◾സീറോ ബഫര്‍ സോണ്‍ റിപ്പോര്‍ട്ടും ഭൂപടവും സര്‍ക്കാര്‍ പ്രസിദ്ധീകരിച്ചു. സര്‍ക്കാര്‍ വെബ് സൈറ്റുകളിലുള്ള റിപ്പോര്‍ട്ട് പൊതുജനങ്ങള്‍ക്കു പരിശോധിക്കാം. പരിശോധിച്ചശേഷം പരാതിയുണ്ടെങ്കില്‍ പഞ്ചായത്തില്‍ നല്‍കണം. കഴിഞ്ഞ വര്‍ഷം കേന്ദ്ര സര്‍ക്കാരിനു നല്‍കിയ റിപ്പോര്‍ട്ടാണ് പ്രസിദ്ധീകരിച്ചത്. 22 സംരക്ഷിത വനമേഖലക്കു ചുറ്റുമുള്ള ഭൂപടമാണിത്. ജനവാസ മേഖലകളെ ബഫര്‍ സോണില്‍നിന്ന് ഒഴിവാക്കിയാണ് റിപ്പോര്‍ട്ട് തയാറാക്കിയത്. താമസ സ്ഥലം വയലറ്റ് നിറത്തിലാണ്. പരിസ്ഥിതിലോല മേഖലക്കു പിങ്ക് നിറം. വിദ്യാഭ്യാസ സ്ഥാപനങ്ങള്‍ നീല നിറത്തിലാണ്. സുല്‍ത്താന്‍ ബത്തേരി നഗരസഭയുടെ ഭൂരിഭാഗവും ബഫര്‍സോണിലാണ്. വയനാട,് കോഴിക്കോട് ജില്ലകളിലെ ഏഴു വീതം പഞ്ചായത്തുകള്‍ ബഫര്‍ സോണിലാണ്. (ബഫര്‍സോണ്‍ കൊള്ള … https://youtu.be/Zy6GCiz2Osp )
◾സംസ്ഥാന സര്‍ക്കാര്‍ വെബ്‌സൈറ്റ് https://kerala.gov.in/ ഏറെ സമയം പണിമുടക്കി. ബഫര്‍സോണ്‍ ഭൂപടം പ്രസിദ്ധീകരിച്ചതിനു പിറകേ ആയിരക്കണക്കിനു ജനങ്ങള്‍ വെബ് സൈറ്റിലേക്കു പ്രവേശിച്ചതോടെയാണ് ഹാങായത്.
◾
*നാടിനും നഗരത്തിനും കെ.എസ്.എഫ്.ഇ. ഭദ്രത സ്മാര്‍ട്ട് ചിട്ടികള്‍*
നിരവധി സമ്മാനപദ്ധതികള്‍ കോര്‍ത്തിണക്കി കൊണ്ട് ആവിഷ്‌ക്കരിച്ച ചിട്ടി പദ്ധതിയാണ് കെ.എസ്.എഫ്.ഇ. ഭദ്രത സ്മാര്‍ട്ട് ചിട്ടികള്‍ 2022. ബംബര്‍ സമ്മാനമായി 1 കോടി വിലയുള്ള ഫ്‌ലാറ്റ്/ വില്ല അല്ലെങ്കില്‍ 1കോടി രൂപ ഒരാള്‍ക്ക് സമ്മാനമായി നല്‍കുന്നു. മേഖലാ തല സമ്മാനങ്ങളായി 70ഇലക്ട്രിക് കാറുകള്‍ (Tata Tigor EV XE)അല്ലെങ്കില്‍ പരമാവധി 12.50ലക്ഷം രൂപ വീതം 70പേര്‍ക്കും കൂടാതെ 100ഹോണ്ട ഇലക്ട്രിക് സ്‌ക്കൂട്ടറുകള്‍ അല്ലെങ്കില്‍ പരമാവധി 75000/-രൂപ വീതം 100 പേര്‍ക്കും ലഭിക്കുന്നതാണ്.
ഉടന്‍ തന്നെ അടുത്തുള്ള കെ.എസ്.എഫ്.ഇ. ശാഖ സന്ദര്‍ശിക്കൂ. ചിട്ടിയില്‍ അംഗമാകൂ.
*ksfe.com/offers/ksfe-bhadratha-smart-chits-2022*
◾ബഫര്‍സോണ്‍ ഫീല്‍ഡ് സര്‍വേ ഓരോ പഞ്ചായത്തിനും സ്വന്തം നിലയില്‍ ആരംഭിക്കാവുന്നതാണെന്ന് റവന്യൂ മന്ത്രി കെ. രാജനും വനംമന്ത്രി എ.കെ. ശശീന്ദ്രനും. ജനവാസ മേഖലയെ ബഫര്‍സോണില്‍ ഉള്‍പെടുത്തില്ല. ഭൂപടം പരിശോധിച്ച് പരാതി വാര്‍ഡു മെമ്പറേയും പഞ്ചായത്തിലും രേഖാമൂലം അറിയിക്കണമെന്നും മന്ത്രിമാര്‍ നിര്‍ദേശിച്ചു.
