◼️പെരുമഴ. നാളെ രാത്രി വരെ അതിതീവ്ര മഴ. ഇടുക്കി ജില്ലയില്‍ റെഡ് അലര്‍ട്ട്. മലയോര മേഖലയില്‍ രാത്രിയാത്ര നിരോധിച്ചു. അഞ്ചു ഡാമുകളില്‍ റെഡ് അലര്‍ട്ട്. കല്ലാര്‍കുട്ടി, പൊന്മുടി, കുണ്ടള, ലോവര്‍ പെരിയാര്‍, ഇരട്ടയാര്‍ ഡാമുകളില്‍ ആണ് റെഡ് അലര്‍ട്ട്. മീങ്കര, മംഗലം ഡാമുകളില്‍ ഓറഞ്ച് അലര്‍ട്ടാണ്. നെയ്യാര്‍ ഡാമിന്റെ നാലു ഷട്ടറുകളും അഞ്ചു സെന്റിമീറ്റര്‍ വീതം ഉയര്‍ത്തി. പേപ്പാറ ഡാമിന്റെ നാലു ഷട്ടറുകളും തുറന്നു. അരുവിക്കര ഡാമിന്റെ ഷട്ടറുകള്‍ ഒന്നര മീറ്റര്‍ ഉയര്‍ത്തി. പെരിങ്ങള്‍ക്കുത്തു ഡാമിന്റെ ഇപ്പോള്‍ തുറന്നിരിക്കുന്ന സ്പില്‍വേ ഷട്ടറുകള്‍ക്കു പുറമെ ഒരു സ്ലൂയിസ് ഗേറ്റ് കൂടി തുറന്നു. ചാലക്കുടി പുഴയില്‍ ജലനിരപ്പ് ഉയരും. പത്തനംതിട്ട ജില്ലയിലെ എല്ലാ വിദ്യാഭ്യാസ സ്ഥാപനങ്ങള്‍ക്കും ഇന്ന് ഉച്ചയ്ക്കുശേഷവും നാളേയും അവധി.
◼️പത്തനംതിട്ട വെണ്ണിക്കുളം കല്ലുപാലത്തിനു സമീപം കാര്‍ തോട്ടിലേക്കു മറിഞ്ഞ് അച്ഛനും രണ്ടു പെണ്‍മക്കളും അടക്കം മൂന്നു പേര്‍ മരിച്ചു. പാസ്റ്റര്‍ ചാണ്ടി മാത്യു, മക്കളായ ബ്ലെസി ചാണ്ടി, ഫെബ വി ചാണ്ടി എന്നിവരാണ് മരിച്ചത്. ഇടുക്കി ചക്കുപള്ളം സ്വദേശികളായ ഇവര്‍ പത്തു വര്‍ഷമായി പത്തനംതിട്ട കുമ്പനാടാണ് താമസിച്ചിരുന്നത്. രാവിലെ ഏഴോടെ ബസിനെ ഓവര്‍ടേക്ക് ചെയ്യുന്നതിനിടെയാണ് കാര്‍ തോട്ടിലേക്കു മറിഞ്ഞത്.
◼️വാണിജ്യ എല്‍പിജിയുടെ വില 36 രൂപ കുറച്ചു. ഹോട്ടലുകള്‍, റെസ്റ്റോറന്റുകള്‍ എന്നിവയടക്കമുള്ള വാണിജ്യ സ്ഥാപനങ്ങളില്‍ ഉപയോഗിക്കുന്ന 19 കിലോ എല്‍പിജി സിലിണ്ടറിന്റെ വിലയാണ് കുറച്ചത്. വീട്ടാവശ്യത്തിനുള്ള സിലിണ്ടറുകളുടെ വില കുറച്ചിട്ടില്ല.
