◾തെരുവുനായകളുടെ ആക്രമണത്തില്‍നിന്ന് പൗരന്മാരെ സംരക്ഷിക്കാനുള്ള ബാധ്യത സര്‍ക്കാരിനുണ്ടെന്ന് ഹൈക്കോടതി. പൊതുനിരത്തിലെ അക്രമകാരികളായ നായ്ക്കളെ പിടികൂടി സംരക്ഷണ കേന്ദ്രത്തിലാക്കണം. സര്‍ക്കാര്‍ സ്വീകരിച്ച നടപടികള്‍ നാളെ അറിയിക്കണം. തെരുവ് നായ്ക്കളെ തല്ലിക്കൊന്ന് ജനം നിയമം കൈയിലെടുക്കരുത്. ബോധവത്കരണത്തിനായി പൊലീസ് മേധാവി സര്‍ക്കുലര്‍ പുറപ്പെടുവിക്കണമെന്നും ഹൈക്കോടതി ആവശ്യപ്പെട്ടു. തെരുവുനായ ആക്രമണങ്ങളുടെ പശ്ചാത്തലത്തില്‍ പ്രത്യേക സിറ്റിംഗ് നടത്തിയാണ് ഹൈക്കോടതി ഉത്തരവ്.
◾കെപിസിസി പ്രസിഡന്റായി കെ. സുധാകരന്‍ തുടരാന്‍ സംസ്ഥാനത്തെ കോണ്‍ഗ്രസ് ഗ്രൂപ്പുനേതാക്കള്‍ തമ്മില്‍ ധാരണ. 77 പുതുമുഖങ്ങള്‍ അടക്കമുള്ള 310 അംഗ കെപിസിസി പട്ടികയ്ക്കും അംഗീകാരം നല്‍കി. ഇതില്‍ 285 പേര്‍ ബ്ലോക്ക് പ്രതിനിധികളാണ്. പുതിയ അധ്യക്ഷനെ പ്രഖ്യാപിക്കണമെന്ന് എഐസിസിയോട് ആവശ്യപ്പെടുന്ന ഒറ്റവരി പ്രമേയം കെപിസിസി ജനറല്‍ ബോഡി പാസാക്കും. വൈകാതെ പ്രഖ്യാപനവും ഉണ്ടാകും.
◾
*_KSFE_ GOLD LOAN*
*മനുഷ്യപ്പറ്റുള്ള ഗോള്‍ഡ് ലോണ്‍*
നിങ്ങളുടെ അടിയന്തിര സാമ്പത്തിക ആവശ്യങ്ങള്‍ക്ക് *_KSFE_* നല്‍കുന്നു സ്വര്‍ണ പണയ വായ്പ. മിതമായ പലിശ നിരക്കില്‍ ലളിതമായ നടപടിക്രമങ്ങളിലൂടെ 25 ലക്ഷം രൂപ വരെ പ്രതിദിനം നിങ്ങള്‍ക്ക് നേടാം. 12 മാസത്തെ വായ്പാ കാലയളവില്‍ നിശ്ചിത പലിശ അടച്ചതിന് ശേഷം ഒരു വര്‍ഷത്തേക്ക് വായ്പ പുതുക്കാന്‍ കഴിയും, കൂടാതെ പരമാവധി 36 മാസം വരെ ഈ സൗകര്യം ഉപയോഗിക്കാം. *കൂടുതല്‍ വിവരങ്ങള്‍ക്ക് : www.ksfe.com*
◾പഞ്ചാബിലെ ആംആദ്മി പാര്‍ട്ടിയുടെ 11 എംഎല്‍എമാരെ വിലയ്ക്കെടുക്കാന്‍ ബി.ജെ.പി 25 കോടി രൂപവീതം വാഗ്ദാനം ചെയ്തെന്ന് അരവിന്ദ് കെജരിവാള്‍. ആംആദ്മി പാര്‍ട്ടിയുടെ പരാതിയില്‍ പഞ്ചാബ് പോലീസ് കേസെടുത്തു. ഗോവയില്‍ കോണ്‍ഗ്രസിലെ പതിനൊന്നില്‍ എട്ട് എംഎല്‍എമാര്‍ ഭരണകക്ഷിയായ ബി.ജെ.പിയില്‍ ചേര്‍ന്നതിനു പിറകേയാണ് ഈ ആരോപണവും കേസും.
◾കേന്ദ്ര പൊതുമേഖലാ ബാങ്കായ ഐഡിബിഐ ബാങ്കും സ്വകാര്യവല്‍ക്കരിക്കുന്നു. ലേല നടപടികള്‍ക്കായി നിക്ഷേപകരില്‍നിന്ന് താത്പര്യപത്രം ഉടന്‍ ക്ഷണിക്കുമെന്ന് ഇന്‍വെസ്റ്റ്മെന്റ് ആന്‍ഡ് പബ്ലിക് അസറ്റ് മാനേജ്മെന്റ് വകുപ്പ് സെക്രട്ടറി. ഐഡിബിഐ ബാങ്കില്‍ 45.48 ശതമാനം ഓഹരികളാണ് ഇപ്പോള്‍ കേന്ദ്രസര്‍ക്കാരിന് ഉള്ളത്. 49.24 ശതമാനം ഓഹരികള്‍ എല്‍ഐസിയുടെ കൈയിലാണ്.
◾ആസാദ് കാഷ്മീര്‍ പരാമര്‍ശത്തിനു കെ.ടി. ജലീലിനെതിരേ കേസെടുക്കണമെന്ന ഡല്‍ഹി റോസ് അവന്യൂ കോടതിയിലെ കേസില്‍ നാളെ വിധി പറയും. ജലീലിനെതിരെ കേസെടുക്കണമെന്ന് ഉത്തരവിട്ടെന്നു പ്രചരിപ്പിച്ച പരാതിക്കാന്‍ ജി.എസ് മണി കോടതിയില്‍ മാപ്പു പറഞ്ഞു.