◾കോവിഡ് സ്ഥിതിഗതികള്‍ വിലയിരുത്താന്‍ പ്രധാനമന്ത്രി നരേന്ദ്രമോദി ഉന്നതതല യോഗം വിളിച്ചു. ചൈനയില്‍ കൊവിഡ് വ്യാപനത്തിന് കാരണമായ ബിഎഫ് സെവന്‍ ഉപവകഭേദം ഇന്ത്യയിലും സ്ഥിരീകരിച്ച സാഹചര്യത്തിലാണ് യോഗം വിളിച്ചത്. മാസ്‌ക് ഉപയോഗിക്കണമെന്നും ബൂസ്റ്റര്‍ ഡോസ് അടക്കമുള്ള വാക്സിന്‍ എടുക്കണമെന്നും ആരോഗ്യ വകുപ്പ് നിര്‍ദേശം നല്‍കിയിരിക്കേയാണ് പ്രധാനമന്ത്രി യോഗം വിളിച്ചത്.
◾സോളാര്‍ കേസില്‍ അന്നത്തെ മുഖ്യമന്ത്രി ഉമ്മന്‍ചാണ്ടിക്ക് വിഎസ് അച്യതാനന്ദന്‍ നഷ്ടപരിഹാരം നല്‍കണമെന്ന വിചാരണ കോടതി വിധി തിരുവനന്തപുരം ജില്ലാ കോടതി സ്റ്റേ ചെയ്തു. പത്ത് ലക്ഷത്തി പതിനായിരം രൂപ നഷ്ടപരിഹാരം നല്‍കണമെന്നായിരുന്നു കീഴ്‌ക്കോടതി വിധി.
*ജോയ്ആലുക്കാസ് വിശേഷങ്ങള്‍*
ജോയ്ആലുക്കാസിലെ എല്ലാ സ്വര്‍ണാഭരണങ്ങള്‍ക്കും ഇപ്പോള്‍ പണിക്കൂലിയില്‍ വന്‍ ഇളവ്. സ്വര്‍ണം, ഡയമണ്ട്, മറ്റു ജ്വല്ലറി കളക്ഷനുകളെല്ലാം സ്വര്‍ണ വിപണിയിലെ തന്നെ ഏറ്റവും കുറഞ്ഞ പണിക്കൂലിയിലാണ് ലഭ്യമാക്കുന്നത്. ജോയ്ആലുക്കാസില്‍ നിന്ന് പര്‍ച്ചേയ്സ് ചെയ്യുന്ന ആഭരണങ്ങള്‍ക്ക് ഒരു വര്‍ഷത്തേക്ക് സൗജന്യ ഇന്‍ഷുഷറന്‍സും ലൈഫ്ടൈം ഫ്രീ മെയിന്റനന്‍സും ലഭിക്കുന്നതാണ്. ഒപ്പം എക്സ്ചേഞ്ച് ഓഫറും പ്രയോജനപ്പെടുത്താവുന്നതാണ്.
➖
◾സംസ്ഥാന ഭൂരേഖ സര്‍വ്വെ വകുപ്പില്‍ പൊതുസ്ഥലം മാറ്റത്തിനുള്ള ഓണ്‍ലൈന്‍ അപേക്ഷയില്‍ ഏതു യൂണിയനിലെ അംഗമാണെന്നുകൂടി രേഖപ്പെടുത്തണമെന്ന നിര്‍ദേശത്തിനെതിരേ പ്രതിപക്ഷ യൂണിയനുകള്‍. രജിസ്ട്രേഷന്‍ ഐജിക്ക് പരാതി നല്‍കുമെന്ന് പ്രതിപക്ഷ സര്‍വ്വീസ് സംഘടനാ നേതാക്കള്‍ അറിയിച്ചു.
◾തിരുവനന്തപുരം ആയുര്‍വേദ കോളജില്‍ തോറ്റ വിദ്യാര്‍ഥികളും ബിരുദ ദാന ചടങ്ങില്‍ പങ്കെടുത്ത സംഭവത്തില്‍ എല്ലാ കുട്ടികളും സര്‍ട്ടിഫിക്കറ്റ് തിരിച്ചുനല്‍കി. രണ്ടാം വര്‍ഷ പരീക്ഷ തോറ്റ ഏഴു വിദ്യാര്‍ഥികളും സര്‍ട്ടിഫിക്കറ്റ് തിരിച്ചുനല്‍കി.
◾ക്രിസ്മസ്, ന്യൂ ഇയര്‍ സീസണിലെ യാത്രാതിരക്കു പരിഹരിക്കാന്‍ ദക്ഷിണ റയില്‍വേ അനുവദിച്ച സ്പെഷ്യല്‍ ട്രെയിനുകള്‍ ഓടിത്തുടങ്ങി. എറണാകുളം- ചെന്നൈ, ചെന്നൈ എഗ്മോര്‍ – കൊല്ലം, എറണാകുളം -വേളാങ്കണി, എറണാകുളം- താമ്പ്രം റൂട്ടുകളിലും തിരിച്ചുമാണ് സ്പെഷ്യല്‍ ട്രെയിനുകള്‍.