*_KSFE_ GOLD LOAN*
*മനുഷ്യപ്പറ്റുള്ള ഗോള്‍ഡ് ലോണ്‍*
നിങ്ങളുടെ അടിയന്തിര സാമ്പത്തിക ആവശ്യങ്ങള്‍ക്ക് *_KSFE_* നല്‍കുന്നു സ്വര്‍ണ പണയ വായ്പ. മിതമായ പലിശ നിരക്കില്‍ ലളിതമായ നടപടിക്രമങ്ങളിലൂടെ 25 ലക്ഷം രൂപ വരെ പ്രതിദിനം നിങ്ങള്‍ക്ക് നേടാം. 12 മാസത്തെ വായ്പാ കാലയളവില്‍ നിശ്ചിത പലിശ അടച്ചതിന് ശേഷം ഒരു വര്‍ഷത്തേക്ക് വായ്പ പുതുക്കാന്‍ കഴിയും, കൂടാതെ പരമാവധി 36 മാസം വരെ ഈ സൗകര്യം ഉപയോഗിക്കാം. *കൂടുതല്‍ വിവരങ്ങള്‍ക്ക് : www.ksfe.com*
◼️കളമശേരി ബസ് കത്തിക്കല്‍ കേസിലെ പ്രതികള്‍ക്കു തടവും പിഴയും ശിക്ഷ. തടിയന്റവിട നസീറിനും സാബിര്‍ ബുഹാരിക്കും ഏഴുവര്‍ഷം തടവും താജുദീനും സാബിറിനും ആറുവര്‍ഷം വീതം തടവുമാണ് എന്‍ഐഎ കോടതി വിധിച്ചത്. റിമാന്‍ഡ് കാലാവധി ശിക്ഷാകാലാവധിയായി പരിഗണിക്കും. നസീര്‍ 1,75,000 രൂപയും സാബിര്‍ 1,75,000 രൂപയും താജുദ്ദീന്‍ 1,10,000 രൂപയും പിഴയൊടുക്കണം.
◼️അട്ടപ്പാടി മധുകൊലക്കേസില്‍ ഒരു സാക്ഷികൂടി കൂറുമാറി. ഇരുപതാം സാക്ഷി മരുതന്‍ എന്ന മയ്യനാണ് കൂറുമാറിയത്. മുക്കാലിയിലുള്ള തേക്ക് പ്ലാന്റേഷനിലെ ജിവനക്കാരനാണ് മയ്യന്‍. ഇതോടെ കൂറുമാറിയ സാക്ഷികളുടെ എണ്ണം പത്തായി.
◼️കല്ലുവാതുക്കല്‍ മദ്യദുരന്ത കേസിലെ പ്രതി മണിച്ചനെ മോചിപ്പിക്കാന്‍ ഗവര്‍ണര്‍ ഉത്തരവ് നല്‍കിയിട്ടും 30 ലക്ഷം രൂപ പിഴയായി കെട്ടിവയ്ക്കണമെന്ന നിബന്ധന അതിശയകരമെന്ന് സുപ്രീംകോടതി. 30 ലക്ഷം കെട്ടിവക്കണമെന്ന ഹൈക്കോടതി ഉത്തരവില്‍ ഇളവു തേടി ഭാര്യ ഉഷ നല്‍കിയ ഹര്‍ജിയില്‍ മൂന്നാഴ്ചയക്കകം മറുപടി ആവശ്യപ്പെട്ട് സംസ്ഥാന സര്‍ക്കാരിന് നോട്ടീസ് അയച്ചു. കേസിലെ 33 തടവുകാരെ വിട്ടയച്ചുകൊണ്ട് സര്‍ക്കാര്‍ ഉത്തരവിറക്കിയെങ്കിലും മണിച്ചനു പുറത്തിറങ്ങാനായിട്ടില്ല.
*ജോയ്ആലുക്കാസ് വിശേഷങ്ങള്‍*
ജോയ്ആലുക്കാസിലെ എല്ലാ സ്വര്‍ണാഭരണങ്ങള്‍ക്കും ഇപ്പോള്‍ പണിക്കൂലിയില്‍ വന്‍ ഇളവ്. സ്വര്‍ണം, ഡയമണ്ട്, മറ്റു ജ്വല്ലറി കളക്ഷനുകളെല്ലാം സ്വര്‍ണ വിപണിയിലെ തന്നെ ഏറ്റവും കുറഞ്ഞ പണിക്കൂലിയിലാണ് ലഭ്യമാക്കുന്നത്. ജോയ്ആലുക്കാസില്‍ നിന്ന് പര്‍ച്ചേയ്സ് ചെയ്യുന്ന ആഭരണങ്ങള്‍ക്ക് ഒരു വര്‍ഷത്തേക്ക് സൗജന്യ ഇന്‍ഷുഷറന്‍സും ലൈഫ്ടൈം ഫ്രീ മെയിന്റനന്‍സും ലഭിക്കുന്നതാണ്. ഒപ്പം എക്സ്ചേഞ്ച് ഓഫറും പ്രയോജനപ്പെടുത്താവുന്നതാണ്.
