രാജ്യത്ത് യുപിഐ ലൈറ്റ് മുഖാന്തരം നടത്തുന്ന ഇടപാടുകളുടെ പരിധി വര്‍ദ്ധിപ്പിച്ച് റിസര്‍വ് ബാങ്ക് ഓഫ് ഇന്ത്യ. ഏറ്റവും പുതിയ റിപ്പോര്‍ട്ടുകള്‍ പ്രകാരം, ഉപഭോക്താക്കള്‍ക്ക് ഇനി മുതല്‍ 500 രൂപ വരെ യുപിഐ ലൈറ്റ് വഴി അയക്കാനാകും. പിന്‍ നമ്പര്‍ എന്റര്‍ ചെയ്യാതെയാണ് ഇത്തരത്തില്‍ 500 രൂപ വരെ അയക്കാന്‍ സാധിക്കുക. ഇന്റര്‍നെറ്റ് കണക്ടിവിറ്റി കുറഞ്ഞതോ, ലഭ്യമല്ലാത്തതോ ആയ സ്ഥലങ്ങളില്‍ യുപിഐ ലൈറ്റ് വാലറ്റുകളുടെ ഉപയോഗം പ്രോത്സാഹിപ്പിക്കുന്നതിന്റെ ഭാഗമായാണ് പുതിയ നടപടി. ഒരു ദിവസം പരമാവധി 2000 രൂപയാണ് യുപിഐ ലൈറ്റ് വഴി അയക്കാന്‍ സാധിക്കുക. ഇടപാട് പരിധി ഉയര്‍ത്തിയതോടെ, കുറഞ്ഞ മൂല്യമുള്ള ഇടപാടുകള്‍ക്ക് ടു ഫാക്ടര്‍ വെരിഫിക്കേഷന്റെ ആവശ്യകത ഇല്ലാതെ തന്നെ, എളുപ്പത്തിലും വേഗത്തിലും, ഉപയോക്താക്കള്‍ക്ക് 500 രൂപ വരെയുള്ള ഇടപാടുകള്‍ നടത്താന്‍ കഴിയും. കഴിഞ്ഞ വര്‍ഷം സെപ്റ്റംബറിലാണ് നാഷണല്‍ പേയ്‌മെന്റ്‌സ് കോര്‍പ്പറേഷന്‍ ഓഫ് ഇന്ത്യയും ആര്‍ബിഐയും ചേര്‍ന്ന് യുപിഐ ലൈറ്റ് അവതരിപ്പിച്ചത്.