ലോകത്തെ ഏറ്റവും ചെലവേറിയ നഗരങ്ങളുടെ പട്ടികയില്‍ ഒന്നാം സ്ഥാനം സിംഗപ്പൂരിന്. ഏഷ്യന്‍ രാജ്യമായ സിംഗപ്പൂരിന്റെ തലസ്ഥാനമാണ് സിംഗപ്പൂര്‍ സിറ്റി. സ്വിറ്റ്സര്‍ലന്‍ഡ് കേന്ദ്രമായി പ്രവര്‍ത്തിക്കുന്ന ജൂലിയസ് ബെയര്‍ ഗ്രൂപ്പാണ് പട്ടിക പുറത്തുവിട്ടത്. കഴിഞ്ഞവര്‍ഷം അഞ്ചാം സ്ഥാനത്തായിരുന്നു സിംഗപ്പൂര്‍. ആഗോള സാമ്പത്തിക കേന്ദ്രമായ ചൈനയിലെ ഷാങ്ഹായ് ആണു രണ്ടാം സ്ഥാനത്ത്. ചൈനയുടെ നിയന്ത്രണത്തിലുള്ള ഹോങ്കോംഗ് മൂന്നാം സ്ഥാനത്തുണ്ട്. ആഡംബര ജീവിതത്തിന് ഏറ്റവും പണച്ചെലവേറിയ ആദ്യ മൂന്നു രാജ്യങ്ങളും ഏഷ്യയിലാണ്. ലണ്ടന്‍ നഗരം നാലാം സ്ഥാനത്തും അമേരിക്കയിലെ ന്യൂയോര്‍ക്ക് നഗരം അഞ്ചാം സ്ഥാനത്തുമുണ്ട്. ഗള്‍ഫ് നഗരമായ ദുബായ് ഏഴാം സ്ഥാനത്താണ്. 18 ാം സ്ഥാനത്തുള്ള മുംബൈയാണ് ആദ്യ 20 റാങ്കിലുള്ള ഏക ഇന്ത്യന്‍ നഗരം. ജനവാസ കേന്ദ്രങ്ങള്‍, ബിസിനസ് ക്ലാസ് ഫ്ലൈറ്റുകള്‍, ബിസിനസ് സ്‌കൂള്‍, ആഡംബര സൗകര്യങ്ങള്‍ തുടങ്ങിയ വിവിധ ഘടകങ്ങള്‍ പരിഗണിച്ചാണ് പട്ടിക തയാറാക്കിയത്. കഴിഞ്ഞ വര്‍ഷം 11-ാം സ്ഥാനത്തായിരുന്ന അമേരിക്കയുടെ സാമ്പത്തിക തലസ്ഥാനമായ ന്യൂയോര്‍ക്ക്, ഡോളര്‍ ശക്തിപ്പെട്ടതോടെയും കോവിഡില്‍നിന്നു തിരിച്ചുവന്നതോടെയുമാണ് ഇത്തവണ അഞ്ചാം സ്ഥാനത്തേക്കു കയറിയത്.