◾ഇന്നു രാത്രി എട്ടു മുതല്‍ താമരശേരി ചുരം വഴിയുള്ള ഗതാഗതത്തിനു നിയന്ത്രണം. കര്‍ണാടകത്തിലേക്കുള്ള കൂറ്റന്‍ ട്രക്കുകള്‍ക്ക് താമരശ്ശേരി ചുരം വഴി പോകാന്‍ അനുമതി നല്‍കിയതിനാലാണു നിയന്ത്രണം. വാഹനങ്ങള്‍ മറ്റു വഴികളിലൂടെ പോകണമെന്നാണു നിര്‍ദേശം.
◾സംസ്ഥാന സര്‍ക്കാര്‍ നടപ്പിലാക്കുന്ന കേന്ദ്രപദ്ധതിയുടെ പോസ്റ്ററില്‍ പ്രധാനമന്ത്രി മോദിയുടെ ചിത്രമില്ല. പ്രതിഷേധവുമായി ബിജെപി. ദീനദയാല്‍ ഉപാധ്യായ ഗ്രാമീണ കൗശല്‍ യോജന പദ്ധതിക്കായി എറണാകുളം ജില്ലാ ഭരണകൂടം പുറത്തിറക്കിയ പോസ്റ്ററിനെതിരെയാണ് ബിജെപി പ്രതിഷേധം.
◾കരിപ്പൂര്‍ വിമാനത്താവളത്തില്‍ രണ്ട് യാത്രക്കാരില്‍നിന്ന് ഒരു കോടിയോളം രൂപയുടെ സ്വര്‍ണ മിശ്രിതം കസ്റ്റംസ് പിടികൂടി. മലപ്പുറം അമരമ്പലം സ്വദേശിയായ പനോലന്‍ നവാസ് നിന്നും 1056 ഗ്രാം സ്വര്‍ണവും കോഴിക്കോട് ചെങ്ങോട്ടുകാവ് സ്വദേശിയായ മേത്തര നിസ്സാറില്‍ നിന്നും 1060 ഗ്രാം സ്വര്‍ണവുമാണ് പിടികൂടിയത്.
◾ബഫര്‍ സോണ്‍ വിഷയത്തില്‍ മുഖ്യമന്ത്രി തെറ്റിദ്ധരിപ്പിക്കപ്പെട്ടതായി തിരുവഞ്ചൂര്‍ രാധാകൃഷ്ണന്‍ എംഎല്‍എ. വിഷയത്തില്‍ ഇപ്പോള്‍ തിടുക്കപ്പെട്ട് സ്വീകരിച്ചിരിക്കുന്ന സംസ്ഥാന സര്‍ക്കാര്‍ നിലപാട് അനുചിതമാണ്. പരിസ്ഥിതി ലോല പ്രദേശം വനാതിര്‍ത്തിയില്‍ ഒതുക്കണമെന്ന ഉമ്മന്‍ വി ഉമ്മന്‍ റിപ്പോര്‍ട്ട് മുന്‍ യുഡിഎഫ് സര്‍ക്കാര്‍ സ്വീകരിച്ച തീരുമാനം എല്‍ഡിഎഫ് സര്‍ക്കാരും അംഗീകരിച്ചതാണ്. അദ്ദേഹം പറഞ്ഞു.
◾കേരള കലാമണ്ഡലത്തില്‍ ജീവനക്കാരുടെ ശമ്പളം നല്‍കാന്‍ പണമില്ല. വിദ്യാര്‍ഥികളുടെ ഗ്രാന്റും മുടങ്ങി. 123 സ്ഥിരം ജീവനക്കാരും 171 താല്‍ക്കാലിക ജീവനക്കാരും 600 വിദ്യാര്‍ഥികളുമാണ് ഇവിടെയുള്ളത്. 75 ലക്ഷം രൂപയാണ് ശമ്പളം നല്‍കാന്‍ വേണ്ടത്. പത്താം തീയതിയോടെയാണു ശമ്പളം നല്‍കാറുള്ളത്.
◾ബഫര്‍സോണ്‍ വിഷയത്തില്‍ സമയബന്ധിതമായി പ്രവര്‍ത്തിക്കുന്നതില്‍ സര്‍ക്കാരിനു വീഴ്ച സംഭവിച്ചെന്ന് മുസ്ലിം ലീഗ് നേതാവ് പി.കെ കുഞ്ഞാലിക്കുട്ടി. സര്‍ക്കാര്‍ വരുത്തിയ വീഴ്ചകള്‍ക്ക് വലിയ വില കൊടുക്കേണ്ടി വന്നു. ഇനിയെങ്കിലും ജാഗ്രത വേണം. വസ്ത്രം മാറുന്നതുപോലെ മുന്നണി മാറുന്ന പാര്‍ട്ടിയല്ല മുസ്ലിം ലീഗ്. യുഡിഎഫിന്റെ അവിഭാജ്യ ഘടകമാണു ലീഗെന്നും കുഞ്ഞാലിക്കുട്ടി പറഞ്ഞു.