*ജോയ്ആലുക്കാസ് വിശേഷങ്ങള്‍*
ജോയ്ആലുക്കാസിലെ എല്ലാ സ്വര്‍ണാഭരണങ്ങള്‍ക്കും ഇപ്പോള്‍ പണിക്കൂലിയില്‍ വന്‍ ഇളവ്. സ്വര്‍ണം, ഡയമണ്ട്, മറ്റു ജ്വല്ലറി കളക്ഷനുകളെല്ലാം സ്വര്‍ണ വിപണിയിലെ തന്നെ ഏറ്റവും കുറഞ്ഞ പണിക്കൂലിയിലാണ് ലഭ്യമാക്കുന്നത്. ജോയ്ആലുക്കാസില്‍ നിന്ന് പര്‍ച്ചേയ്സ് ചെയ്യുന്ന ആഭരണങ്ങള്‍ക്ക് ഒരു വര്‍ഷത്തേക്ക് സൗജന്യ ഇന്‍ഷുഷറന്‍സും ലൈഫ്ടൈം ഫ്രീ മെയിന്റനന്‍സും ലഭിക്കുന്നതാണ്. ഒപ്പം എക്സ്ചേഞ്ച് ഓഫറും പ്രയോജനപ്പെടുത്താവുന്നതാണ്.
➖
◾ഭാരത് ജോഡോ യാത്രക്കിടെ ഗോവയിലെ എട്ട് എംല്‍എമാര്‍ അടക്കമുള്ള കോണ്‍ഗ്രസ് നേതാക്കള്‍ ബിജെപിയിലേക്കു പോകുന്നതിനെ പരിഹസിച്ച് വിദ്യാഭ്യാസ മന്ത്രി വി ശിവന്‍കുട്ടി. ഒന്ന് നടന്നാല്‍ ഇതാണ് സ്ഥിതിയെങ്കില്‍ എന്ന തലക്കെട്ടോടെയാണ് ശിവന്‍കുട്ടിയുടെ ട്രോള്‍. ഇവിടൊരാള്‍ തെക്കുവടക്ക് നടക്കുന്നു, അവിടെ കൂട്ടത്തോടെ മറുചേരിയിലേക്ക് ഓടുന്നുവെന്നാണ് ശിവന്‍കുട്ടി കുറിച്ചത്.
◾വ്യക്തികളും രാജ്യങ്ങളും ഒന്നാം സ്ഥാനത്ത് എത്തുകയല്ല സമാധാനത്തോടെയും സന്തോഷത്തോടെയും ജീവിക്കുകയാണ് പ്രധാനമെന്ന് രാഹുല്‍ഗാന്ധി. അമേരിക്ക പോലുള്ള രാജ്യങ്ങള്‍ പല കാര്യങ്ങളിലുമെന്ന പോലെ ജയില്‍പുള്ളികളുടെ അനുപാതത്തിലും വെടിവയ്പിലും ഒന്നാം സ്ഥാനത്താണ്. പല കാര്യങ്ങളിലും ഇന്ത്യ പിന്നാക്കമാണെങ്കിലും വിവിധതലങ്ങളില്‍ ഒന്നാമതാണെന്നും അദ്ദേഹം പറഞ്ഞു. ഭാരത് ജോഡോ യാത്രയുമായി കൊല്ലത്ത് എത്തിയ രാഹുല്‍ വിദ്യാര്‍ത്ഥികളുമായി സംവദിക്കുകയായിരുന്നു.
◾ഗള്‍ഫ് രാജ്യങ്ങളും ദുബായ് നഗരവും പടുത്തുയര്‍ത്തിയത് കേരള ജനതയാണെന്ന് രാഹുല്‍ ഗാന്ധി. കോണ്‍ഗ്രസിന്റെ ദര്‍ശനങ്ങള്‍ക്കു പിന്തുണ നല്‍കുന്ന സംസ്ഥാനമാണു കേരളമെന്നും അദ്ദേഹം പറഞ്ഞു. ഭാരത് ജോഡോ യാത്രയുടെ ഭാഗമായുള്ള സമ്മേളനത്തില്‍ പ്രസംഗിക്കുകയായിരുന്നു അദ്ദേഹം.
◾വിഴിഞ്ഞം തുറമുഖ നിര്‍മാണത്തിന് പോലീസ് സുരക്ഷ ലഭിക്കുന്നില്ലെന്ന് ആരോപിച്ച് സര്‍ക്കാരിനെതിരെ കോടതിയലക്ഷ്യ ഹര്‍ജിയുമായി അദാനി ഗ്രൂപ്പ് ഹൈക്കോടതിയില്‍. സമരക്കാരെ പോലീസ് തടയാത്തതിനാല്‍ തുറമുഖ നിര്‍മ്മാണം നിലച്ചെന്നും കോടതിയലക്ഷ്യ ഹര്‍ജിയില്‍ അദാനി ഗ്രൂപ്പ് ആരോപിക്കുന്നു.
◾തീരദേശ പരിപാലന ചട്ടം ലംഘിച്ച ആലപ്പുഴയിലെ കാപ്പിക്കോ റിസോര്‍ട്ട് ഇന്നു പൊളിച്ചുനീക്കും. റിസോര്‍ട്ട് കയ്യേറിയ മൂന്നു ഹെക്ടറോളം ഭൂമി ജില്ലഭരണകൂടം തിരിച്ച് പിടിച്ചിരുന്നു. പൊളിക്കുന്ന അവശിഷ്ടങ്ങള്‍ പരിസ്ഥിതിക്ക് ദോഷകരമല്ലാത്ത രീതിയില്‍ ആറു മാസത്തിനകം നീക്കം ചെയ്യും. ആലപ്പുഴ നെടിയംത്തുരുത്തില്‍ വേമ്പനാട്ടുകായലിന്റെ തീരത്താണ് കാപ്പിക്കോ റിസോര്‍ട്ട്. മത്സ്യത്തൊഴിലാളികള്‍ നടത്തിയ നിയമയുദ്ധത്തിനൊടുവില്‍ കെട്ടിടം പൊളിക്കണമെന്ന് 2013 ല്‍ ഹൈക്കോടതി ഉത്തരവിടുകയും 2020 ല്‍ സുപ്രീംകോടതി ഈ വിധി ശരിവയ്ക്കുകയും ചെയ്തിരുന്നു.
◾ശബരിമല മണ്ഡല – മകരവിളക്ക് തീര്‍ത്ഥാടനത്തിനു പരമാവധി ഭക്തര്‍ക്ക് ദര്‍ശന സൗകര്യം നല്‍കാന്‍ തീരുമാനം. കോവിഡ് കാലത്ത് ശബരിമലയില്‍ ഏര്‍പ്പെടുത്തിയ നിയന്ത്രണങ്ങള്‍ തുടരില്ല. പഴയ നിലയില്‍ തീര്‍ത്ഥാടകള്‍ക്ക് പ്രവേശനം അനുവദിക്കാന്‍ ദേവസ്വം മന്ത്രി കെ.രാധാകൃഷ്ണന്‍ വിളിച്ച യോഗത്തില്‍ തീരുമാനിച്ചു.
