പുതുവര്‍ഷവും വര്‍ഷാവസാനവുമെല്ലാം കണക്കാക്കി മാരുതി സുസുക്കി ജിംനിയുടെ വിലയില്‍ വലിയ ഓഫറുകളാണ് പ്രഖ്യാപിച്ചിരിക്കുന്നത്. സീറ്റ മോഡലിന് ഏകദേശം 2 ലക്ഷം രൂപയും ആല്‍ഫയ്ക്ക് 1 ലക്ഷം രൂപയോളവുമാണ് വിലക്കുറവ്. പുതിയ ഇളവ് വന്നതോടെ ഥാറിനെക്കാള്‍ വിലക്കുറവുള്ള ഫോര്‍വീല്‍ ഡ്രൈവ് വാഹനമായി ജിംനി മാറുകയാണ്. സ്റ്റാന്‍ഡേഡ് വകഭേദമായ സീറ്റയ്ക്ക് 2 ലക്ഷം രൂപയാണ് കുറവായി മാരുതി പ്രഖ്യാപിച്ചിട്ടുള്ളത്. ഇതോടെ മാനുവല്‍ – ഓട്ടമാറ്റിക് വകഭേദങ്ങളുള്ള സീറ്റ മോഡലിന് ഡല്‍ഹിയിലെ ഓണ്‍റോഡ് വില 12.68 ലക്ഷം രൂപയായി കുറഞ്ഞിട്ടുണ്ട്. ഥാര്‍ 4ഃ4 പെട്രോള്‍ ഹാര്‍ഡ്‌ടോപ്പിന്റെ ഡല്‍ഹി ഓണ്‍റോഡ് വില 17.68 ലക്ഷം രൂപയാണെന്നിരിക്കെ 5 ലക്ഷം രൂപ വിലക്കുറവില്‍ ഒരു എക്സ്ട്രീം ഓഫ്റോഡര്‍ ലഭിക്കുമെന്നത് ആരാധകര്‍ക്ക് വലിയ പ്രതീക്ഷകളാണ് നല്‍കുന്നത്. ഥാറിനെക്കാള്‍ 5 ലക്ഷം രൂപയോളം കുറവ് എന്ന പ്രത്യേകത ജിംനിക്ക് അനന്തമായ കസ്റ്റമൈസേഷന്‍ സാധ്യതകള്‍ തുറന്നിടുന്നുണ്ട്. സസ്പെന്‍ഷന്‍, ടയര്‍ തുടങ്ങി അടിസ്ഥാന കസ്റ്റമൈസേഷന്‍ ഉള്‍പ്പെടെ വലിയ ട്യൂണിങ്ങുകള്‍ പൂര്‍ത്തിയാക്കാനും ഈ ബാക്കി തുക ഉപയോഗിക്കാന്‍ സാധിക്കുമെന്നത് ഓഫ്റോഡ് പ്രേമികള്‍ക്ക് അഡീഷനല്‍ ബെനഫിറ്റാണ്.