◾കൊല്ലത്ത് യുവഡോക്ടര്‍ വീട്ടില്‍ മരിച്ചനിലയില്‍. ഇ.എന്‍.ടി. ക്ലിനിക് ഉടമ ഡോ. അരവിന്ദിന്റെ മകള്‍ ഡോ. അര്‍പ്പിത അരവിന്ദിനെ (30)യാണ് തൂങ്ങിമരിച്ചനിലയില്‍ കണ്ടെത്തിയത്. ഡോ. അരവിന്ദ്-ദേവിക ദമ്പതിമാരുടെ ഏകമകളാണ്. എം.ബി.ബി.എസ്. പഠനത്തിനുശേഷം പി.ജി. അവസാന വര്‍ഷ വിദ്യാര്‍ത്ഥിനിയായിരുന്നു.
◾കുമളിയില്‍ സ്‌കൂള്‍ വിദ്യാര്‍ഥിനിയെ ലോഡ്ജിലെത്തിച്ച് പീഡിപ്പിച്ച കേസില്‍ ഇരുപതുകാരന്‍ അറസ്റ്റിലായി. തൃശൂര്‍ മുകുന്ദപുരം സ്വദേശി അലന്‍ ബാബുവിനെയാണ് പിടികൂടിയത്. കുമളിയിലെ ലോഡ്ജില്‍ സ്‌കൂള്‍ യൂണിഫോമില്‍ പെണ്‍കുട്ടിയെ കണ്ടു സംശയം തോന്നിയ നാട്ടുകാര്‍ പൊലീസില്‍ വിവരമറിയിക്കുകയായിരുന്നു.
◾ചൈനയുടെ അധിനിവേശ ശ്രമം ചര്‍ച്ച ചെയ്യണമെന്ന് ആവശ്യപ്പെട്ട് ലോക്സഭയില്‍ പ്രതിപക്ഷ ബഹളംമൂലം സഭാ നടപടികള്‍ നിര്‍ത്തിവച്ചു. രാവിലെ സഭ ചേര്‍ന്നപ്പോള്‍ കൊവിഡിനെതിരെ ജാഗ്രത വേണമെന്നു ലോക്സഭ സ്പീക്കര്‍ നിര്‍ദ്ദേശിച്ചു. എല്ലാവരും മാസ്‌ക് ധരിക്കണമെന്നും സ്പീക്കര്‍ ആവശ്യപ്പെട്ടു. അംഗങ്ങള്‍ക്ക് മാസ്‌ക് വിതരണം നടത്തുകയും ചെയ്തു.
◾മാസ്‌ക് ധരിക്കുന്നതടക്കമുള്ള കോവിഡ് മാനദണ്ഡങ്ങള്‍ പാലിക്കണമെന്ന കേന്ദ്ര ആരോഗ്യമന്ത്രിയുടെ നിര്‍ദേശം തള്ളി രാഹുല്‍ ഗാന്ധി. ഹരിയാനയില്‍ തുടരുന്ന ഭാരത് ജോഡോ യാത്രയില്‍ മാസ്‌ക് ധരിക്കാതെയാണ് രാഹുല്‍ യാത്ര നടത്തിയത്. പ്രവര്‍ത്തകരും മാസ്‌ക് ധരിച്ചില്ല. കൊവിഡ് മാനദണ്ഡങ്ങള്‍ പാലിച്ചില്ലെങ്കില്‍ യാത്ര നിര്‍ത്തണമെന്ന് ഇന്നലെ കേന്ദ്ര ആരോഗ്യമന്ത്രി മന്‍സുഖ് മാണ്ഡവ്യ മുന്നറിയിപ്പു നല്‍കിയിരുന്നു.
◾ഡല്‍ഹി മദ്യനയക്കേസില്‍ ഉപമുഖ്യമന്ത്രി മനീഷ് സിസോദിയയെ എന്‍ഫോഴ്സ്മെന്റ് ഡയറക്ടറേറ്റ് വീണ്ടും ചോദ്യം ചെയ്യാന്‍ നീക്കം. സിസോദിയയെ കേസുമായി നേരിട്ടു ബന്ധിപ്പിക്കുന്ന തെളിവുകള്‍ ലഭിച്ചെന്ന് ഇ ഡി വൃത്തങ്ങള്‍ വെളിപ്പെടുത്തി.
◾ടിവി താരവും ഫാഷന്‍ ഇന്‍ഫ്ളുവന്‍സറുമായ ഉര്‍ഫി ജാവേദിനെതിരെ വധഭീഷണിയും ബലാത്സംഗ ഭീഷണിയും നടത്തിയ ആള്‍ മുംബൈയില്‍ അറസ്റ്റില്‍. നവിന്‍ ഗിരി എന്നയാളെയാണ് ഗൊരേഗാവ് പൊലീസ് അറസ്റ്റു ചെയ്തത്.
