നായക്കു രണ്ടര കോടി ഫോളോവേഴ്സ്

രണ്ടര കോടി ഫോളോവേഴ്സുള്ള നായ. ഏതു നായക്കും ഒരു ദിവസമുണ്ടെന്ന് പറയാറുണ്ട്. വെറുമൊരു നായയെക്കൊണ്ട് ജീവിതം ആഘോഷമാക്കാമെന്നു മാലോകര്‍ക്കു തെളിയിച്ച മുപ്പത്തൊന്നുകാരി കോര്‍ട്ട്‌നി ബഡ്‌സിനെ നമുക്കു കാണാം. കോര്‍ട്ടിനി ക്ലീനിംഗ് ജോലിക്കാരിയായിരുന്നു. ഭര്‍ത്താവ് മൈക്ക് സിവില്‍ എന്‍ജിനീയറായിരുന്നു. കോര്‍ട്നിക്ക് ഒരു നായ്ക്കുട്ടിയുണ്ട്. അഞ്ചു വയസുള്ള ഗോള്‍ഡന്‍ റിട്രീവര്‍. ‘ടക്കര്‍’ എന്നാണു പേര്. ഈ നായ ഒരു വര്‍ഷം സമ്പാദിക്കുന്നത് എട്ടു കോടി രുപയാണ്. എങ്ങനെയാണെന്നോ? സാമൂഹ്യമാധ്യമങ്ങളിലൂടെയുള്ള അനേകം അഭ്യാസങ്ങളാണ് വരുമാന മാര്‍ഗം. മൂന്നു വര്‍ഷമായി സോഷ്യല്‍ മീഡിയയില്‍ സ്പോണ്‍സര്‍ ചെയ്ത പരസ്യങ്ങളിലൂടെ ലക്ഷങ്ങള്‍ സമ്പാദിച്ചിരുന്നു. നായയിലൂടെ കൂടുതല്‍ സമ്പാദ്യം വന്നതോടെ നായയെ കൂടുതല്‍ പരിചരിക്കാനും കൂടുതല്‍ പരിശീലിപ്പിക്കാനും മികച്ച വീഡിയോകള്‍ തയാറാക്കാനും തുടങ്ങി. ഇതിനായി ആ ദമ്പതികള്‍ ഇരുവരും ജോലി രാജിവച്ചു. 2018 ജൂണില്‍ എട്ട് ആഴ്ച പ്രായമുള്ളപ്പോഴാണ് ടക്കറിനായി കോര്‍ട്ട്‌നി ഒരു ഇന്‍സ്റ്റഗ്രാം അക്കൗണ്ട് ആരംഭിച്ചത്. ഒരു മാസത്തിനകം ടക്കറിന്റെ ഒരു വീഡിയോ വൈറലായി. ടക്കര്‍ ഐസ് ക്യൂബുമായി കളിക്കുന്നതായിരുന്നു ആ വീഡിയോ. ആറു മാസത്തിനകം അവന്റെ ഫോളോവേഴ്സ് 60,000 കടന്നു. ഇപ്പോള്‍ രണ്ടര കോടി ഫോളോവേഴ്സ് ടക്കറിനുണ്ട്. ടക്കര്‍ എന്ന ഗോള്‍ഡന്‍ റിട്രീവര്‍ നായയുടെ അഭ്യാസ വീഡിയോകളിലൂടെ കോടീശ്വരിയായ കോര്‍ട്നി ബഡ്സിന് ഈ നായ ശരിക്കും ഗോള്‍ഡന്‍ റിട്രീവര്‍ തന്നെ. സ്വര്‍ണം വീണ്ടെടുക്കുന്നവന്‍.