ബിസിസിഐയുമായി കരാറില്‍ ഏര്‍പ്പെടാനൊരുങ്ങി കാമ്പ കോള. ഇതോടെ, ഈ വര്‍ഷം മുതല്‍ രാജ്യത്ത് നടക്കുന്ന എല്ലാ ക്രിക്കറ്റ് പരമ്പരകളുടെയും ഔദ്യോഗിക സ്‌പോണ്‍സര്‍മാരുടെ പട്ടികയില്‍ കാമ്പ കോളയും ഉണ്ടാകുന്നതാണ്. റിലയന്‍സ് കണ്‍സ്യൂമര്‍ പ്രോഡക്റ്റിന്റെ ഉടമസ്ഥതയിലുള്ള ശീതള പാനീയ ബ്രാന്‍ഡാണ് കാമ്പ കോള. എതിരാളികളായ കൊക്കകോളയെയും, പെപ്‌സികോയെയും മറികടന്നാണ് ബിസിസിഐയുമായി കാമ്പ കോള കരാറില്‍ ഏര്‍പ്പെടുന്നത്. ഒരു വര്‍ഷം മുന്‍പ് റിലയന്‍സ് കാമ്പ കോളയെ പുനരാരംഭിച്ചതിന് ശേഷം നടത്തുന്ന ആദ്യത്തെ സ്‌പോണ്‍സര്‍ഷിപ്പ് കൂടിയാണിത്. കരാര്‍ അനുസരിച്ച്, രാജ്യത്ത് നടക്കുന്ന എല്ലാ ക്രിക്കറ്റ് മത്സരങ്ങളുടെ പാനീയ പങ്കാളിത്തവും, പ്രത്യേക ഓണ്‍-സ്റ്റേഡിയം സാന്നിധ്യമാകാനുള്ള അവകാശവും ലഭിക്കുന്നതാണ്. അണ്ടര്‍ 19 സീരീസും, വനിതാ പരമ്പരകളും ഉള്‍പ്പെടെ ഇന്ത്യയില്‍ നടക്കാനിരിക്കുന്ന എല്ലാ ക്രിക്കറ്റ് മത്സരങ്ങളും കരാറില്‍ ഉള്‍പ്പെടുന്നതാണ്. കരാറുമായി ബന്ധപ്പെട്ട സാമ്പത്തിക വിവരങ്ങള്‍ ഇതുവരെ വെളിപ്പെടുത്തിയിട്ടില്ല. 1970-കളിലും 1980-കളിലും ഇന്ത്യന്‍ വിപണിയിലെ പ്രത്യേക സാന്നിധ്യമായി മാറാന്‍ കാമ്പ കോളയ്ക്ക് സാധിച്ചിരുന്നു. പിന്നീട് യുഎസ് ഭീമന്മാര്‍ സോഫ്റ്റ് ഡ്രിങ്ക് വിപണി പിടിച്ചെടുത്തതോടെ കാമ്പ കോള അപ്രത്യക്ഷമാകുകയായിരുന്നു. 2022-ന്റെ പകുതിയോടെയാണ് പ്യുവര്‍ ഡ്രിങ്ക്‌സ് ഗ്രൂപ്പില്‍ നിന്ന് 22 കോടി രൂപയ്ക്ക് റിലയന്‍സ് കാമ്പയെ ഏറ്റെടുക്കുന്നത്.