◾ചൊവ്വാ ഗ്രഹത്തില്‍ നാലു വര്‍ഷമായി പര്യവേഷണം നടത്തിയ നാസയുടെ റോബോട്ടിക് ലാന്‍ഡറായ ഇന്‍സൈറ്റ് ലാന്‍ഡര്‍ പ്രവര്‍ത്തനരഹിതമായി. ചൊവ്വാ ഗ്രഹത്തിലെ പൊടി പടലങ്ങളില്‍ മൂടിയതുമൂലമാണ് പ്രവര്‍ത്തനം നിലച്ചത്. 8130 ലക്ഷം ഡോളര്‍ ചെലവിട്ടാണ് ഇന്‍സൈറ്റ് വിക്ഷേപിച്ചത്. ചൊവ്വയിലെ കമ്പനങ്ങളും പൊടിപടലങ്ങളും ഉല്‍ക്കകളുടെ ആഘാതങ്ങളുമാണു പഠിച്ചത്.
◾നാഗ്പൂരില്‍ ദേശീയ സൈക്കിള്‍ പോളോ ചാമ്പ്യന്‍ഷിപ്പിനെത്തിയ കേരളാ ടീം അംഗം മരിച്ചു. 10 വയസുകാരി നിദ ഫാത്തിമയാണ് ഛര്‍ദ്ദിയെ തുടര്‍ന്ന് ആശുപത്രിയില്‍ മരിച്ചത്. ആലപ്പുഴ സ്വദേശിയാണ്.
◾ഇന്ത്യക്കെതിരായ ടെസ്റ്റ് പരമ്പരയിലെ രണ്ടാം മത്സരത്തില്‍ ടോസ് നേടി ബാറ്റിംഗിനിറങ്ങിയ ബംഗ്ലാദേശിന് ബാറ്റിംഗ് തകര്‍ച്ച. അവസാന വിവരം ലഭിക്കുമ്പോള്‍ ബംഗ്ലാദേശ് ആറ്് വിക്കറ്റ് നഷ്ടത്തില്‍ 215 റണ്‍സെന്ന നിലയിലാണ്.
◾ഐ.ടി. കയറ്റുമതിയില്‍ വന്‍കുതിപ്പ് നേടി ടെക്നോപാര്ക്ക്. കഴിഞ്ഞ സാമ്പത്തിക വര്‍ഷത്തില്‍ 1274കോടി രൂപയുടെ അധികവരുമാനമാണ് കൈവരിച്ചത്. ഇതോടെ മൊത്തം കയറ്റുമതി 9775കോടി രൂപയിലെത്തി. വളര്‍ച്ച 15%. ഇതിന് പുറമേ കൃത്യമായി ജി.എസ്.ടി നികുതി ഫയല്‍ ചെയ്തതിന് കേന്ദ്രസര്‍ക്കാരിന്റെയും ക്രിസലിന്റെയും (ക്രെഡിറ്റ് റേറ്റിംഗ് ഇന്‍ഫര്‍മേഷന്‍ സര്‍വീസ് ഒഫ് ഇന്ത്യ) അംഗീകാരവും 2023 ജൂണ്‍ വരെ ക്രിസല്‍ എ പ്ലസ് ഗ്രേഡും കഴിഞ്ഞ സാമ്പത്തിക വര്‍ഷം ടെക്നോപാര്ക്ക് നേടി. നിലവില്‍ 106 ലക്ഷം ചതുരശ്ര അടിസ്ഥലത്ത് 470കമ്പനികളിലായി 70000 പേരാണ് ടെക്നോപാര്‍ക്കില്‍ ജോലി ചെയ്യുന്നത്. കഴിഞ്ഞ ഒന്നരവര്‍ഷത്തിനിടയില്‍ 78 കമ്പനികള്‍ തുടങ്ങി. 2.68ലക്ഷം ചതുരശ്ര അടി സ്ഥലമാണിവര്‍ക്ക് നല്‍കിയത്. സംസ്ഥാനത്തേക്ക് പുതിയ കമ്പനികളെയും നിക്ഷേപങ്ങളെയും ആകര്‍ഷിക്കുന്നതിനായി ടെക്നോപാര്ക്ക് പുതിയ സാദ്ധ്യതകളും ഉത്പന്ന സേവനങ്ങളും വൈവിദ്ധ്യവല്‍ക്കരിക്കുകയാണ്.
