നാടന്‍ തല്ലും പ്രണയവും വാശിയും നിറയുന്ന വെടിക്കെട്ട് കാഴ്ചകളുമായി ‘പറന്ന് പറന്ന് പറന്ന് ചെല്ലാന്‍’ ട്രെയിലര്‍. ത്രില്ലിങ്ങായി പറയുന്ന ഫാമിലി ഡ്രാമ ചിത്രം അടിമുടി ഗ്രാമീണ പശ്ചാത്തലത്തിലാണ് ഒരുക്കിയിരിക്കുന്നത്. ഭ്രമയുഗം, സൂക്ഷ്മദര്‍ശിനി എന്നീ ചിത്രങ്ങളുടെ വന്‍വിജയങ്ങള്‍ക്കു ശേഷം സിദ്ധാര്‍ഥ് ഭരതന്‍ കേന്ദ്രകഥാപാത്രത്തെ അവതരിപ്പിക്കുന്ന ചിത്രമാണിത്. കിഷ്‌കിന്ധാകാണ്ഡം, റൈഫിള്‍ ക്ലബ് എന്നീ ചിത്രങ്ങള്‍ക്കു ശേഷം വ്യത്യസ്തമാര്‍ന്ന പ്രകടനവുമായി വിജയരാഘവനും ഈ സിനിമയിലെത്തുന്നു. ഉണ്ണി ലാലു, വിജയരാഘവന്‍, എന്നിവരോടൊപ്പം സജിന്‍ ചെറുകയില്‍, സമൃദ്ധി താര, ശ്രീജ ദാസ്, ശ്രീനാഥ് ബാബു, ദാസന്‍ കൊങ്ങാട്, രതീഷ് കുമാര്‍ രാജന്‍, കലാഭവന്‍ ജോഷി, രാധ ഗോമതി, തങ്കം മോഹന്‍ തുടങ്ങിയവരും ചിത്രത്തില്‍ പ്രധാന വേഷങ്ങളില്‍ എത്തുന്നു. രാംനാഥ്, ജോയ് ജിനിത് എന്നിവരുടെ സംഗീതത്തിന് വരികള്‍ ഒരുക്കുന്നത് ദിന്‍നാഥ് പുത്തഞ്ചേരി, ദീപക് റാം, അരുണ്‍ പ്രതാപ് എന്നിവര്‍ ചേര്‍ന്നാണ്. ഒരു വലിയ ഇടവേളക്ക് ശേഷം മധു അമ്പാട്ട് ക്യാമറ നിര്‍വഹിക്കുന്ന ചിത്രമാണിത്. ജനുവരി 31ന് തിയറ്ററുകളില്‍ എത്തും.