ജപ്പാനില്‍ പുതിയ 7,273 ദ്വീപുകള്‍ !

ജപ്പാനില്‍ എത്ര ദ്വീപുകളുണ്ട്. ജപ്പാനിലെ പാര്‍ലമെന്റില്‍ ഉയര്‍ന്ന ചോദ്യത്തിനു കൃത്യമായ മറുപടി നല്‍കാന്‍ ജപ്പാന്‍ സര്‍ക്കാരിനു കഴിഞ്ഞില്ല. 6,852 ദ്വീപുകള്‍ എന്നാണ് സര്‍ക്കാരിന്റെ മറുപടി. ഈ കണക്കു ശരിയല്ലെന്നായി പാര്‍ലമെന്റ് അംഗങ്ങള്‍. 1987 ലെ കണക്കുകളായിരുന്നു സര്‍ക്കാര്‍ പാര്‍ലമെന്റിനു മുന്നില്‍ അവതരിപ്പിച്ചത്. അതിനേക്കാള്‍ ദ്വീപുകളുണ്ടെന്ന് പാര്‍ലമെന്റംഗങ്ങള്‍ വാദിച്ചു. ഇതോടെ പുതിയ സര്‍വേ നടത്താന്‍ സര്‍ക്കാര്‍ തീരുമാനിച്ചു. സര്‍വേയില്‍ ജപ്പാനോടു ചേര്‍ന്ന് 7,273 ദ്വീപുകള്‍കൂടിയുണ്ടെന്നു കണ്ടെത്തി. നേരത്തെയുണ്ടായിരുന്ന 6,852 ദ്വീപുകള്‍ അടക്കം മൊത്തം 14,125 ദ്വീപുകള്‍. തെക്കന്‍ കൊറിയ മുതല്‍ റഷ്യവരെ കിടക്കുന്ന ഏഷ്യന്‍ വന്‍കരയ്ക്ക് സമാന്തരമായി വടക്കന്‍ പസഫിക്ക് ഉള്‍ക്കടലിനും ജപ്പാന്‍ കടലിനും കിഴക്കന്‍ ചീനാ കടലിനും ഇടയിലുള്ള ദ്വീപുകളടങ്ങിയ രാഷ്ട്രമാണ് ജപ്പാന്‍. ഹോക്കൈഡോ, ഹോണ്‍ഷു, ക്യുഷു, ഷിക്കോകു എന്നീ പ്രധാന ദ്വീപുകള്‍ തമ്മില്‍ കരമാര്‍ഗവും കടല്‍മാഗവുമെല്ലാം ഗതാഗത സൗകര്യങ്ങളുണ്ട്. പുതുതായി കണ്ടെത്തിയ ദ്വീപികളില്‍ പലതും വളരെ ചെറുതാണ്. മനുഷ്യവാസം അസാധ്യവുമാണ്. അതുകൊണ്ട് കൂടുതല്‍ ദ്വീപുകളെ കണ്ടെത്തിയതുകൊണ്ട് ജപ്പാനു വലിയ പ്രയോജനമൊന്നും ഇല്ല. നിലവില്‍ ജപ്പാന് ഏകദേശം 1,46,000 ചതുരശ്ര മൈല്‍ വിസ്തൃതിയാണുള്ളത്. ഒന്നേക്കാല്‍ക്കോടി ജനസംഖ്യയുണ്ട്. ലോകത്തിലെ ഏറ്റവും ജനസംഖ്യയുള്ള പതിനൊന്നാമത്തെ രാജ്യമാണ് ജപ്പാന്‍.