◾ജനപ്രിയ സന്ദേശക്കൈമാറ്റ സംവിധാനമായ വാട്‌സാപ്പില്‍ ഏറെ ഉപകാരപ്രദമായ പുതിയൊരു ഫീച്ചര്‍ കൂടി അവതരിപ്പിച്ചു. സന്ദേശം പോസ്റ്റ് ചെയ്യുമ്പോഴോ ഫോര്‍വേഡ് ചെയ്യുമ്പോഴോ ഉദ്ദേശിക്കാത്ത ആളിനോ ഗ്രൂപ്പിലേക്കോ പോയി എന്നിരിക്കട്ടെ ആ സന്ദേശം ഡിലീറ്റ് ഫോര്‍ എവരിവണ്‍ ഉപയോഗിച്ച് ഡിലീറ്റു ചെയ്യാം. പക്ഷേ, തിടുക്കത്തില്‍ ഡിലീറ്റ് ഫോര്‍ എവരിവണിനു പകരം ഡിലീറ്റ് ഫോര്‍ മീ ആണ് ക്ലിക്കു ചെയ്തതെങ്കിലോ? അതിനുള്ള പരിഹാരവുമായി എത്തിയിരിക്കുകയാണ് വാട്‌സാപ്. ഒരു സന്ദേശം ആര്‍ക്കെങ്കിലും അയയ്ക്കുക. ആ സന്ദേശത്തില്‍ പതിവുപോലെ ക്ലിക്ക് ചെയ്താല്‍ ഡിലീറ്റ് ഫോര്‍ മീ, ഡിലീറ്റ് ഫോര്‍ എവരിവണ്‍ ഓപ്ഷനുകള്‍ കാണാം. ഡിലീറ്റ് ഫോര്‍ മി തിരഞ്ഞെടുക്കുക. അപ്പോള്‍ താഴെ ഒരു അണ്‍ഡൂ (Undo) ബട്ടണ്‍ തെളിഞ്ഞുവരും. ഇതില്‍ ക്ലിക്ക് ചെയ്താല്‍ വീണ്ടും മെസേജ് തിരിച്ചു വരും. വീണ്ടും മെസേജില്‍ ക്ലിക്ക് ചെയ്ത് ഡിലീറ്റ് ഫോര്‍ എവരിവണ്‍ തിരഞ്ഞെടുക്കാം. ഈ ഫങ്ഷന്‍ എല്ലാ ആന്‍ഡ്രോയിഡ്, ഐഒഎസ് ഹാന്‍ഡ്സെറ്റുകളിലും പ്രവര്‍ത്തിക്കുന്ന വാട്‌സാപ്പിന് ലഭിക്കും.
◾രണ്‍വീര്‍ സിംഗിനെ നായകനാക്കി രോഹിത് ഷെട്ടി സംവിധാനം നിര്‍വ്വഹിച്ച ‘സര്‍ക്കസ്’ എന്ന ചിത്രത്തിലെ വീഡിയോ സോംഗ് പുറത്തെത്തി. ‘ആഷിഖി’ എന്നാരംഭിക്കുന്ന ഗാനത്തിന് വരികള്‍ എഴുതിയിരിക്കുന്നതും സംഗീതം പകര്‍ന്നിരിക്കുന്നതും ബാദ്ഷയാണ്. ബാദ്ഷയും അമൃത ഷായും ചേര്‍ന്നാണ് ആലാപനം. പിരീഡ് കോമഡി വിഭാഗത്തില്‍ പെടുന്ന ചിത്രമാണിത്. രണ്‍വീറിനൊപ്പം വലിയ താരനിരയും അണിനിരക്കുന്നുണ്ട്. പൂജ ഹെഡ്ഗെയും ജാക്വലിന്‍ ഫെര്‍ണാണ്ടസുമാണ് നായികമാര്‍. ജോണി ലിവര്‍, സഞ്ജയ് മിശ്ര, വരുണ്‍ ശര്‍മ്മ, സിദ്ധാര്‍ഥ് യാദവ്, മുകേഷ് തിവാരി, വ്രജേഷ് ഹിര്‍ജി, അശ്വിനി കല്‍സേക്കര്‍, മുരളി ശര്‍മ്മ, ടികു ടല്‍സാനിയ, വിജയ് പട്കര്‍, ബ്രിജേന്ദ്ര കല, അനില്‍ ചരണ്‍ജീത്, ഉദയ് ടികേക്കര്‍, അഭിനയ് രാജ് സിംഗ്, സുലഭ്യ ആര്യ തുടങ്ങിയവരാണ് മറ്റു കഥാപാത്രങ്ങളെ അവതരിപ്പിച്ചിരിക്കുന്നത്. അജയ് ദേവ്ഗണ്‍, ദീപിക പദുകോണ്‍ എന്നിവരുടെ അതിഥിവേഷങ്ങളും ചിത്രത്തില്‍ ശ്രദ്ധേയമായിരിക്കും. ഫര്‍ഹാദ് സാംജി, സഞ്ജിത്ത് ബെദ്രെ, വിധി ഘോഡ്ഗാവോങ്കര്‍ എന്നിവര്‍ ചേര്‍ന്നാണ് ചിത്രത്തിന്റെ രചന നിര്‍വ്വഹിച്ചിരിക്കുന്നത്. വില്യം ഷേക്സ്പിയറുടെ കോമഡി ഓഫ് എറേഴ്സിനെ മുന്‍നിര്‍ത്തി തിരക്കഥ ഒരുക്കിയിരിക്കുന്നത് യൂനസ് സജാവല്‍ ആണ്. മലയാളി ഛായാഗ്രാഹകന്‍ ജോമോന്‍ ടി ജോണ്‍ ആണ് ചിത്രത്തിന്റെ ക്യാമറ.