◾കോഴ വാങ്ങി ഡിവൈഎഫ്ഐ നേതാവിന് നിയമനം നല്‍കി ഉദ്യോഗാര്‍ത്ഥികളെ വഞ്ചിച്ചു എന്നാരോപിച്ച് കോണ്‍ഗ്രസ് ഭരിക്കുന്ന കണ്ണൂര്‍ പുന്നാട് സര്‍വീസ് സഹകരണ ബാങ്കിന് മുന്നില്‍ യൂത്ത് കോണ്‍ഗ്രസ് ധര്‍ണ. കണ്ണൂര്‍ ഡി സി സി സെക്രട്ടറി പി.കെ ജനാര്‍ദ്ദനനാണ് ബാങ്ക് പ്രസിഡന്റ്. യൂത്ത് കോണ്‍ഗ്രസ് പേരാവൂര്‍ നിയോജക മണ്ഡലം കമ്മറ്റിയുടെ നേതൃത്വത്തിലായിരുന്നു സമരം.
◾കോഴിക്കോട് വടകരയില്‍ സ്വര്‍ണ്ണക്കടത്ത് സംഘത്തിന്റെ ഭീഷണിയെത്തുടര്‍ന്ന് യുവാവിനു പൊലീസ് സുരക്ഷ. ചോറോട് സ്വദേശി ജസീലിനാണ് പൊലീസ് സുരക്ഷ ഏര്‍പ്പെടുത്തിയത്. കഴിഞ്ഞ മാസം 11 ന് വിദേശത്തുനിന്നു വന്ന ജസീല്‍ സ്വര്‍ണ്ണക്കടത്ത് സംഘം കൊടുത്തു വിട്ട സ്വര്‍ണം കൈമാറിയില്ല. സ്വര്‍ണക്കടത്തു സംഘം വീട്ടിലെത്തി ബന്ധുക്കളെ ഭീഷണിപ്പെടുത്തി. ഇതിനിടെ 450 ഗ്രാം സ്വര്‍ണവുമായി ഇയാള്‍ കണ്ണൂര്‍ വിമാനത്താവളത്തില്‍ പിടിയിലായി. തുടര്‍ന്ന് ജാമ്യത്തിലിറങ്ങിയ ഇയാള്‍ക്കെതിരേ ഭീഷണി തുടരുന്നതിനാലാണ് പൊലീസ് സുരക്ഷ ഏര്‍പ്പെടുത്തിയത്.
◾തലയെടുപ്പുള്ള ആനയായ തെച്ചിക്കോട്ടുകാവ് രാമചന്ദ്രനെ പൊതുസ്ഥലത്ത് എഴുന്നള്ളിക്കുന്നത് ഹൈക്കോടതി വിലക്കി. അസിസ്റ്റന്റ് ഫോറസ്റ്റ് കണ്‍സര്‍വേറ്ററുടെ റിപ്പോര്‍ട്ട് പ്രകാരമാണ് ഇടക്കാല ഉത്തരവിറക്കിയത്. മൃഗങ്ങളോടുള്ള ക്രൂരത തടയുന്നതിനായി പ്രവര്‍ത്തിക്കുന്ന ഇടുക്കി കേന്ദ്രമായ സൊസൈറ്റിയാണ് കോടതിയെ സമീപിച്ചത്.
◾തെരുവ് നായ ശല്യത്തിനെതിരെ കണ്ണൂര്‍ കളക്ടറേറ്റിനു മുന്നിലെ മരത്തില്‍ ചങ്ങലയില്‍ ബന്ധിതനായി സമരം. സുരേന്ദ്രന്‍ കുക്കാനത്തില്‍ എന്നയാളാണ് ഒറ്റയാള്‍ പ്രതിഷേധം നടത്തിയത്.
◾ഹരിപ്പാട് വിവാഹസദ്യക്കിടയില്‍ പപ്പടത്തിന്റെ പേരിലുണ്ടായ കൂട്ടത്തല്ലിന്റെ വീഡിയോ ട്വിറ്ററില്‍ പങ്കുവച്ച് മഹീന്ദ്ര ആന്‍ഡ് മഹീന്ദ്രയുടെ ചെയര്‍മാന്‍ ആനന്ദ് മഹീന്ദ്ര. പപ്പടത്തിനു വേണ്ടിയുള്ള ഈ അടിപിടിക്ക് പേരിടൂവെന്ന് ആവശ്യപ്പെട്ടുകൊണ്ടാണ് അദ്ദേഹം വീഡിയോ പങ്കുവച്ചത്.
◾തിരുവനന്തപുരം തൈക്കാടുള്ള എസ്ബിഐയുടെ അഞ്ചു നില കെട്ടിടത്തിനു മുകളില്‍നിന്നു ചാടി യുവാവ് ജീവനൊടുക്കി. എസ്ബിഐയിലെ ഹൗസിംഗ് ലോണ്‍ വിഭാഗം കൈകാര്യം ചെയ്യുന്ന ഏജന്‍സിയിലെ ജീവനക്കാരനായ മാര്‍ത്താണ്ടം സ്വദേശി ആദര്‍ശാണ് മരിച്ചത്.
◾ആലപ്പുഴയില്‍നിന്നു കാണാതായ സഹോദരങ്ങളായ കുട്ടികളില്‍ ഒരാള്‍ വീട്ടില്‍ തിരിച്ചെത്തി. പതിമൂന്നുകാരനായ അക്ഷയാണ് തിരിച്ച് വന്നത്. കാണാതായ സഹോദരിയും പതിനഞ്ചുകാരിയുമായ അഞ്ജനയെ പോലീസ് തെരയുന്നു. അഞ്ജന തമ്പാനൂര്‍ റെയില്‍വെ സ്റ്റേഷനില്‍ നില്‍ക്കുന്ന ദൃശ്യങ്ങള്‍ പൊലീസിനു ലഭിച്ചിട്ടുണ്ട്. ആലപ്പുഴ ചെറായി അയ്യംമ്പിള്ളി വിബിഷിന്റെ മക്കളാണ് അഞ്ജനയും അക്ഷയും.
◾മുണ്ടക്കയം ബിവറേജില്‍ നിന്നു മദ്യം മോഷ്ടിച്ച കേസില്‍ രണ്ടു യുവാക്കള്‍ അറസ്റ്റില്‍. ഇടുക്കി കരുണാപുരം സ്വദേശി കല്ലോലിയില്‍ ബിജു ചാക്കോ, ഇടുക്കി അന്യാര്‍തൊളു സ്വദേശി സജി കെ.എസ് എന്നിവരാണ് പിടിയിലായത്.
