വിരിയിക്കാം, പെരുമ്പാമ്പിന്‍ മുട്ടകള്‍
കത്രിക കൊണ്ട് മുറിച്ച് പെരുമ്പാമ്പിന്റെ മുട്ടയില്‍നിന്നു പെരുമ്പാമ്പിന്‍ കുഞ്ഞിനെ പുറത്തെടുക്കുന്ന യുവതി. പാരീസിലെ മിഗ്വല്‍ ഏഞ്ചല്‍ ഫ്ളോറസിലെ പാമ്പു സംരക്ഷണ കേന്ദ്രത്തില്‍ ചിത്രീകരിച്ച ഈ ദൃശ്യം ഇന്‍സ്റ്റഗ്രാമില്‍ അനേകരാണു കണ്ടത്. കത്രികത്തുമ്പുകൊണ്ട് മുട്ടത്തോടു കീറുമ്പോള്‍ അകത്തുള്ള പാമ്പിന്‍കുഞ്ഞ് തലയുയര്‍ത്തി പുറത്തേക്കു വരുന്നു. ഒപ്പം മുട്ടയ്ക്കുള്ളിലെ വഴുവഴുപ്പുള്ള അല്‍പം ദ്രാവകവും. യുവതിയുടെ കൈവിരലുകളിലൂടെ ഇഴഞ്ഞു നീങ്ങുന്ന പാമ്പിന്‍കുഞ്ഞിനെ വളരെ വാല്‍സല്യത്തോടെയാണ് യുവതി കൈകാര്യം ചെയ്യുന്നത്. ‘പുതുവര്‍ഷത്തിലേക്ക് മനോഹരമായ ഈ പെരുമ്പാമ്പിന്‍ കുഞ്ഞിനെ നമുക്ക് സ്വാഗതം ചെയ്യാം’ എന്ന അടിക്കുറിപ്പോടെയാണ് ‘ദി റെപ്‌റ്റൈല്‍ സൂ’ എന്ന ഇന്‍സ്റ്റാഗ്രാം പേജില്‍ വീഡിയോ പോസ്റ്റ് ചെയ്തത്. ഈ വീഡിയോക്ക് അനേകം കമന്റുകളും വന്നിട്ടിണ്ട്. പാമ്പിന്‍ മുട്ടകള്‍ വിരിയിക്കുന്നതിന് മനുഷ്യ സഹായം ആവശ്യമുണ്ടോയെന്ന കൗതുകമുണര്‍ത്തുന്ന കമന്റ് അനേകം പേരാണ് ചോദിച്ചിരിക്കുന്നത്.
