ക്രൈസ്തവ സന്യാസിനികള്‍ അഭിനയിക്കുകയും, കപ്പൂച്ചിന്‍ പുരോഹിതന്‍ സംവിധാനം ചെയ്യുകയും ചെയ്ത ‘ഇറ്റ്‌സ് യു ആന്‍ഡ് മി’ എന്ന ഇംഗ്ലീഷ് റാപ്പ് ഗാനം പുറത്തിറങ്ങി. ഇതാദ്യമായാണ് പൂര്‍ണമായും ക്രൈസ്തവ സന്യാസിനികള്‍ അഭിനയിച്ച ഒരു റാപ്പ് ഗാനം പുറത്തിറങ്ങുന്നത്. ചടുലമായ സംഗീതവും വേഗത്തില്‍ പറഞ്ഞു പോകുന്ന വരികളുമാണ് റാപ്പ് സംഗീതത്തിന്റെ പ്രത്യേകത. ആഫ്രോ-അമേരിക്കന്‍ വംശജരുടെ ഇടയില്‍ വളരെ ജനപ്രിയമാണ് ഇത്. ‘ഇറ്റ്‌സ് യു ആന്‍ഡ് മി’ എന്ന ഗാനത്തില്‍ അണി നിരക്കുന്നത് നോര്‍ത്ത്-ഈസ്റ്റ് ഇന്ത്യയിലെ എസ്.എം.എം.ഐ സഭയിലെ ക്രൈസ്തവ സന്യാസിനികളുടെ സംഘമാണ്. ഗാനം സംവിധാനം ചെയ്തിരിക്കുന്നത് ഫാ.ജോബിസ് കപ്പുച്ചിനാണ്. ക്രൈസ്തവ വിശ്വാസത്തെയും റാപ്പ് സംഗീതത്തെയും ഇടകലര്‍ത്തി പുറത്തിറങ്ങിയിരിക്കുന്ന ഗാനത്തിന്റെ സംഗീത സംവിധാനം നിര്‍വ്വഹിച്ചിരിക്കുന്നത് അലന്‍ ഷോജിയാണ്. വരികള്‍ വിഷ്ണു സുധന്‍. ശ്രുതി ശിവദാസാണ് ഗാനം ആലപിച്ചിരിക്കുന്നത്.