◾തെരുവു വിളക്കുകളിലെ ബാറ്ററി മോഷ്ടിച്ചു കടത്താന്‍ ശ്രമിച്ച മൂന്നംഗ സംഘം കോട്ടയം പാലായില്‍ അറസ്റ്റില്‍. പ്രതികളില്‍ രണ്ടു പേര്‍ സഹോദരന്‍മാരാണ്. പോത്താനിക്കാട് പല്ലാരിമംഗംല സ്വദേശികളായ പ്ലാംതടത്തില്‍ വിഷ്ണു ആനന്ദ്, സഹോദരന്‍ ജിഷ്ണു ആനന്ദ്, ആലക്കോട്ടില്‍ ബാദുഷ എന്നിവരാണ് അറസ്റ്റിലായത്. എല്ലാവരും 20 വയസുകാരാണ്.
◾ഇരിങ്ങാലക്കുടയില്‍ ലിമിറ്റഡ് സ്റ്റോപ്പ് ബസ് നിരവധി വാഹനങ്ങളില്‍ ഇടിച്ച് അപകടം. സുമംഗലി എന്ന ലിമിറ്റഡ് സ്റ്റോപ്പ് ബസ് ഹംമ്പ് ചാടിയതിനു പിറകേ, മുന്നിലുണ്ടായിരുന്ന സ്‌കൂട്ടറിലും ട്രാവലറിലും അടക്കം അഞ്ചോളം വാഹനങ്ങളില്‍ ഇടിച്ചു. മൂന്നു പേര്‍ക്കു പരിക്കേറ്റു.
◾ജാറം കമ്മിറ്റി ഓഫിസുകളിലും മദ്രസകളിലും മോഷണം നടത്തിയ വയനാട് അമ്പലവയല്‍ തെമ്മിനി മല സ്വദേശി ഷംസാദിനെ (34) പോലീസ് അറസ്റ്റു ചെയ്തു. മോഷ്ടിച്ച തുകയിലെ ഒരു ഭാഗം അനാഥാലയങ്ങള്‍ക്ക് സംഭാവന ചെയ്തെന്നാണ് പ്രതി പോലീസിനോടു പറഞ്ഞത്.
◾ക്രെയിന്‍ ബെല്‍റ്റ് തകര്‍ന്ന് ഖലാസി മരിച്ചു. കണ്ണൂര്‍ കുപ്പം സ്‌കൂളിന് സമീപത്തെ കണ്ണൂക്കാരന്‍ വീട്ടില്‍ ഫൈസല്‍ (36) ആണ് മരിച്ചത്. ഏഴുംവയലിലെ പ്ലൈവുഡ് ഫാക്ടറിയിലേക്കു കൊണ്ടുവന്ന മെഷീന്‍ ഇറക്കുന്നതിനിടയിലാണ് അപകടം.
◾വാറണ്ടുമായി വീട്ടിലെത്തിയ പ്രതിയുടെ വീട്ടിലെ ആട്ടിന്‍കൂടിനു സമീപത്തുനിന്ന് കഞ്ചാവ് പിടികൂടി. 14 കഞ്ചാവു കേസുകളില്‍ പ്രതിയായ സെയ്ദു മുഹമ്മദിനെ പോലീസ് പിടികൂടി.
◾എറണാകുളം തൃപ്പൂണിത്തുറ എരൂരില്‍ തെരുവ് നായകളെ കൊന്നതിനു കേസെടുത്ത് റിപ്പോര്‍ട്ട് നല്‍കാന്‍ ഹൈക്കോടതി ഉത്തരവ്. സംസ്ഥാന പൊലീസ് മേധാവിക്കാണ് ഡിവിഷന്‍ ബെഞ്ച് നിര്‍ദ്ദേശം നല്‍കിയത്.
◾യുവതി ക്വാറിക്കുളത്തില്‍ മരിച്ച നിലയില്‍. വയനാട് അമ്പലവയല്‍ ചീങ്ങേരി കോളനിയിലെ പാത്തിവയല്‍ വീട്ടില്‍ രാജന്റെ മകള്‍ പ്രവീണ (21) യാണ് മരിച്ചത്.
◾നിലമ്പൂരില്‍ കുടുംബവഴക്കിനെത്തുടര്‍ന്ന് ഭാര്യയെ മര്‍ദ്ദിച്ച് കൊന്ന ഭര്‍ത്താവ് പിടിയില്‍. ഉപ്പട മലച്ചി ആദിവാസി കോളനിയിലെ രമണിയാണ് കൊല്ലപ്പെട്ടത്. ഭര്‍ത്താവ് സുരേഷിനെ പൊലീസ് അറസ്റ്റ് ചെയ്തു.
◾മസ്‌കറ്റില്‍നിന്ന് കൊച്ചിയിലേക്കുള്ള എയര്‍ ഇന്ത്യ എക്സ്പ്രസ് വിമാനത്തില്‍ പുക. യാത്രക്കാരെ പുറത്തിറക്കി. വിമാനം ടേക്ക് ഓഫ് ചെയ്യുന്നതിന് തൊട്ടുമുമ്പാണ് ഇടത് വശത്തെ ചിറകില്‍ നിന്നും പുക ഉയര്‍ന്നത്. യാത്രക്കാരെ രാത്രിയാണ് കൊച്ചിയിലെത്തിച്ചത്.
◾ഇന്‍സ്റ്റിറ്റ്യൂട്ട് ഓഫ് ബാങ്കിംഗ് പേഴ്സണല്‍ സെലക്ഷന്‍ ആര്‍ആര്‍ബി പിഒ പ്രിലിമിനറി ഫലം പ്രസിദ്ധീകരിച്ചു.
◾പൈലറ്റുമാര്‍ക്കും കാബിന്‍ ക്രൂവിനും നിര്‍ബന്ധിത ബ്രീത്ത് അനലൈസര്‍ പരിശോധന അടുത്ത മാസം 15 ന് പുനരാരംഭിക്കും. ഡയറക്ടറേറ്റ് ജനറല്‍ ഓഫ് സിവില്‍ ഏവിയേഷനാണ് ഇങ്ങനെ നിര്‍ദേശം നല്‍കിയത്. കൊവിഡ് വ്യാപനം രൂക്ഷമായതോടെയാണ് പരിശോധനകള്‍ നിര്‍ത്തിവച്ചത്.
