അഡ്വഞ്ചര്‍ എക്സ് പുറത്തിറക്കി കെടിഎം

390 അഡ്വഞ്ചറിന്റെ കൂടുതല്‍ താങ്ങാനാവുന്ന പതിപ്പ് ഓസ്ട്രിയന്‍ ഇരുചക്ര വാഹന ബ്രാന്‍ഡായ കെടിഎം ഇന്ത്യ ഔദ്യോഗികമായി പുറത്തിറക്കി. അഡ്വഞ്ചര്‍ എക്സ് എന്ന് വിളിക്കപ്പെടുന്ന ഇതിന്റെ വില 2.80 ലക്ഷം രൂപ മുതല്‍ ആണ്. ഇത് 390 അഡ്വഞ്ചറിനേക്കാള്‍ 59,000 രൂപ കുറവാണ്. നിലവിലെ 390 അഡ്വഞ്ചര്‍ 3.39 ലക്ഷം രൂപയ്ക്ക് വില്‍പ്പനയില്‍ തുടരും. രണ്ട് വിലകളും എക്‌സ്-ഷോറൂം വിലകള്‍ ആണ്. കെടിഎം ഇന്ത്യ 390 അഡ്വഞ്ചര്‍ എക്സില്‍ നിന്ന് കുറച്ച് ഫീച്ചറുകള്‍ ഒഴിവാക്കിയിട്ടുണ്ട്. ഇലക്ട്രോണിക് ഓറഞ്ച്, ഡാര്‍ക്ക് ഗാല്‍വാനോ എന്നീ രണ്ട് നിറങ്ങളിലാണ് 390 അഡ്വഞ്ചര്‍ എക്സ് വില്‍ക്കുന്നത്. ഫീച്ചറുകളുടെ കാര്യത്തില്‍, റൈഡ്-ബൈ-വയര്‍, ഡ്യുവല്‍-ചാനല്‍ എബിഎസ്, ഓഫ്-റോഡ് എബിഎസ്, 12വി ആക്സസറി സോക്കറ്റ്, എല്‍ഇഡി ലൈറ്റിംഗ് എന്നിവ 390 അഡ്വഞ്ചര്‍ എക്സ് നിലനിര്‍ത്തുന്നു. എഞ്ചിനിലും മാറ്റങ്ങളില്ല.