ആപ്പിള്‍ എയര്‍ടാഗിന് എതിരാളിയായി സാംസങ് അവതരിപ്പിച്ച ട്രാക്കിങ് ഡിവൈസ് ഗാലക്സി സ്മാര്‍ട് ടാഗിന്റെ രണ്ടാമത്തെ പതിപ്പുമായി എത്തിയിരിക്കുകയാണ് കമ്പനി. ഗാലക്സി സ്മാര്‍ട് ടാഗ് 2 ഒക്ടോബര്‍ 11ന് ആഗോളവിപണിയിലെത്തും. ഇത്തവണ കൂടുതല്‍ ട്രാക്കിങ് സവിശേഷതകളും ദൈര്‍ഘ്യമേറിയ ബാറ്ററി ലൈഫുമായാണ് കുഞ്ഞന്‍ ടാഗ് എത്തിയിരിക്കുന്നത്. ഇതിലെ ലോസ്റ്റ് മോഡ് ഉപയോഗിച്ച് ഉപഭോക്താവിന് അയാളുടെ കോണ്‍ടാക്റ്റ് വിവരങ്ങള്‍ ഒരു ടെക്സ്റ്റ് സന്ദേശത്തിന്റെ സഹായത്തോടെ ടാഗില്‍ ചേര്‍ക്കാന്‍ സാധിക്കും. നമ്മള്‍ ടാഗ് ഇട്ടുവെച്ചിട്ടുള്ള വസ്തുവോ, വളര്‍ത്തു മൃഗമോ എവിടെയെങ്കിലും നഷ്ടമായാല്‍, അവ മറ്റാര്‍ക്കെങ്കിലും കണ്ടുകിട്ടുകയാണെങ്കില്‍ അയാള്‍ക്ക് അവരുടെ എന്‍.എഫ്.സി സംവിധാനമുള്ള സ്മാര്‍ട്ഫോണ്‍ ഉപയോഗിച്ച് ടാഗ് സ്‌കാന്‍ ചെയ്ത് ഉടമയുടെ വിവരങ്ങള്‍ എളുപ്പം കണ്ടെത്താവുന്നതാണ്. എന്‍.എഫ്.സി സംവിധാനമുള്ള ഏത് സ്മാര്‍ട്ഫോണിലും എന്‍.എഫ്.സി റീഡറിലും, വെബ് ബ്രൗസറിലും ഇത് പ്രവര്‍ത്തിക്കും. പവര്‍ സേവിങ് മോഡില്‍ ടാഗിലെ ബാറ്ററി ദൈര്‍ഘ്യം 700 ദിവസമാണ്. സാധാരണ മോഡില്‍ 500 ദിവസം ചാര്‍ജ് ലഭിക്കും. ഐപി 67 റേറ്റിങ്ങോടുകൂടിയാണ് ഇത് അവതരിപ്പിച്ചിരിക്കുന്നത്. വെള്ളത്തില്‍ വീണാലും കാര്യമായ കേടുപാട് സംഭവിക്കില്ല. കൂടുതല്‍ മെച്ചപ്പെട്ട കോമ്പസ് വ്യൂ ഫീച്ചറാണ് മറ്റൊരു പ്രത്യേകത. ഈ സംവിധാനത്തിലൂടെ ആരോകളുടെ സഹായത്തോടെ നഷ്ടമായ വസ്തുക്കള്‍ എളുപ്പം കണ്ടെത്താം. യുഡബ്ല്യുബി പിന്തുണയ്ക്കുന്ന ഗാലക്സി ഫോണുകളിലാണ് ഈ സൗകര്യം ലഭിക്കുക. സ്മാര്‍ട് തിങ്സ് ഫൈന്‍ഡ് ആപ്പിലും സാംസങ് അപ്ഡേറ്റുകള്‍ കൊണ്ടുവന്നിട്ടുണ്ട്.