◼️വിദേശകാര്യമന്ത്രാലയത്തിന്റെ അനുമതി ഇല്ലാതെ ഷാര്‍ജ ഭരണാധികാരിയുടെ യാത്രാ റൂട്ട് സ്വന്തം വീടായ ക്ളിഫ് ഹൗസിലേക്കു മാറ്റിയത് മുഖ്യമന്ത്രി പിണറായി വിജയന്റെയും പ്രിന്‍സിപ്പല്‍ സെക്രട്ടറിയായിരുന്ന എം ശിവശങ്കരന്റെയും നിര്‍ദ്ദേശമനുനുസരിച്ചാണെന്ന് സ്വപ്ന സുരേഷ്. മുഖ്യമന്ത്രി പ്രോട്ടോക്കോള്‍ ലംഘിച്ച് രാജ്യസുരക്ഷയെ ബാധിക്കുന്ന കുറ്റമാണു ചെയ്തതെന്നും സ്വപ്ന ആരോപിച്ചു.
◼️ഓണക്കാലത്ത് കെഎസ്ആര്‍ടിസി ബസ് ചാര്‍ജ് കൂട്ടുന്നു. സെപ്റ്റംബര്‍ വരെ യാത്രക്കാരുടെ ബാഹുല്യമനുസരിച്ച് അന്തര്‍ സംസ്ഥാന സര്‍വ്വീസുകളില്‍ ഫ്ളക്സി നിരക്ക് ഈടാക്കും. എസി സര്‍വ്വീസുകള്‍ക്ക് 20 ശതമാനവും എസി ഓണ്‍ലൈന്‍ ബുക്കിംഗിന് പത്തു ശതമാനവും അധിക നിരക്ക് ഈടാക്കും.
◼️തൃശൂരില്‍ യുവാവ് മരിച്ചത് മങ്കിപോക്സ് ബാധിച്ചെന്ന് സ്ഥിരീകരിച്ചു. പുനെ വൈറോളജി ലാബിലെ പരിശോധനാ ഫലം ലഭിച്ചു. വിദേശത്ത് മങ്കിപോക്സ് സ്ഥിരീകരിച്ചിരുന്നു. പുന്നയൂര്‍ പഞ്ചായത്തിലെ എട്ടാം വാര്‍ഡിലാണ് മരിച്ച 22 കാരന്റെ വീട്. യുഎഇയില്‍നിന്ന് 21 നാണ് നാട്ടിലെത്തിയത്.
വടകരയില്‍ പോലീസ് കസ്റ്റഡിയില്‍ സജീവന്‍ മരിച്ച സംഭവത്തില്‍ വടകര ഡിവൈഎസ്പി, സിഐ എന്നിവരുടെ മൊഴി ക്രൈം ബ്രാഞ്ച് രേഖപ്പെടുത്തും. മൊഴിയെടുക്കാന്‍ എസ്.ഐ എം. നിജേഷ് ഉള്‍പ്പടെ മൂന്നു പോലീസ് ഉദ്യോഗസ്ഥര്‍ക്ക് അന്വേഷണ സംഘം നോട്ടീസ് അയക്കും.
◼️കെഎസ്ആര്‍ടിസിയിലെ ഒരു വിഭാഗം ജീവനക്കാര്‍ക്ക് ജൂണ്‍ മാസത്തെ ശമ്പളം ഇനിയും കിട്ടിയില്ല. ഇന്നലെ തൊഴിലാളി സംഘടനകളുടെ യോഗത്തില്‍ ഈ മാസം പത്തിനു മുമ്പ് ശമ്പള പ്രതിസന്ധി പരിഹരിക്കുമെന്ന് എം ഡി ബിജു പ്രഭാകര്‍ ഉറപ്പു നല്‍കിയിരുന്നു. തീരുമാനമെടുക്കേണ്ടത് മാനേജ്മെന്റാണെന്നാണ് ഗതാഗത മന്ത്രി ആന്‍ണി രാജു പ്രതികരിച്ചത്.
