ഇലക്ട്രിക്ക് ടൂവീലര്‍ ബ്രാന്‍ഡായ ആതര്‍ എനര്‍ജി തങ്ങളുടെ ജനപ്രിയ ഇലക്ട്രിക് സ്‌കൂട്ടര്‍ 450എസിന്റെ പുതിയ വകഭേദം ഇന്ത്യയില്‍ പുറത്തിറക്കി. ഈ പുതിയ മോഡലിന് 3.7 കിലോവാട്ട്അവര്‍ ബാറ്ററി ലഭിക്കുന്നു. 1.46 ലക്ഷം രൂപയാണ് എക്‌സ്-ഷോറൂം വില. ഈ മോഡലിലൂടെ, എന്‍ട്രി ലെവല്‍ സ്‌കൂട്ടറില്‍ പോലും ദീര്‍ഘദൂര ശേഷി നല്‍കുക എന്നതാണ് കമ്പനി ലക്ഷ്യമിടുന്നത്. ഒറ്റ ചാര്‍ജില്‍ കൂടുതല്‍ ദൂരം സഞ്ചരിക്കാന്‍ കഴിയുന്ന തരത്തില്‍ ഇത്തവണ കമ്പനി സ്‌കൂട്ടറിന്റെ ബാറ്ററി വര്‍ദ്ധിപ്പിച്ചിട്ടുണ്ട്. സ്‌പോര്‍ട്ടി പ്രകടനത്തോടൊപ്പം ദീര്‍ഘദൂര റേഞ്ച് ആഗ്രഹിക്കുന്ന റൈഡര്‍മാര്‍ക്കുള്ളതാണ് ഈ സ്‌കൂട്ടര്‍. ഈ പുതിയ ഏതര്‍ ബാറ്ററിക്ക് എട്ട് വര്‍ഷം അല്ലെങ്കില്‍ 80,000 കിലോമീറ്റര്‍ വാറന്റി നല്‍കുന്നു. കുറഞ്ഞത് 70 ശതമാനം ബാറ്ററി ഗ്യാരന്റി ഇതില്‍ ഉള്‍പ്പെടുന്നു. കമ്പനി സ്‌കൂട്ടറിന്റെ ബുക്കിംഗ് ആരംഭിച്ചു. ഓണ്‍ലൈനായോ ഏതര്‍ സ്റ്റോര്‍ സന്ദര്‍ശിച്ചോ ഇത് ബുക്ക് ചെയ്യാം. സ്‌കൂട്ടറിന്റെ ഡെലിവറി 2025 ഓഗസ്റ്റ് മുതല്‍ ആരംഭിക്കും.