◾കുവൈറ്റില്‍ തൊഴില്‍ തട്ടിപ്പിനിരയായ തമിഴ്നാട് സ്വദേശി രക്ഷപ്പെടാന്‍ ശ്രമിക്കുന്നതിനിടെ തൊഴിലുടമയായ അറബി വെടിവച്ച് കൊന്നു. തമിഴ്നാട് തിരുവാവൂര്‍ സ്വദേശി മുത്തുകുമാരനാണ് കൊല്ലപ്പെട്ടത്. ക്യാഷ്യറുടെ ജോലി വാഗ്ദാനം ചെയ്താണ് ഇയാളെ കുവൈറ്റിലെത്തിച്ചത്. ആടുമേയ്ക്കുന്ന ജോലിയാണു നല്‍കിയത്. ആ ജോലിചെയ്യാന്‍ വിസമ്മതിച്ചതോടെ മര്‍ദിച്ചശേഷം വെടിവച്ചു കൊല്ലുകയായിരുന്നു.
◾ഗോവയില്‍ ബിജെപിയിലേക്ക് കൂറുമാറിയ കോണ്‍ഗ്രസ് എം.എല്‍.എമാര്‍ ദുഷ്ടരും ജനവഞ്ചകരുമാണെന്ന് കോണ്‍ഗ്രസിന്റെ ഗോവയിലെ സഖ്യകക്ഷിയായ ഗോവ ഫോര്‍വേഡ് പാര്‍ട്ടി. മുന്‍ മുഖ്യമന്ത്രി ദിഗംബര്‍ കാമത്ത് അടക്കം എട്ട് എംഎല്‍എമാര്‍ ബിജെപിയില്‍ ചേര്‍ന്നതിനു പിറകേയാണ് പ്രതികരണം.
◾ഉത്തര്‍പ്രദേശില്‍ രാഹുല്‍ ഗാന്ധിയുടെ ഭാരത് ജോഡോ യാത്ര അഞ്ചു ദിവസമാണെന്ന് കോണ്‍ഗ്രസ്. യുപിയില്‍ രണ്ടു ദിവസം മാത്രമേ യാത്രയുള്ളൂവെന്ന് സിപിഎം വിമര്‍ശിച്ചിരുന്നു.
◾അഹമ്മദാബാദില്‍ നിര്‍മ്മാണത്തിലിരിക്കുന്ന കെട്ടിടത്തിലെ ലിഫ്റ്റ് തകര്‍ന്ന് ഏഴു തൊഴിലാളികള്‍ മരിച്ചു. ഒരാളെ പരിക്കുകളോടെ ആശുപത്രിയില്‍ പ്രവേശിപ്പിച്ചു. താല്‍ക്കാലിക ലിഫ്റ്റ് ഏഴാം നിലയില്‍നിന്ന് താഴേക്കു പതിക്കുകയായിരുന്നു.
◾ഒരു തൃണമൂല്‍ കോണ്‍ഗ്രസ് പ്രവര്‍ത്തകനെ ആക്രമിച്ചാല്‍ രണ്ടു ബിജെപി പ്രവര്‍ത്തകരെ തരിച്ചാക്രമിക്കുമെന്ന് പശ്ചിമബംഗാള്‍ മന്ത്രി ഉദയന്‍ ഗുഹ. നമ്മള്‍ കൈകളില്‍ വളയിട്ട് ഇരിക്കുകയല്ലെന്നും അദ്ദേഹം പറഞ്ഞു. കൊല്‍ക്കത്തയിലും ഹൗറയിലും ബിജെപി പ്രകടനങ്ങള്‍ അക്രമാസക്തമായതിനു പിറകേ, തൃണമൂല്‍ കോണ്‍ഗ്രസ് നടത്തിയ സമ്മേളനത്തിലാണ് മന്ത്രിയുടെ വെല്ലുവിളി.
◾കാഷ്മീരിലെ നൗഗാം പോലീസ് സ്റ്റേഷന്‍ പരിധിയില്‍ സുരക്ഷാ സേന രണ്ട് തീവ്രവാദികളെ കൊലപ്പെടുത്തി.
◾ബ്രിട്ടനിലെ എലിസബത്ത് രാജ്ഞിയുടെ സംസ്‌കാരചടങ്ങില്‍ ഇന്ത്യന്‍ രാഷ്ട്രപതി ദ്രൗപദി മുര്‍മു പങ്കെടുക്കും. 500 ലോകനേതാക്കളാണ് ചടങ്ങില്‍ പങ്കെടുക്കുക. തിങ്കളാഴ്ച ലണ്ടന്‍ വെസ്റ്റ്മിനിസ്റ്റര്‍ ആബിയിലാണ് സംസ്‌കാരചടങ്ങ്. ഈ മാസം 17 മുതല്‍ 19 വരെയാണ് രാഷ്ട്രപതിയുടെ ലണ്ടന്‍ സന്ദര്‍ശനം.
◾യുക്രൈന്‍ യുദ്ധത്തില്‍ റഷ്യന്‍ പ്രസിഡന്റ് നുണ പറയുകയാണെന്ന് വൈറ്റ് ഹൗസ്. യുദ്ധം ഏഴാം മാസത്തിലേക്കു കടക്കുമ്പോള്‍ റഷ്യന്‍ സേനയ്ക്ക് യുക്രൈനില്‍ കടുത്ത പരാജയമാണെന്ന വിവരം മറച്ചുവയ്ക്കുകയാണ്. യുക്രൈന്റെ തെക്കന്‍ നഗരമായ ഖെര്‍സോണിലും വടക്ക് കിഴക്കന്‍ പ്രദേശമായ ഖാര്‍കീവിലും റഷ്യന്‍ പട്ടാളം യൂണിഫോംപോലും ഉപേക്ഷിച്ച് സിവില്‍വേഷത്തിലാണു പാലായനം ചെയ്തത്.
◾ഇന്ത്യയുടെ വനിതാ ഗുസ്തി താരം വിനേഷ് ഫോഗട്ടിന് ലോക ഗുസ്തി ചാമ്പ്യന്‍ഷിപ്പില്‍ വെങ്കലം. ലോക ചാമ്പ്യന്‍ഷിപ്പിലെ ഫോഗട്ടിന്റെ രണ്ടാം മെഡലാണിത്. ലോക ഗുസ്തി ചാമ്പ്യന്‍ഷിപ്പില്‍ ഒന്നിലേറെ മെഡല്‍ നേടുന്ന ആദ്യ ഇന്ത്യന്‍ വനിതാ ഗുസ്തി താരം കൂടിയാണ് വിനേഷ് ഫോഗട്ട്.
