ബ്രസീലിനെ കണ്ണീരിലാഴ്ത്തിയ ഷൂട്ടൗട്ട്. ബ്രസീലിനെ ഷൂട്ടൗട്ടില്‍ 4-2 ന് വീഴ്ത്തിയ ക്രൊയേഷ്യ സെമിയില്‍. എക്‌സ്ട്രാ ടൈം അവസാനിക്കാന്‍ മൂന്ന് മിനിറ്റ് മാത്രം ബാക്കിയുള്ളപ്പോള്‍ നെയ്മര്‍ നേടിയ ഗോളിലൂടെ വിജയമുറപ്പിച്ച ബ്രസീലിനെതിരെ സമനില ഗോള്‍ നേടി മത്സരം ഷൂട്ടൗട്ടിലേക്ക് തള്ളിവിട്ടാണ് ക്രൊയേഷ്യ ബ്രസീലില്‍ നിന്ന് വിജയം തട്ടിയെടുത്തത്. ആദ്യപകുതിയുടെ തുടക്കത്തില്‍ ബ്രസീലിനെ വിറപ്പിക്കുന്ന പ്രകടനവുമായി കളംനിറഞ്ഞത് ക്രൊയേഷ്യയായിരുന്നു. പിന്നീട് പന്തടക്കത്തിലും ആക്രമണത്തിലും ഏറെ മുന്നിലായിരുന്ന ബ്രസീലിന് നിരവധി ഗോളവസരങ്ങള്‍ ലഭിച്ചിട്ടും നിശ്ചിത സമയത്ത് ഗോളടിക്കാനായില്ല. എക്‌സ്ട്രാ ടൈമിലേക്ക് നീണ്ട മത്സരത്തിന്റെ ആദ്യ പകുതിയില്‍ സാക്ഷാല്‍ സുല്‍ത്താന്‍ നെയ്മര്‍ ക്രൊയേഷ്യന്‍ പ്രതിരോധം തകര്‍ത്ത് പോസ്റ്റിലേക്ക് നിറയൊഴിച്ച് വലകുലുക്കി. മത്സരം അവസാനിക്കാന്‍ മിനിറ്റുകള്‍ മാത്രം ബാക്കി നില്‍ക്കേ വിജയാഘോഷം തുടങ്ങിയ ബ്രസീല്‍ ആരാധകരെ ഞെട്ടിച്ചുകൊണ്ട് ക്രൊയേഷ്യയുടെ ബ്രൂണോ പെറ്റ്കോവിച്ചിന്റെ ഗോളിലൂടെ മത്സരം സമനിലയിലായി. ഷൂട്ടൗട്ടില്‍ ക്രൊയേഷ്യ നാല് കിക്കുകളു ഗോളാക്കി മാറ്റിയപ്പോള്‍ ബ്രസീലിന് രണ്ട് കിക്കുകള്‍ മാത്രമേ ഗോളാക്കാന്‍ സാധിച്ചുള്ളു. ആദ്യ കിക്ക് ക്രൊയേഷ്യന്‍ ഗോളി തട്ടിയകറ്റിയപ്പോള്‍ നാലാമത്തെ കിക്ക് പോസ്റ്റില്‍ തട്ടി പുറത്തേക്ക് തെറിച്ചു. അതോടെ ആരാധക ലക്ഷങ്ങളുടെ നെഞ്ചകം തകര്‍ത്ത് ബ്രസീല്‍ ലോകകപ്പില്‍ നിന്ന് പുറത്തായി. ക്രൊയേഷ്യ സെമിയിലേക്കും