◾സെന്തില്‍, അനുമോള്‍, മാസ്റ്റര്‍ അന്‍വിന്‍ ശ്രീനു എന്നിവര്‍ പ്രധാന കഥാപാത്രങ്ങളാകുന്ന ചിത്രമാണ് ‘ത തവളയുടെ ത’. നവാഗതനായ ഫ്രാന്‍സിസ് ജോസഫ് ആണ് ചിത്രം സംവിധാനം ചെയ്യുന്നത്. കഥയുംഫ്രാന്‍സിസ് ജോസഫിന്റേത് തന്നെ. ‘ത തവളയുടെ ത’ എന്ന ചിത്രത്തിലെ ആദ്യ ഗാനം പുറത്തുവിട്ടു. മൂന്നാം ക്ലാസ്സില്‍ പഠിക്കുന്ന ‘ബാലു’ എന്ന കുട്ടിയുടെ ജീവിതത്തിലൂടെയും സ്വപ്ന ലോകങ്ങളിലൂടെയും സഞ്ചരിക്കുന്നതാണ് ചിത്രത്തിന്റെ ഇതിവൃത്തം. ‘ബാലു’ എന്ന കൊച്ചു കുട്ടിയായി മാസ്റ്റര്‍ അന്‍വിന്‍ ശ്രീനു ആണ് വേഷമിടുന്നത്. ‘ബാലു’വിന്റെ അമ്മയായ ‘ഗംഗ’യായി അനുമോളും ‘ബാലു’വിന്റെ അച്ഛന്‍ ‘വിശ്വനാഥനാ’യി സെന്തിലും അഭിനയിച്ചിരിക്കുന്നു. ഇവര്‍ക്ക് പുറമെ ആനന്ദ് റോഷന്‍, ഗൗതമി നായര്‍, നെഹല, അജിത് കോശി, സുനില്‍ സുഗത, അനീഷ് ഗോപാല്‍, നന്ദന്‍ ഉണ്ണി, ജെന്‍സണ്‍ ആലപ്പാട്ട്, ഹരികൃഷ്ണന്‍, സ്മിത അബു, വസുദേവ് പട്രോട്ടം തുടങ്ങിയവരും ചിത്രത്തില്‍ അഭിനയിക്കുന്നു. ചിത്രത്തില്‍ അറുപതോളം ബാലതാരങ്ങളാണ് വേഷമിടുന്നത്.
◾ഹീറോ മോട്ടോകോര്‍പ്പിന്റെ പുതിയ ഹീറോ എക്സ്പള്‍സ് 200ടി 4വി അവതരിപ്പിച്ചു. 1,25,726 രൂപയാണ് ബൈക്കിന്റെ ദില്ലി എക്സ്-ഷോറൂം വില. എക്സ്പള്‍സ് 200 4വിയെ ശക്തിപ്പെടുത്തുന്ന ആധുനിക ഫോര്‍-വാല്‍വ് എഞ്ചിനിനൊപ്പം സൗന്ദര്യവര്‍ദ്ധക മാറ്റങ്ങളുമായാണ് പുതിയ മോഡല്‍ വരുന്നത്. 8,500ആര്‍പിഎമ്മില്‍ 19.1പിഎസ് പവറും 6500ആര്‍പിഎമ്മില്‍ 17.3എന്‍എം പീക്ക് ടോര്‍ക്കും പുറപ്പെടുവിക്കുന്ന വിഎസ്വിഐ കംപ്ലയിന്റ് 200 സിസി നാല് വാല്‍വ് ഓയില്‍ കൂള്‍ഡ് എഞ്ചിനാണ് പുതിയ ഹീറോ എക്സ്പള്‍സ് 200ടി 4വിക്ക് കരുത്ത് പകരുന്നത്. അഞ്ച് സ്പീഡ് ഗിയര്‍ബോക്സുമായി എഞ്ചിന്‍ ജോടിയാക്കിയിരിക്കുന്നു. എക്സ്പള്‍സ് 200ടി 2വി യുമായി താരതമ്യപ്പെടുത്തുമ്പോള്‍, പുതിയ പവര്‍ട്രെയിന്‍ യഥാക്രമം 0.7ബിഎച്പി, 0.2എന്‍എം കൂടുതല്‍ പവറും ടോര്‍ക്കും വാഗ്ദാനം ചെയ്യുന്നു. സ്പോര്‍ട്സ് റെഡ്, മാറ്റ് ഫങ്ക് ലൈം യെല്ലോ, മാറ്റ് ഷീല്‍ഡ് ഗോള്‍ഡ് എന്നീ മൂന്ന് കളര്‍ ഓപ്ഷനുകളില്‍ ഹീറോ എക്സ്പള്‍സ് 200ടി 4വി ലഭ്യമാണ്.