◾ബിസിസിഐയുടെ ഭരണഘടനാ ഭേദഗതിക്കു സുപ്രീം കോടതി അംഗീകാരം. ഇനി സൗരവ് ഗാംഗുലിക്കും ജയ്ഷായ്ക്കും ബിസിസിഐയുടെ തലപ്പത്തേക്ക് ഒരു തവണകൂടി മത്സരിക്കാം. ഇരുവരുടേയും മൂന്നു വര്‍ഷത്തെ കാലാവധി ഈ മാസം തീരാനിരിക്കെയാണു കോടതി നടപടി. ഇതോടെ ഗാംഗുലിക്കും ജയ്ഷായ്ക്കും മൂന്നു വര്‍ഷം കൂടി ബിസിസിഐ തലപ്പത്തു തുടരാനാകും.
◾മുംബൈ ഇന്ത്യന്‍സിന് ഇനി പുതിയ പരിശീലകന്‍. നിലവിലെ മുഖ്യ പരിശീലകനായ മഹേല ജയവര്‍ധനെയെ മുംബൈ ഇന്ത്യന്‍സിന്റെ വിവിധ രാജ്യങ്ങളിലെ ടി20 ലീഗുകളുടെയെല്ലാം ഗ്ലോബല്‍ ഹെഡ്-പെര്‍ഫോര്‍മന്‍സ് ആയി നിയമിച്ചതോടെയാണ് പരിശീലക സ്ഥാനത്തേക്ക് പുതിയൊരാളെ തേടുന്നത്. ടീം ഡയറക്ടറായിരുന്നു മുന്‍ ഇന്ത്യന്‍ പേസര്‍ സഹീര്‍ ഖാനെ ക്രിക്കറ്റ് ഡെവലപ്മെന്റ് ഹെഡ്ഡായും നിയമിച്ചിട്ടുണ്ട്.
◾വെസ്റ്റ് ഇന്‍ഡീസിന്റെ ട്വന്റി20 ലോകകപ്പിനുള്ള ടീമിനെ പ്രഖ്യാപിച്ചു. നിക്കോളാസ് പുരാന്‍ നയിക്കുന്ന ടീമില്‍ സൂപ്പര്‍ താരം ആന്ദ്രെ റസല്‍ ഇല്ല. റൊവ്മാന്‍ പവല്‍ ആണ് വൈസ് ക്യാപ്റ്റന്‍.
◾ദീപാവലി അടക്കമുള്ള ഉത്സവസീസണ്‍ മുന്നില്‍ കണ്ട് പ്രമുഖ ഇ- കോമേഴ്‌സ് സ്ഥാപനങ്ങളായ ഫ്‌ളിപ്പ്കാര്‍ട്ടും ആമസോണും വില്‍പ്പന മേള പ്രഖ്യാപിച്ചു. ബിഗ് ബില്യണ്‍ ഡേയ്‌സ് എന്ന പേരില്‍ ഫ്‌ളിപ്പ്കാര്‍ഡ് നടത്തുന്ന വ്യാപാരമേളയ്ക്ക് സെപ്റ്റംബര്‍ 23നാണ് തുടക്കമാകുക. സെപ്റ്റംബര്‍ 30 വരെ നീണ്ടുനില്‍ക്കുന്ന മേളയില്‍ ഉപയോക്താക്കളെ ആകര്‍ഷിക്കാന്‍ വലിയ ഓഫറുകളാണ് ഒരുങ്ങുന്നത്. സെപ്റ്റംബര്‍ 23ന് തന്നെയാണ് ആമസോണിന്റെ ഗ്രേറ്റ് ഇന്ത്യന്‍ ഫെസ്റ്റിവലും ആരംഭിക്കുന്നത്. വ്യാപാരമേളയില്‍ ഐസിഐസിഐ ബാങ്കും ആക്‌സിസ് ബാങ്കുമായി ചേര്‍ന്ന് ഫ്‌ളിപ്പ്കാര്‍ട്ട് പത്തുശതമാനം ഇന്‍സ്റ്റന്റ് ഡിസ്‌കൗണ്ട് അനുവദിക്കും. ഗ്രേറ്റ് ഇന്ത്യന്‍ ഫെസ്റ്റിവലില്‍ മറ്റു ഓഫറുകള്‍ക്ക് പുറമേ എസ്ബിഐ ക്രെഡിറ്റ്, ഡെബിറ്റ് കാര്‍ഡ് ഉടമകള്‍ക്ക് ഓരോ പര്‍ച്ചെയ്‌സിനും പത്തുശതമാനം അധികം ഡിസ്‌കൗണ്ട് അനുവദിക്കും. ആദ്യ പര്‍ച്ചയെസിന് 10 ശതമാനം ക്യാഷ് ബാക്കിന് പുറമേയാണിത്.
◾രാജ്യത്തെ പാമോയില്‍ ഇറക്കുമതിയില്‍ കുതിച്ചുകയറ്റം. ഒരു മാസം മുന്‍പത്തേതിനേക്കാള്‍ 87 ശതമാനമായാണ് വര്‍ദ്ധന. കഴിഞ്ഞ 11 മാസത്തേതില്‍ വച്ച് ഏറ്റവും കൂടിയ നിരക്കാണിത്. ആഗസ്റ്റില്‍ 994,997 ടണ്‍ പാമോയിലാണ് ഇറക്കുമതി ചെയ്തത്. തൊട്ട് മുന്‍പത്തെ മാസം ഇത് 530,420 ടണ്ണായിരുന്നു. സണ്‍ ഫ്ളവര്‍ ഓയില്‍, സോയ ഓയില്‍ എന്നിവയേക്കാള്‍ പാം ഓയിലിന് ലഭിക്കുന്ന ഇളവുകളാണ് ഇറക്കുമതി നിരക്ക് ഉയര്‍ത്തുന്നത്. ഇന്‍ഡൊനേഷ്യ, തായ്ലന്‍ഡ് , മലേഷ്യ എന്നിവിടങ്ങളില്‍ നിന്നാണ് പ്രധാനമായും പാമോയില്‍ ഇറക്കുമതി നടത്തുന്നത്.
