എട്ട് ദിവസത്തില്‍ 13.9 കോടി നേടി ‘സുമതി വളവ്’

മാളികപ്പുറം എന്ന ഹിറ്റ് ചിത്രത്തിന്റെ ടീമിന്റെ ‘സുമതി വളവ്’ എന്ന ചിത്രം മിന്നും പ്രകടനമാണ് കാഴ്ചവയ്ക്കുന്നത്. ഹൊറര്‍ കോമഡി ജോണറില്‍ ഓഗസ്റ്റ് ഒന്നിന് തിയറ്ററുകളില്‍ എത്തിയ ചിത്രം റിലീസ് ചെയ്ത് എട്ട് ദിവസത്തില്‍ നേടിയ കളക്ഷന്‍ വിവരങ്ങള്‍ പുറത്തുവന്നു. 13.9 കോടിയാണ് ഇത്രയും ദിവസത്തെ കളക്ഷന്‍. റിലീസ് ചെയ്ത് രണ്ട് ദിവസത്തില്‍ രണ്ടുദിനം കൊണ്ട് അഞ്ച് കോടിയിലധികം കളക്ഷന്‍ ചിത്രം നേടിയിരുന്നു. നാലാം ദിനം ആയപ്പോഴേക്കും അത് 11.15 കോടി ആകുകയും ചെയ്തു. ബോക്‌സ് ഓഫീസില്‍ സുമതി വളവ് മുന്നേറുമ്പോള്‍ തിയറ്ററുകളുടെ എണ്ണത്തിലും വര്‍ദ്ധനവ് വന്നിട്ടുണ്ട്. 230 തിയറ്ററുകളിലായിരുന്നു സുമതി വളവ് പ്രദര്‍ശിപ്പിച്ചിരുന്നതെങ്കില്‍ കഴിഞ്ഞ ദിവസം മുതലത് 250 തിയറ്ററുകളായി വര്‍ദ്ധിച്ചിട്ടുണ്ട്. വിഷ്ണു ശശി ശങ്കര്‍ സംവിധാനം ചെയ്ത ചിത്രത്തിന് തിരക്കഥ ഒരുക്കിയത് അഭിലാഷ് പിള്ളയാണ്. അര്‍ജുന്‍ അശോകന്‍, ബാലു വര്‍ഗീസ്, ഗോകുല്‍ സുരേഷ്, സൈജു കുറുപ്പ്, സിദ്ധാര്‍ഥ് ഭരതന്‍, ഗോപിക അനില്‍, ശിവദ, സിജ റോസ്, ദേവനന്ദ ചിത്രത്തില്‍ പ്രധാന വേഷങ്ങളില്‍ എത്തിയത്.