◼️കെഎസ്ആര്‍ടിസിയില്‍ ഡീസല്‍ പ്രതിസന്ധി. കോഴിക്കോട്, വയനാട് ജില്ലകളിലെ ഡിപ്പോകളില്‍ ഡീസല്‍ ഇല്ല. ദീര്‍ഘദൂര -അന്തര്‍ സംസ്ഥാന ബസ്സുകള്‍ സര്‍വീസ് നിര്‍ത്തിവയ്ക്കേണ്ട അവസ്ഥയിലാണ്.
◼️ബഫര്‍ സോണ്‍ വിഷയത്തില്‍ നിയമസഭാ പ്രമേയംകൊണ്ടു പ്രയോജനമില്ലെന്നും ഫലപ്രദമായ നടപടികള്‍ വേണമെന്നും കെസിബിസിയും കര്‍ഷക സംഘടനകളും. പ്രശ്നബാധിത സ്ഥലങ്ങളില്‍ വനം വകുപ്പിന് ചുമതല നല്‍കുമ്പോള്‍ കര്‍ഷക വിരുദ്ധ താത്പര്യങ്ങളാണ് നടപ്പാകുകയെന്ന് സംയുക്ത സമ്മേളനം വിലയിരുത്തി.
◼️മഴമൂലം ദുരിതം അനുഭവിക്കുന്നവരെ സഹായിക്കാന്‍ കോണ്‍ഗ്രസ് പ്രവര്‍ത്തകര്‍ രംഗത്തിറങ്ങണമെന്ന് കെപിസിസി പ്രസിഡന്റ് കെ. സുധാകരന്‍ എംപി ആഹ്വാനം ചെയ്തു.
◼️റെന്റ് എ കാര്‍ ബിസിനസ് നടത്തുന്നവരില്‍നിന്ന് വാടകയ്ക്ക് എടുത്ത കാര്‍ തമിഴ്നാട്ടില്‍ കൊണ്ടുപോയി പൊളിച്ചു വില്‍ക്കുന്ന സംഘത്തിലെ പ്രധാന പ്രതി പിടിയില്‍. തഞ്ചാവൂര്‍ സ്വദേശി സന്തോഷ് കുമാറിനെയാണ് തിരുവനന്തരപുരം പേട്ട പൊലീസ് പിടികൂടിയത്.
◼️മിസിസ് ഇന്ത്യ വേള്‍ഡ് ഫൈനലില്‍ മിസിസ് ബ്യൂട്ടി വിത്ത് ബ്രെയിന്‍ കിരീടം ചേര്‍ത്തല സ്വദേശിനി ഷെറിന്‍ മുഹമ്മദ് ഷിബിന്. ചേര്‍ത്തല പൂത്തോട്ട സ്റ്റാര്‍വ്യൂവില്‍ അബ്ദുല്‍ ബഷീറിന്റെയും സൂസന്ന ബഷീറിന്റെയും മകളാണ് ഷെറിന്‍ മുഹമ്മദ് ഷിബിന്.
◼️കൊച്ചിയില്‍ വന്‍ സ്വര്‍ണവേട്ട. മലപ്പുറം സ്വദേശികളായ അബ്ദുള്‍ ഗഫൂര്‍, അബ്ദുള്‍ റഷീദ് എന്നിവരില്‍ നിന്ന് 1968 ഗ്രാം സ്വര്‍ണം പിടികൂടി. ഗുളിക രൂപത്തില്‍ മലദ്വാരത്തില്‍ ഒളിപ്പിച്ചാണ് സ്വര്‍ണം കൊണ്ടുവന്നത്.
