തൃശൂർ കേച്ചേരിയിൽ ഓടിക്കൊണ്ടിരുന്ന ബസിന് തീപിടിച്ചു. കുന്നംകുളത്ത് നിന്ന് തൃശൂരിലേക്ക് യാത്രക്കാരുമായി പോകുകയായിരുന്ന സ്വകാര്യ ബസിനാണ് തീപിടിച്ചത്. തിങ്കളാഴ്ച വൈകീട്ട് 5 മണിയോടെയായിരുന്നു സംഭവം. ജയ്ഗുരു എന്ന ബസിനാണ് തീപിടിച്ചത്.
കേച്ചേരി സെന്ററിന് സമീപമെത്തിയപ്പോൾ ബസിന്റെ മുൻവശത്ത് നിന്നും പുക ഉയരുകയായിരുന്നു. ഉടൻ തന്നെ ബസിൽ നിന്ന് യാത്രക്കാരെ പുറത്തിറക്കി. ഇതിന് പിന്നാലെ തന്നെ ബസിന്റെ ഒരുഭാഗത്ത് നിന്നും തീ ആളിപ്പടരാൻ തുടങ്ങി. കുന്നംകുളത്ത് നിന്നെത്തിയ അഗ്നിരക്ഷാ സേനയും നാട്ടുകാരും ചേർന്ന് അതിവേഗം തീയണച്ചു.
അപകടത്തെ തുടർന്ന് നഗരത്തിൽ അരമണിക്കൂറിലേറെ ഗതാഗതം തടസപ്പെട്ടു. തീ നിയന്ത്രണവിധേയമാക്കിയതിന് പിന്നാലെയാണ് ഗതാഗതം പുനഃസ്ഥാപിച്ചത്.