ഐക്കണിക്ക് അമേരിക്കന്‍ വാഹന ബ്രാന്‍ഡായ ജീപ്പ് 2017ല്‍ പുറത്തിറക്കിയ ജീപ്പ് കോംപസ് എസ്യുവി രാജ്യത്ത് വിജയകരമായ എട്ട് വര്‍ഷം പൂര്‍ത്തിയാക്കി. ഈ അവസരത്തിന്റെ സ്മരണയ്ക്കായി, കമ്പനി ചില കോസ്‌മെറ്റിക് മെച്ചപ്പെടുത്തലുകളും അനുബന്ധ ഫീച്ചറുകളുമായി ഒരു പ്രത്യേക ജീപ്പ് കോമ്പസ് വാര്‍ഷിക പതിപ്പ് അവതരിപ്പിച്ചു. 25.26 ലക്ഷം രൂപ എക്സ്ഷോറൂം വിലയുള്ള ആനിവേഴ്സറി എഡിഷന്‍ ലോഞ്ചിറ്റിയൂഡ് (ഒ), ലിമിറ്റഡ് (ഒ) വകഭേദങ്ങളോടെയാണ് വരുന്നത്. ജീപ്പ് കോമ്പസ് വാര്‍ഷിക പതിപ്പിന് കരുത്തേകുന്നത് 2.0 ലിറ്റര്‍ ഡീസല്‍ എന്‍ജിനാണ്. ഈ എഞ്ചിന്‍ 168 ബിഎച്പി കരുത്തും 350 എന്‍എം ടോര്‍ക്കും ഉത്പാദിപ്പിക്കുന്നു. ഉപഭോക്താക്കള്‍ക്ക് 6-സ്പീഡ് മാനുവല്‍ അല്ലെങ്കില്‍ 9-സ്പീഡ് ഓട്ടോമാറ്റിക് ട്രാന്‍സ്മിഷന്‍ തിരഞ്ഞെടുക്കാം. രണ്ടും ഫ്രണ്ട് വീല്‍ ഡ്രൈവ് കോണ്‍ഫിഗറേഷനുമായാണ് വരുന്നത്. സാധാരണ ജീപ്പ് കോംപസിന്റെ എക്‌സ്-ഷോറൂം വില 18.99 ലക്ഷം രൂപയില്‍ തുടങ്ങി 32.41 ലക്ഷം രൂപ വരെയാണ്.