നേമം കോച്ചിങ്ങ് ടെർമിനൽ നിർമ്മാണം മരവിപ്പിച്ചിരിക്കുകയാണെന്ന് റെയിൽവേ മന്ത്രാലയം. റെയിൽവേ മന്ത്രിയാണ് പദ്ധതി താൽക്കാലികമായി നിർത്തിവച്ച കാര്യം പാർലമെന്റിൽ പറഞ്ഞത് .തിരുവനന്തപുരത്ത് ടെർമിനൽ വേണോ എന്ന് ദക്ഷിണ റെയിൽവേ വിശദമായ പഠനം നടത്തുകയാണെന്നും അദ്ദേഹം വ്യക്തമാക്കി. ഈ പഠനത്തിൻറെ റിപ്പോർട്ട് വന്നശേഷം മാത്രമാകും തുടർ തീരുമാനമെന്ന് കേന്ദ്രമന്ത്രി അറിയിച്ചു. മുൻപ് കേന്ദ്ര റെയിൽവേ മന്ത്രിയുമായി കൂടിക്കാഴ്ച നടത്തിയ കേരളത്തിലെ ബി ജെ പി നേതാക്കൾ പദ്ധതി പൂർത്തിയാക്കും എന്നുറപ്പ് കിട്ടിയതായി അറിയിച്ചിരുന്നു. ഈ ഉറപ്പിലാണ് ഇപ്പോൾ അവ്യക്തത.
അതേസമയം സിൽവർ ലൈൻ പദ്ധതിയുമായി ബന്ധപ്പെട്ട് റെയിൽവേ മന്ത്രാലയം ആവശ്യപ്പെട്ട വിവരങ്ങൾ കെ റെയിൽ കോർപറേഷൻ നൽകിയിട്ടില്ലെന്നാണ് റെയിൽവെ മന്ത്രി പറഞ്ഞത്. സിൽവർ ലൈൻ പദ്ധതിയുടെ അനുമതിക്ക് കാലതാമസം ഉണ്ടാകുമോ എന്ന ചോദ്യത്തിന് റെയിൽവെ മന്ത്രാലയം മറുപടി പറഞ്ഞില്ല. സിപിഎം എംപി എളമരം കരീമിന്റെ ചോദ്യത്തിനായിരുന്നു അശ്വിനി വൈഷ്ണവിന്റെ മറുപടി.