◼️ട്രെയിനില്‍ പാഴ്സല്‍ അയച്ച തൊണ്ടിമുതലായ സ്‌കൂട്ടര്‍ യഥാസമയം ഏറ്റെടുക്കാതെ പിഴയുടെ പുലിവാലു പിടിച്ചു പൊലീസ്. കുറത്തികാട് പൊലീസ് സ്റ്റേഷനിലെ തൊണ്ടിമുതലായ സ്‌കൂട്ടര്‍ കായംകുളം റെയില്‍വേ സ്റ്റേഷനിലെ പാഴ്സല്‍ വിഭാഗത്തിലാണു ഒരു മാസമായി ഇരിക്കുന്നത്. നിശ്ചിത സമയത്തിനുശേഷം ഓരോ മണിക്കൂറിനും 10 രൂപയും ജിഎസ്ടിയും അടയ്ക്കണമെന്നാണു നിയമം. ഇതനുസരിച്ച് 1502 രൂപ അടയ്ക്കണം. എന്നാല്‍ പിഴ അടയ്ക്കാന്‍ തയാറല്ലെന്ന നിലപാടിലാണു പൊലീസ്.
◼️ചെങ്ങന്നൂരില്‍ സ്വകാര്യ ബസില്‍ സ്‌കൂള്‍ വിദ്യാര്‍ഥിനിയെ അപമാനിക്കാന്‍ ശ്രമിച്ച യുവാവിനെ വെണ്മണി പൊലീസ് അറസ്റ്റു ചെയ്തു. കൊല്ലകടവ് കടയിക്കാട് പന്തപ്ലാവില്‍ അനന്തകൃഷ്ണനെയാണ് (24) അറസ്റ്റു ചെയ്തത്.
◼️വിലക്കയറ്റം ചര്‍ച്ച ചെയ്യാമെന്നു സമ്മതിച്ചെങ്കിലും അടിയന്തരമായി ചര്‍ച്ചയ്ക്കെടുക്കാത്തതിനെതിരേ പാര്‍ലമെന്റില്‍ ബഹളം. ലോക്സഭയും രാജ്യസഭയും രണ്ടുമണി വരെ നിര്‍ത്തിവച്ചു. വിലക്കയറ്റം ചര്‍ച്ച ചെയ്യാതെ ലോക്സഭ മറ്റു നടപടികളിലക്കു പ്രവേശിച്ചതാണ് പ്രതിപക്ഷത്തെ ചൊടിപ്പിച്ചത്. നാല് എംപിമാരെ സസ്പെന്‍ഡ് ചെയ്ത നടപടി, സഞ്ജയ് റാവത്ത് എംപിയെ എന്‍ഫോഴ്സ്മെന്റ് അറസ്റ്റു ചെയ്ത സംഭവം, മന്ത്രി സ്മൃതി ഇറാനി മാപ്പു പറയണമെന്ന ആവശ്യം എന്നിങ്ങനെ പല വിഷയങ്ങളും പ്രതിപക്ഷാംഗങ്ങള്‍ ഉയര്‍ത്തി. തൊഴിലുറപ്പ് പദ്ധതി കേന്ദ്രസര്‍ക്കാര്‍ തകര്‍ക്കുവെന്ന് ആരോപിച്ച് രാവിലെ പാര്‍ലമെന്റ് വളപ്പിലെ ഗാന്ധി പ്രതിമക്കു മുന്‍പില്‍ എല്‍ഡിഎഫ് എംപിമാര്‍ പ്രതിഷേധിച്ചിരുന്നു.
◼️പഞ്ചാബില്‍ ജിമ്മില്‍ വ്യായാമം ചെയ്യുകയായിരുന്ന ആം ആദ്മി കൗണ്‍സിലറെ വെടിവച്ചു കൊന്നു. മലേര്‍കോട്ട ജില്ലയിലെ കൗണ്‍സിലര്‍ മുഹമ്മദ് അക്ബര്‍ ആണ് കൊല്ലപ്പെട്ടത്. വ്യക്തിവൈരാഗ്യമാണ് കൊലപാതകത്തിനു കാരണമെന്നാണ് പൊലീസിന്റെ പ്രാഥമിക നിഗമനം.
◼️തനിക്കു പോകാന്‍ വീടില്ലെന്ന് ശ്രീലങ്കന്‍ പ്രസിഡന്റ് റനില്‍ വിക്രമസിംഗെ. തന്നോടു വീട്ടിലേക്കു പോകണമെന്നാണു പ്രതിഷേധക്കാര്‍ പറയുന്നത്. പക്ഷേ, എന്റെ വീട് പ്രതിഷധക്കാര്‍ കത്തിച്ചുകളഞ്ഞു. എല്ലാവരും ചേര്‍ന്ന് രാജ്യത്തെ രക്ഷപ്പെടുത്താനുള്ള ശ്രമമാണു വേണ്ടതെന്നും അദ്ദേഹം പറഞ്ഞു.
