ആഡംബര എസ്‌യുവി കാര്‍ണിവലിന്റെ പുതിയ മോഡലിന്റെ ചിത്രങ്ങള്‍ പുറത്തുവിട്ട് കിയ. കഴിഞ്ഞ ന്യൂഡല്‍ഹി ഓട്ടോഎക്‌സ്‌പോയില്‍ പ്രദര്‍ശിപ്പിച്ച കെഎ4 കണ്‍സെപ്റ്റിനെ അടിസ്ഥാനപ്പെടുത്തിയാണ് നിര്‍മാണം. നിലവില്‍ എക്സ്റ്റീരിയര്‍ ചിത്രങ്ങള്‍ മാത്രമേ കിയ പുറത്തു വിട്ടിട്ടുള്ളു. വലിയ ഗ്രില്ലും എല്‍ ആകൃതിയിലുള്ള ഹെഡ്‌ലാംപും ഡേടൈം റണ്ണിങ് ലാംപുകളുമുണ്ട് മുന്നില്‍. ഗ്രില്ലില്‍ ക്രോം ഇന്‍സോര്‍ട്ടുകളും ബംബറില്‍ ചെറിയ എയര്‍ഇന്‍ടേക്കുകളുമുണ്ട്. ടെയില്‍ ലാംപിനും എല്‍ രൂപമാണ്. ടെയില്‍ ലാംപുകളെ ബന്ധിപ്പിച്ച് എല്‍ഇഡി കണക്റ്റ് ലൈറ്റ് ബാറും. അലോയ് വീലുകള്‍ക്ക് കിയയുടെ ഇലക്ട്രിക് എസ്‌യുവികളോട് സാമ്യമുണ്ട്. ഇന്റീരിയര്‍ ചിത്രങ്ങള്‍ പുറത്തുവിട്ടിട്ടില്ലെങ്കിലും അകത്തും ഏറെ മാറ്റങ്ങളുണ്ടാകും. മുന്‍തലമുറ കാര്‍ണിവല്ലിന് സമാനമായി വ്യത്യസ്ത സീറ്റ് ലേഔട്ടുകളുമുണ്ടാകും. 1.6 ലീറ്റര്‍ ടര്‍ബോ പെട്രോള്‍, 3.5 ലീറ്റര്‍ വി6 പെട്രോള്‍, 2.2 ലീറ്റര്‍ ഡീസല്‍ എന്നിങ്ങളെ വ്യത്യസ്ത വിപണികള്‍ക്കായി രണ്ട് പെട്രോള്‍ എന്‍ജിനും ഒരു ഡീസല്‍ എന്‍ജിനിലുമാണ് കാര്‍ണിവല്‍ ലഭിക്കുക. അടുത്ത വര്‍ഷം പുതിയ കാര്‍ണിവല്‍ ഇന്ത്യയിലെത്തുമെന്നാണ് കിയ അറിയിക്കുന്നത്.