◾മലയാളത്തിലെ എവര്‍ഗ്രീന്‍ റൊമാന്റിക് ഹീറോ ശങ്കര്‍ ശക്തമായ തിരിച്ചുവരവ് നടത്തുന്ന ഫാമിലി സസ്‌പെന്‍സ് സെന്റിമെന്റല്‍ ത്രില്ലര്‍ ചിത്രം ‘ഓര്‍മ്മകളില്‍’ സെപ്തംബര്‍ 23ന് തീയേറ്ററുകളിലെത്തുന്നു. ചിത്രത്തിന്റെ ട്രെയിലര്‍ റിലീസ് ചെയ്തു. സമ്പന്നവും പരമ്പരാഗതവുമായ ഒരു കുടുംബജീവിതത്തിന്റെ ഏറ്റക്കുറച്ചിലുകളും അതിന്റെ നന്മ തിന്മകളുമാണ് ആവിഷ്‌ക്കരിച്ചിരിക്കുന്നത്. ശങ്കറിനു പുറമെ, ഷാജു ശ്രീധര്‍, നാസര്‍ ലത്തീഫ്, ദീപാ കര്‍ത്താ, പൂജിത മേനോന്‍, വിജയകുമാരി, അജയ്, ആര്യന്‍ കതൂരിയ, റോഷന്‍ അബ്ദുള്‍, മാസ്റ്റര്‍ ദൈവിക്, സതീഷ് തൃപ്പരപ്പ്, ശ്രീരാം ശര്‍മ്മ, സുരേഷ്‌കുമാര്‍ പി , സുരേഷ് കൃഷ്ണ എന്നിവരും അഭിനയിക്കുന്നു. ഗാനരചന എം വിശ്വപ്രതാപ്, സംഗീതം ജോയ് മാക്സ്വെല്‍, ആലാപനം ജാസി ഗിഫ്റ്റ്, സുജാത മോഹന്‍.
◾ബിജു മേനോനും ഗുരു സോമസുന്ദരവും കേന്ദ്ര കഥാപാത്രങ്ങളായി എത്തുന്ന ‘നാലാം മുറ’യുടെ മോഷന്‍ പോസ്റ്റര്‍ പുറത്ത്. ആകാംക്ഷയും നിഗൂഢതയും നിറച്ചു കൊണ്ടുള്ളതാണ് പോസ്റ്റര്‍. ബിജു മേനോന്റെയും ഗുരു സോമസുന്ദരത്തിന്റെയും കഥാപാത്രങ്ങളാണ് പോസ്റ്ററില്‍ ഉള്ളത്. മൈന്റ് ഗെയിം ജോണറിലുള്ളൊരു ചിത്രമാകും നാലാം മുറയെന്നാണ് പോസ്റ്റര്‍ നല്‍കുന്ന സൂചന. ദീപു അന്തിക്കാട് ആണ് നാലാം മുറ സംവിധാനം ചെയ്യുന്നത്. സൂരജ് വി ദേവ് ആണ് രചന. ദിവ്യ പിള്ള, ശാന്തി പ്രിയ, ഷീല എബ്രഹാം, സുരഭി സന്തോഷ്, ഷൈനി സാറ, അലന്‍സിയര്‍, പ്രശാന്ത് അലക്സാണ്ടര്‍ എന്നിവരാണ് മറ്റുകഥാപാത്രങ്ങളെ അവതരിപ്പിക്കുന്നത്. ലോകനാഥന്‍ ഛായാഗ്രഹണവും കൈലാസ് മേനോന്‍ സംഗീത സംവിധാനവും നിര്‍വഹിക്കുന്നു. പശ്ചാത്തല സംഗീതം ഗോപീ സുന്ദര്‍.
◾ജാപ്പനീസ് ബൈക്ക് നിര്‍മ്മാതാക്കളായ കാവാസക്കിയില്‍ നിന്നുള്ള റെട്രോ-സ്റ്റൈല്‍ മോട്ടോര്‍സൈക്കിളായ കവാസാക്കി ഡബ്ളിയു 175, ഈ സെപ്റ്റംബര്‍ 25-ന് ഇന്ത്യന്‍ നിരത്തുകളിലെത്തും. കവാസാക്കി ഡബ്ളിയു 800 ന് ശേഷം, കമ്പനിയുടെ ഡബ്ളിയു ലൈനപ്പില്‍ നിന്നുള്ള രാജ്യത്തെ രണ്ടാമത്തെ ഓഫറാണിത്. ഏകദേശം 1.5 ലക്ഷം രൂപ (എക്സ് ഷോറൂം) വില പ്രതീക്ഷിക്കുന്ന ഒരു മെയ്ഡ്-ഇന്‍-ഇന്ത്യ മോഡലായിരിക്കും ഡബ്ളിയു175. ശക്തിക്കായി, കവാസാക്കി ഡബ്ളിയു175 177 സിസി, സിംഗിള്‍ സിലിണ്ടര്‍, ഫ്യുവല്‍ ഇഞ്ചക്ഷന്‍ സാങ്കേതികവിദ്യ ഉപയോഗിച്ച് ബൂസ്റ്റ് ചെയ്ത എയര്‍-കൂള്‍ഡ് എഞ്ചിനാണ് ഉപയോഗിക്കുന്നത്. മോട്ടോര്‍ 7,500 ആര്‍പിഎമ്മില്‍ 13 ബിഎച്ച്പി കരുത്തും 6,000 ആര്‍പിഎമ്മില്‍ 13.2 എന്‍എം ടോര്‍ക്കും നല്‍കുന്നു.
◾കേരളത്തെ ഭ്രാന്താലയമെന്ന് വിളിച്ച സ്വാമി വിവേകാനന്ദന്‍, മാനവികതയുടെ പ്രവാചകനായ മഹാത്മാജി, സാമൂഹിക പരിഷ്‌കര്‍ത്താവ് വി. ടി ഭട്ടതിരിപ്പാട്, ഡോ പല്‍പ്പു, സി.വി. കുഞ്ഞിരാമന്‍, സഹോദരന്‍ അയ്യപ്പന്‍, സി. കേശവന്‍, ടി.കെ. മാധവന്‍, യുഗപ്രഭാവനായ അയ്യന്‍കാളി, കെ.സി. മാമ്മന്‍മാപ്പിള, ദിവാന്‍ സര്‍ സി.പി. രാമസ്വാമി അയ്യര്‍ തുടങ്ങിയവരുടെ കാലഘട്ടത്തെ അനാവരണം ചെയ്യുന്ന നാടകം. ‘അഗ്നിജ്വാലകള്‍’. വി.പി. സ്വാമിനാഥന്‍. ഗ്രീന്‍ ബുക്സ്. വില 123 രൂപ.
