ഫഹദ് ഫാസിലും നസ്രിയയും സ്വന്തമാക്കിയത് കേരളത്തിലെ ആദ്യ ഡിഫന്‍ഡര്‍ ഡി 90. ഡിസ്‌കവറിയുടെ മൂന്നു ഡോറുള്ള ഈ പതിപ്പ് കൊച്ചിയിലെ മുത്തൂറ്റ് ജെഎല്‍ആറില്‍ നിന്നാണ് വാങ്ങിയത്. 2.18 കോടി രൂപ എക്‌സ്‌ഷോറൂം വില വരുന്ന വാഹനത്തിന്റെ നികുതി മാത്രം 46 ലക്ഷം രൂപ വരും. 2.70 കോടി രൂപയാണ് വാഹനത്തിന്റെ ഓണ്‍റോഡ് വില. അടുത്തിടെ ബിഎംഡബ്ല്യു 740ഐ സ്വന്തമാക്കിയ ഫഹദിന്റെ ഗാരിജില്‍ പോര്‍ഷെയും മിനി കണ്‍ട്രിമാനും ലംബോര്‍ഗിനി ഉറുസും റേഞ്ച് റോവറുമെല്ലാമുണ്ട്. ഡിഫന്‍ഡറിന്റെ ഈ മോഡലില്‍ 5.0 ലീറ്റര്‍ വി8 പെട്രോള്‍ എന്‍ജിനാണ് ഉപയോഗിക്കുന്നത്. 535 ബിഎച്ച്പി കരുത്തും 650 എന്‍എം ടോര്‍ക്കുമുണ്ട്. ഓള്‍ വീല്‍ ഡ്രൈവ് മോഡലായ ഈ എസ്‌യുവിക്ക് 100 കിലോമീറ്റര്‍ വേഗത്തിലെത്താന്‍ വെറും 5.2 സെക്കന്‍ഡ് മാത്രം മതി. ഉയര്‍ന്ന വേഗം 240 കിലോമീറ്റര്‍. സുരക്ഷയ്ക്ക് ഏറെ പ്രാധാന്യം നല്‍കുന്ന ഡിഫന്‍ഡറില്‍ ആറ് എയര്‍ബാഗുകളാണ് നല്‍കിയിട്ടുള്ളത്. ഇതിനു പുറമേ ആന്റി ലോക്ക് ബ്രേക്കിങ് സിസ്റ്റം, ബ്രേക്ക് അസിസ്റ്റ്, പവര്‍ഡോര്‍ ലോക്ക്, ചൈല്‍ഡ് സേഫ്റ്റി ലോക്സ്, ആന്റി തെഫ്റ്റ് അലാം, ടയര്‍പ്രഷര്‍ മോണിറ്റര്‍ ക്രാഷ് സെന്‍സര്‍, ഇലക്ട്രോണിക് സ്റ്റബിലിറ്റി കണ്‍ട്രോള്‍, ഹില്‍ അസിസ്റ്റ് എന്നിവയുമുണ്ട്. എന്‍സിഎപി ക്രാഷ് ടെസ്റ്റില്‍ 5 സ്റ്റാര്‍ ലഭിച്ചിട്ടുള്ള വാഹനമാണ് ലാന്‍ഡ് റോവര്‍ ഡിഫന്‍ഡര്‍.