മ്യൂച്വല്‍ ഫണ്ടുകളുടെ ആസ്തി മൂല്യം 50 ലക്ഷം കോടി രൂപയിലേക്ക്

ദീര്‍ഘനാളത്തെ ഇടവേളയ്‌ക്കൊടുവില്‍ രാജ്യത്ത് മ്യൂച്വല്‍ ഫണ്ടുകള്‍ക്ക് പ്രിയമേറുന്നു. ഉയര്‍ന്ന ലാഭം പ്രതീക്ഷിച്ച്, നിരവധി ആളുകളാണ് ചുരുങ്ങിയ കാലയളവിനുളളില്‍ മ്യൂച്വല്‍ ഫണ്ടുകളിലേക്ക് നിക്ഷേപം നടത്തിയത്. ഇതോടെ, രാജ്യത്തെ മ്യൂച്വല്‍ ഫണ്ടുകളുടെ കൈവശമുള്ള ആകെ ആസ്തി മൂല്യം 50 ലക്ഷം കോടി രൂപയിലേക്ക് അടുക്കുകയാണ്. സിസ്റ്റമാറ്റിക് ഇന്‍വെസ്റ്റ്‌മെന്റ് പദ്ധതികള്‍ക്ക് വലിയ ജനപ്രീതി ലഭിച്ചതോടെയാണ് മ്യൂച്വല്‍ ഫണ്ടുകളിലേക്ക് നിക്ഷേപം ഒഴുകിയെത്തിയത്. നവംബറില്‍ മൊത്തം സിസ്റ്റമാറ്റിക് ഇന്‍വെസ്റ്റ്‌മെന്റ് നിക്ഷേപകരുടെ എണ്ണം 7.44 കോടി രൂപയില്‍ എത്തി. നിലവിലെ കണക്കനുസരിച്ച്, മ്യൂച്വല്‍ ഫണ്ടുകള്‍ കൈകാര്യം ചെയ്യുന്ന ആകെ ആസ്തി 49.04 ലക്ഷം കോടി രൂപയാണ്. ഈ വര്‍ഷം അവസാനിക്കാറാകുമ്പോഴേക്കും, 50 ലക്ഷം കോടി എന്ന നേട്ടം കൈവരിക്കുന്നതാണ്. തുടര്‍ച്ചയായ 34-ാം മാസമാണ് മ്യൂച്വല്‍ ഫണ്ടുകളിലേക്ക് അധിക പണമൊഴുക്ക് ദൃശ്യമായിരിക്കുന്നത്. പ്രതിമാസം ഏകദേശം 17000 കോടി രൂപയുടെ നിക്ഷേപമാണ് സിസ്റ്റമാറ്റിക് ഇന്‍വെസ്റ്റ്‌മെന്റ് പദ്ധതികളിലേക്ക് എത്തുന്നത്. മ്യൂച്വല്‍ ഫണ്ടുകള്‍ക്ക് കൂടുതല്‍ സ്വീകാര്യത വര്‍ദ്ധിച്ചതിനാല്‍, തെറ്റിദ്ധരിപ്പിക്കുന്ന പരസ്യങ്ങള്‍ ചെയ്യരുതെന്ന് നേരത്തെ തന്നെ കേന്ദ്രം മുന്നറിയിപ്പ് നല്‍കിയിട്ടുണ്ട്.