◾പ്രശസ്ത തിരക്കഥാകൃത്തും അധ്യാപകനുമായ ബിപിന്‍ ചന്ദ്രന്റെ രസികന്‍ ഓര്‍മകള്‍. നര്‍മത്തിന്റെ മേമ്പൊടി വിതറിയ ഒരു തുറന്നെഴുത്താണ് ഈ പുസ്തകം. സ്വന്തം പിതാവായാലും മാഷായാലും കാമുകിയായാലും കാര്യങ്ങള്‍ ഒളിക്കാതെ പറയും. എഴുത്തിന്റെ ഒരു അര്‍മാദം എന്ന് ഇതിനെ വിശേഷിപ്പിക്കാം. പ്രശസ്ത തിരക്കഥാകൃത്തും അധ്യാപകനുമായ ബിപിന്‍ ചന്ദ്രന്റെ രസികന്‍ ഓര്‍മകള്‍. ‘അര്‍മാദ ചന്ദ്രന്‍’. മനോരമ ബുക്സ്. വില 380 രൂപ.
◾ദിവസം എട്ട് മണിക്കൂറിലധികം നിശ്ചലമായി ഇരിക്കുന്നവര്‍ക്ക് അമിതവണ്ണമോ പുകവലിയോ മൂലമുള്ള മരണസാധ്യതയ്ക്ക് സമാനമായ അകാല മരണസാധ്യതയുണ്ടെന്ന് പഠനങ്ങള്‍ വെളിപ്പെടുത്തുന്നു. ഒരു ദിവസത്തെ പ്രവര്‍ത്തനങ്ങളുടെ തോതും ഇരിക്കുന്നതിന്റെ സമയവും പരിശോധിക്കുന്ന 13 ഗവേഷണപ്രബന്ധങ്ങളുടെ താരതമ്യപഠനത്തില്‍ നിന്നാണ് ഈ വിലയിരുത്തല്‍. നടക്കുന്നതും എഴുന്നേറ്റ് നില്‍ക്കുന്നതുമായി താരതമ്യം ചെയ്യുമ്പോള്‍ വളരെ കുറച്ച് ഊര്‍ജം മാത്രമേ ഇരിക്കാന്‍ ആവശ്യമുള്ളൂ. ദീര്‍ഘനേരത്തെ ഇരിപ്പ് അമിതവണ്ണം, ഉയര്‍ന്ന രക്തസമ്മര്‍ദം, രക്തത്തില്‍ അമിതമായ പഞ്ചസാര, അമിതമായ കൊഴുപ്പ്, അടിവയറ്റില്‍ കൊഴുപ്പ് അടിയല്‍, അപകടകരമായ തോതിലെ കൊളസ്ട്രോള്‍ എന്നിവയ്ക്ക് കാരണമാകുന്നു. എന്നാല്‍ ദിവസവും 60 മുതല്‍ 75 മിനിറ്റു വരെ വ്യായാമത്തില്‍ ഏര്‍പ്പെടുന്നത് ദീര്‍ഘനേരമുള്ള ഇരിപ്പ് സൃഷ്ടിക്കുന്ന പ്രശ്നങ്ങളെ പ്രതിരോധിക്കാന്‍ സഹായിക്കും. ഹൃദ്രോഗത്തിന്റെയും അര്‍ബുദത്തിന്റെയും സാധ്യത വര്‍ധിക്കാനും ദീര്‍ഘനേരത്തെ ഇരിപ്പ് കാരണമാകും. ഇതിനാല്‍ ഇരുന്ന് ജോലി ചെയ്യേണ്ടി വരുന്നവര്‍ അര മണിക്കൂര്‍ കൂടുമ്പോഴെങ്കിലും എഴുന്നേല്‍ക്കാനും നടക്കാനുമൊക്കെ ശ്രമിക്കേണ്ടതാണ്. ഫോണില്‍ സംസാരിക്കുമ്പോള്‍ നടന്നു കൊണ്ട് സംസാരിക്കുന്നതും ഗുണം ചെയ്യും. സഹപ്രവര്‍ത്തകരോട് എക്സ്റ്റന്‍ഷന്‍ ഫോണില്‍ സംസാരിക്കാതെ നേരിട്ട് നടന്ന് ചെന്ന് കാര്യം പറയുന്നതും യോഗങ്ങള്‍ സ്റ്റാന്റ് അപ്പ് മീറ്റിങ്ങുകള്‍ ആക്കുന്നതും സഹായകമാണ്.
*ഇന്നത്തെ വിനിമയ നിരക്ക്*
ഡോളര്‍ – 82.74, പൗണ്ട് – 100.17, യൂറോ – 88.05, സ്വിസ് ഫ്രാങ്ക് – 89.50, ഓസ്‌ട്രേലിയന്‍ ഡോളര്‍ – 55.92, ബഹറിന്‍ ദിനാര്‍ – 219.48, കുവൈത്ത് ദിനാര്‍ -270.23, ഒമാനി റിയാല്‍ – 215.19, സൗദി റിയാല്‍ – 22.00, യു.എ.ഇ ദിര്‍ഹം – 22.53, ഖത്തര്‍ റിയാല്‍ – 22.72, കനേഡിയന്‍ ഡോളര്‍ – 60.91.