ആമിര്‍ ഖാന്റെ മകന്‍ ജുനൈദ് ഖാന്‍, ബോണി കപൂര്‍ ശ്രീദേവി ദമ്പതികളുടെ മകള്‍ ഖുഷി കപൂര്‍ എന്നിവരെ പ്രധാന കഥാപാത്രങ്ങളാക്കി അദ്വൈത് ചന്ദന്‍ സംവിധാനം ചെയ്യുന്ന ‘ലവ്യാപാ’ ട്രെയിലര്‍ എത്തി. 2022ല്‍ റിലീസ് ചെയ്ത തമിഴ് സൂപ്പര്‍ഹിറ്റ് ചിത്രം ‘ലവ്ടുഡേ’യുടെ ഹിന്ദി റീമേക്ക് ആണിത്. അഷുതോഷ് റാണ, തന്‍വിക പര്‍ലികര്‍, ആദിത്യ കുല്‍ഷ്രേഷ്ട്, നിഖില്‍ മേഹ്ത എന്നിവരാണ് മറ്റ് അഭിനേതാക്കള്‍. ഫാന്റം പിക്‌ചേഴ്‌സും എജിഎസ് എന്റര്‍ടെയ്ന്‍മെന്റും ചേര്‍ന്നാണ് നിര്‍മാണം. ട്രെയിലറിന് മികച്ച പ്രതികരണമാണ് പ്രേക്ഷകരില്‍ നിന്നും ലഭിക്കുന്നത്. തമിഴിലെ തിരക്കഥ അതേ പടി പകര്‍ത്തിയിരിക്കുകയാണ്. പ്രദീപ് രംഗനാഥന്‍ സംവിധാനം ചെയ്ത് നായകനായെത്തിയ സിനിമയാണ് ലവ് ടുഡേ. മലയാളി നടി ഇവാന നായികയായെത്തിയ ചിത്രം നൂറ് കോടി ക്ലബ്ബില്‍ ഇടംപിടിച്ചിരുന്നു. വെറും അഞ്ച് കോടിയായിരുന്നു സിനിമയുടെ ബജറ്റ്.