യുഎഇയില്‍ നിന്നും കേരളത്തിലേക്കുള്ള വിമാന ടിക്കറ്റ് നിരക്കുകള്‍ കുറച്ചു.
യുഎയില്‍ ഇനി തണുപ്പ് കാലമായതിനാൽ മലയാളികൾ നാട്ടിലേയ്ക്ക് തിരിക്കുന്ന സമയമാണ്. അതിനാൽ വിമാന ടിക്കറ്റ് നിരക്കിൽ വന്ന മാറ്റങ്ങള്‍ മലയാളിക്ക് തെല്ലാശ്വാസം പകരുന്നുണ്ട്.
പുതിയ ഷെഡ്യൂളില്‍ എയര്‍ ഇന്ത്യ എക്സ്പ്രസ് കേരളത്തിലേക്കുള്ള എല്ലാ സര്‍വീസുകളിലും നിരക്ക് കുറച്ചിട്ടുണ്ട്. എന്നാല്‍ കൊച്ചി, കണ്ണൂര്‍ എന്നിവിടങ്ങളെ അപേക്ഷിച്ച് മസ്‌കറ്റ്-കോഴിക്കോട് സെക്ടറില്‍ ടിക്കറ്റ് നിരക്ക് കൂടുതല്‍ ആണ്.
ടിക്കറ്റ് നിരക്കുകള്‍ കുറഞ്ഞതോടെ ചെറിയ വരുമാനത്തില്‍ ജോലി ചെയ്യുന്ന നിരവധി പേര്‍ ആശ്വാസത്തിലാണ്. നാട്ടില്‍ വരാന്‍ വേണ്ടി ടിക്കറ്റ് നിരക്ക് കുറയാന്‍ കാത്തിരിക്കുകയായിരുന്നു പലരും. താരതമ്യേന കണ്ണൂര്‍, കൊച്ചി സെക്ടറിലേക്ക് നിരക്ക് കുറയുന്നതുകൊണ്ട് നിരവധി പേര്‍ അവിടേക്ക് യാത്ര ചെയ്യാന്‍ സാധ്യതയുണ്ട്.
അതേസമയം, യു.എ.ഇ വരും ദിനങ്ങളില്‍ കൂടുതല്‍ തണുത്ത് വിറക്കും. ശൈത്യകാലത്തിന് തുടക്കമായതോടെ തണുപ്പ് കൂടുതല്‍ കഠിനമാകുമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു. പര്‍വതപ്രദേശങ്ങളില്‍ താപനില 5 ഡിഗ്രി സെല്‍ഷ്യസില്‍ കുറയാന്‍ സാധ്യതയുണ്ടെന്നും കേന്ദ്രം മുന്നറിയിപ്പ് നല്‍കി. ജനുവരി പകുതിക്ക് ശേഷമുള്ള ദിവസങ്ങള്‍, ഗള്‍ഫ് പൈതൃക കലണ്ടറില്‍ ശൈത്യകാലത്തിന്റെ ഏറ്റവും ഉയര്‍ന്ന സമയമാണെന്ന് അധികൃതര്‍ പറഞ്ഞു.