◾ഒമൈക്രോണ്‍ വകഭേദത്തിന്റെ ഉപവകഭേദമായ ബിഎ.4.6 ബ്രിട്ടനിലും വ്യാപിക്കുന്നതായി സ്ഥിരീകരണം. യുഎസില്‍ അതിവേഗം വ്യാപിച്ചുകൊണ്ടിരുന്ന ബിഎ.4.6 ആണ് യുകെയിലും പടരുന്നത്. യുകെ ഹെല്‍ത്ത് സെക്യൂരിറ്റി ഏജന്‍സിയുടെ കണക്കനുസരിച്ച് ഓഗസ്റ്റ് മൂന്നാംവാരത്തില്‍ 3.3 ശതമാനം സാമ്പിളുകളും ബിഎ.4.6 ആണെന്ന് കണ്ടെത്തി. അതിനുശേഷം ഇത് 9 ശതമാനമായി ഉയര്‍ന്നു. യുഎസിലുടനീളമുള്ള സമീപകാല കേസുകളില്‍ 9 ശതമാനത്തിലധികം ബിഎ.4.6 ആണെന്നാണ് സെന്റര്‍ ഫോര്‍ ഡിസീസ് കണ്‍ട്രോള്‍ ആന്‍ഡ് പ്രിവന്‍ഷന്റെ കണക്ക് വ്യക്തമാക്കുന്നത്. മറ്റു പല രാജ്യങ്ങളിലും ഈ വകഭേദം തിരിച്ചറിഞ്ഞിട്ടുണ്ട്. ഒമൈക്രോണിന്റെ ബിഎ.4 വകഭേദത്തിന്റെ പിന്‍ഗാമിയാണ് ബിഎ.4.6. ഇത് ആദ്യമായി 2022 ജനുവരിയില്‍ ദക്ഷിണാഫ്രിക്കയിലാണ് കണ്ടെത്തിയത്. അതിനുശേഷം ബിഎ.5 വകഭേദത്തിനൊപ്പം ലോകമെമ്പാടും ഇതും വ്യാപിച്ചു. ഈ വകഭേദം കൂടുതല്‍ ഗുരുതരമായ രോഗ ലക്ഷണങ്ങള്‍ ഉണ്ടാക്കുന്നതായി ഇതുവരെ റിപ്പോര്‍ട്ട് ചെയ്തിട്ടില്ല. എന്നാല്‍ മറ്റു വകഭേദങ്ങളെ അപേക്ഷിച്ച് കൂടുതല്‍ വ്യാപനശേഷിയുണ്ട്. പല നിലയിലും ബിഎ.4ന് സമാനമാണ് ബിഎ.4.6. ബിഎ.4 പോലെ സ്‌പൈക് പ്രോട്ടീനിലാണ് ഉള്‍പരിവര്‍ത്തനം സംഭവിക്കുന്നത്. വൈറസിന് പുറത്തുള്ള ഈ പ്രോട്ടീനാണ് കോശങ്ങളില്‍ അതിക്രമിച്ച് കയറാന്‍ സഹായിക്കുന്നത്.
*ശുഭദിനം*
*കവിത കണ്ണന്‍*
ആ ക്ലാസ്സിലെ കുട്ടികള്‍ എല്ലാവരും ചേര്‍ന്ന് ഒരാളെ പറ്റിക്കാന്‍ തീരുമാനിച്ചു. അവന് അറിയാതെ അവന്റെ ഷര്‍ട്ടിന്റെ പുറകില്‍ ‘ഞാന്‍ വിഡ്ഢി എന്നൊരു ലേബലെഴുതി ഒട്ടിച്ചു. മറ്റുളളവരെല്ലാം അവനെ നോക്കി ചിരിക്കാന്‍ തുടങ്ങി. അവന് കാര്യമൊന്നും മനസ്സിലായില്ല. ക്ലാസ്സ് തുടങ്ങി. ഗണിതാധ്യാപകന്‍ ബോര്‍ഡില്‍ ഒരു കണക്ക് എഴുതിയിട്ടു. അതിന്റെ ഉത്തരം കണ്ടെത്താന്‍ അറിയുന്നവര്‍ എഴുന്നേറ്റ് നില്‍ക്കാന്‍ ആവശ്യപ്പെട്ടു. ക്ലാസ്സില്‍ അവന് മാത്രമാണ് എഴുന്നേറ്റ് നിന്നത്. ബോര്‍ഡില്‍ ഉത്തരമെഴുതാന്‍ അവന് വന്നപ്പോള്‍ അവന്റെ പിറകില്‍ ഒട്ടിച്ചിരിക്കുന്ന ലേബല്‍ അധ്യാപകന്‍ എടുത്തു. ആ ലേബല്‍ കണ്ടപ്പോള്‍ അവന് ചമ്മല്‍ വന്നു. അപ്പോള്‍ അധ്യാപകന്‍ പറഞ്ഞു: ഈ ക്ലാസ്സിലെ ഏറ്റവും മിടുക്കനായ വിദ്യാര്‍ത്ഥിയാണ് നീ. ജീവിതകാലം മുഴുവനും ഇങ്ങനെ നമ്മുടെ പിറകില്‍ ആരെങ്കിലുമൊക്കെ ഇത്തരം ലേബലുകള്‍ ഒട്ടിച്ചുകൊണ്ടിരിക്കും. അവയെക്കുറിച്ച് അറിയാതിരിക്കുകയാണ് നല്ലത്. പിന്നാമ്പുറങ്ങളിലെ കൗശലങ്ങള്‍ കൊണ്ട് ആത്മസംതൃപ്തി നേടുന്ന ഒട്ടേറെപ്പേരുണ്ട്. സ്വന്തമായി അഭിമാനിക്കാന്‍ ഒന്നുമില്ലാത്തവരാണ് അപരനെ അപമാനം പറഞ്ഞ് ആത്മഹര്‍ഷം കണ്ടെത്തുന്നത്. ഇത്തരക്കാരെ അവഗണിക്കുന്നതാണ് ഏറ്റവും ഉചിതമായ മാര്‍ഗ്ഗം. അജ്ഞത ചിലപ്പോഴൊക്കെ അനുഗ്രഹമാണ്, തന്നെ താറടിച്ചുകാണിക്കുന്നവരുടെ കുത്സിതപ്രവര്‍ത്തനങ്ങളെകുറിച്ചുളള അജ്ഞത. ആരെങ്കിലും നല്‍കുന്ന ലേബലുകളല്ല, സ്വയം നാമകരണനടപടികളിലാണ് നമ്മള്‍ മുന്നോട് പോകേണ്ടത് – ശുഭദിനം.