ഉപയോക്താക്കള്ക്ക് കൂടുതല് സുരക്ഷിതത്വം വാഗ്ദാനം ചെയ്യുന്ന ഫീച്ചര് അവതരിപ്പിച്ച് ജനപ്രിയ മെസേജിംഗ് ആപ്ലിക്കേഷനായ വാട്സാപ്പ്. പരിചയമില്ലാത്തൊരാള് വാട്സാപ്പ് ഗ്രൂപ്പിലേക്ക് നിങ്ങളുടെ നമ്പര് ചേര്ക്കുമ്പോള് ഈ ഗ്രൂപ്പുമായി ബന്ധപ്പെട്ട മുന്നറിയിപ്പുകള് നല്കുന്നൊരു ഫീച്ചറാണിത്. ഈ ഗ്രൂപ്പിനെ കുറിച്ചുള്ള പ്രധാന വിവരങ്ങളും സുരക്ഷിതരായി ഇരിക്കാനുള്ള ഉപദേശങ്ങളും അടങ്ങുന്നതാണ് വിവരങ്ങള്. ചാറ്റ് നോക്കാതെ തന്നെ ഈ ഗ്രൂപ്പില് നിന്ന് പുറത്തുകടക്കാന് സാധിക്കും വിധമാണ് വാട്സാപ്പ് ഇതൊരുക്കിയിരിക്കുന്നത്. വാട്സാപ്പ് വഴിയുള്ള തട്ടിപ്പുകള് വര്ധിച്ചതോടെയാണ് ഇത്തരത്തിലൊരു ഫീച്ചര് അവതരിപ്പിക്കാന് മെറ്റ നിര്ബന്ധിതരായത്. ഉപയോക്താവ് ഗ്രൂപ്പില് തുടരാന് തീരുമാനിക്കുന്നതു വരെ നോട്ടിഫിക്കേഷനുകള് ലഭിക്കില്ലെന്നും മെറ്റ വ്യക്തമാക്കിയിട്ടുണ്ട്. ഈ വര്ഷം ജൂണ് വരെ തട്ടിപ്പുമായി ബന്ധമുള്ള 68 ലക്ഷം വാട്സാപ്പ് അക്കൗണ്ടുകള് കണ്ടെത്തി അവയെ നിരോധിച്ചതായി മെറ്റ വ്യക്തമാക്കിയിട്ടുണ്ട്. മറ്റൊരു ഫീച്ചറും വികസിപ്പിക്കുന്നുണ്ട്. ഇതിന്റെ പേരാണ് ‘യൂസര് നെയിം കീകള്’. വാട്സാപ്പില് അപരിചിതര് മെസേജ് അയക്കുന്നത് നിയന്ത്രിക്കുകയാണ് ഇതിന്റെ ലക്ഷ്യം.
