്ങളോടെ യുവാവ് മരിച്ച സംഭവം ഉന്നതല സംഘം അന്വേഷിക്കുമെന്ന് ആരോഗ്യമന്ത്രി വീണ ജോര്‍ജ്. അന്വേഷണത്തിനായി ഉന്നതല സംഘത്തെ നിയമിക്കുമെന്ന് മന്ത്രി പറഞ്ഞു. യുവാവ് വിദേശത്ത് നടത്തിയ പരിശോധനാ റിപ്പോർട്ട് ഇന്നലെയാണ് ബന്ധുക്കൾ തൃശൂരിലെ ആശുപത്രി അധികൃതർക്ക് നൽകിയതെന്നും മന്ത്രി അറിയിച്ചു. പകർച്ച വ്യാധി ആണങ്കിലും മങ്കി പോക്സിന് വലിയ വ്യാപനശേഷി ഇല്ലെന്നും പ്രതിരോധ മാർഗങ്ങൾ സ്വീകരിക്കുക എന്നത് പ്രധാനപ്പെട്ട കാര്യമാണെന്നും വീണ ജോര്‍ജ് പറഞ്ഞു.
അട്ടപ്പാടിയിൽ ആൾക്കൂട്ട മർദ്ദനത്തിനിരയായ മധുവിന്റെ കുടുംബത്തെ ഭീഷണിപ്പെടുത്തിയ സംഭവത്തിൽ മുക്കാലി സ്വദേശി അബ്ബാസിനെതിരെ കേസെടുത്തു.കോടതി നിർദ്ദേശത്തെ തുടർന്ന് ജാമ്യമില്ലാ വകുപ്പ് പ്രകാരമാണ് അഗളി പൊലീസ് കേസ് രജിസ്റ്റർ ചെയ്തത്. കേസിൽ നിന്ന് പിന്മാറാൻ നാട്ടുകാരനായ അബ്ബാസ് തങ്ങളെയും മറ്റു സാക്ഷികളെയും ഭീഷണിപ്പെടുത്തുന്നുവെന്ന് മധുവിന്റെ ‘അമ്മ പരാതിപ്പെട്ടിരുന്നു. നിരവധി സാക്ഷികൾ പ്രതികളുടെ ഭീഷണിമൂലമാണ് കൂറുമാറിയതെന്ന് മധുവിന്റെ അമ്മ മല്ലിയും സഹോദരിയും പറയുന്നു.
ബിഷപ്പ് ധര്‍മ്മരാജ് റസാലത്തെ പുറത്താക്കണമെന്ന് ആവശ്യപ്പെട്ട് നന്ദാവനത്ത് ഒരു വിഭാഗം വിശ്വാസികള്‍ നടത്തിയ മാര്‍ച്ചില്‍ സംഘര്‍ഷം. പ്രതിഷേധക്കാരും പൊലീസും തമ്മില്‍ ഏറ്റുമുട്ടി. കാരക്കോണം മെഡിക്കൽ കോളജ് കോഴ ഇടപാടുമായി ബന്ധപ്പെട്ട കേസിൽ ബിഷപ്പിനെ ഇ ഡി ഇന്നലെ കൊച്ചിയിൽ ചോദ്യം ചെയ്തിരുന്നു.
കെഎസ്ആര്‍ടിസി ട്രേഡ് യൂണിയനുമായുള്ള ചർച്ച പ്രഹസനമെന്ന് സിഐടിയു പ്രതികരിച്ചു. നാളെ ആരംഭിക്കുന്ന സിറ്റി സർക്കുലർ ഇലക്ട്രിക്ക് ബസ്സുകൾ തടയുമെന്ന് സിഐടിയു പ്രതികരിച്ചു. ബിഎംഎസ് നാളെ സ്വിഫ്റ്റ് സര്‍വീസ് ബഹിഷ്കരിക്കും. ശമ്പളം കൊടുക്കാന്‍ കഴിയാതെ പരിഷ്കരണം കൊണ്ട് വരരുതെന്ന് യൂണിയനുകള്‍ പ്രതികരിച്ചു.
മുതിർന്ന ശിവസേന നേതാവ് സഞ്ജയ് റാവത്തിനെ എൻഫോഴ്‌സ്‌മെന്‍റ് ഡയറക്ടറേറ്റ് കസ്റ്റഡിയിലെടുത്തു. ഉടൻ ഇ ഡി ഓഫീസിലേക്ക് കൊണ്ടുപോകും. ഗൊരേഗാവിലെ ഭവന നിർമ്മാണ പദ്ധതിയുമായി ബന്ധപ്പെട്ട കേസിലാണ് നടപടി.റാവത്തിനോടും കുടുംബത്തോടും കാര്യങ്ങൾ നേരിട്ട് ചോദിച്ചറിഞ്ഞ ഇ ഡി വീട്ടിൽനിന്ന് ചില രേഖകളും പിടിച്ചെടുത്തു.റാവത്തിന്‍റെ വസതിക്ക് മുന്നിൽ ശിവസേന പ്രവർത്തകർ പ്രതിഷേധിച്ചു. തനിക്കെതിരെ നടക്കുന്നത് വ്യാജ ആരോപണങ്ങളും നടപടികളും എന്ന് സഞ്ജയ് റാവത്ത് പ്രതികരിച്ചു..