◼️കോമണ്‍വെല്‍ത്ത് ഗെയിംസില്‍ ഇന്ത്യക്കു മൂന്നാം സ്വര്‍ണം. ഭാരോദ്വഹനത്തില്‍ അചിന്ത സിയോളിയാണ് സ്വര്‍ണം സ്വന്തമാക്കിയത്. 73 കിലോ വിഭാഗത്തില്‍ ഗെയിംസ് റെക്കോര്‍ഡോടെ 313 കിലോഭാരമാണ് ഉയര്‍ത്തിയത്.
◼️വെസ്റ്റ് ഇന്‍ഡീസിനെതിരായ രണ്ടാം ട്വന്റി 20 മത്സരം ഇന്ന്. അഞ്ച് മത്സരങ്ങളുടെ പരമ്പരയിലെ ആദ്യ മത്സരത്തില്‍ ഇന്ത്യക്കായിരുന്നു വിജയം. ഇന്ത്യന്‍ സമയം രാത്രി എട്ട് മണിക്ക് മത്സരം ആരംഭിക്കും.
◼️രണ്ടു ദിവസം മാറ്റമില്ലാതെ തുടര്‍ന്ന സ്വര്‍ണ വിലയില്‍ ഇടിവ്. പവന് 80 രൂപയാണ് കുറഞ്ഞത്. ഒരു പവന് സ്വര്‍ണത്തിന്റെ ഇന്നത്തെ വില 37,680 രൂപ. ഗ്രാമിന് പത്തു രൂപ കുറഞ്ഞ് 4710 ആയി. കഴിഞ്ഞ രണ്ടു ദിവസമായി പവന് 37760 രൂപയായിരുന്നു സ്വര്‍ണ വില.
◼️തുടര്‍ച്ചയായ നാലാം ആഴ്ചയിലും ഇന്ത്യയുടെ വിദേശ നാണയശേഖരം ഇടിഞ്ഞു. ജൂലായ് 22ന് സമാപിച്ചവാരം 115.2 കോടി ഡോളര്‍ ഇടിഞ്ഞ് ശേഖരം 57,156 കോടി ഡോളറായി. കഴിഞ്ഞ 20 മാസത്തിനിടെയിലെ ഏറ്റവും താഴ്ചയാണിത്. നാലാഴ്ചയ്ക്കിടെ നഷ്ടം 1,700 കോടി ഡോളറോളം. ഡോളറിനെതിരെ രൂപയുടെ തകര്‍ച്ചയുടെ ആക്കംകുറയ്ക്കാന്‍ ശേഖരത്തില്‍ നിന്ന് റിസര്‍വ് ബാങ്ക് വന്‍തോതില്‍ ഡോളര്‍ വിറ്റഴിക്കുന്നതും ഡോളറിനെതിരെ മറ്റ് കറന്‍സികളുടെ മൂല്യം ഇടിയുന്നതുമാണ് വിദേശ നാണയശേഖരം കുറയാന്‍ മുഖ്യകാരണം. വിദേശ കറന്‍സി ആസ്തി 142.6 കോടി ഡോളര്‍ താഴ്ന്ന് 51,013.6 കോടി ഡോളറായി. കരുതല്‍ സ്വര്‍ണശേഖരം ജൂലായ് 22ന് സമാപിച്ചവാരം 14.5 കോടി ഡോളര്‍ വര്‍ദ്ധിച്ച് 3,850.2 കോടി ഡോളറായി. കഴിഞ്ഞ ഒക്ടോബറില്‍ കുറിച്ച 64,?200 കോടി ഡോളറാണ് വിദേശ നാണയശേഖരത്തിന്റെ എക്കാലത്തിന്റെയും ഉയരം.
◼️സുരേഷ് ഗോപി എന്ന നടന്റെ ഗംഭീര തിരിച്ചുവരവെന്ന് പ്രേക്ഷകര്‍ ഒന്നടങ്കം പറഞ്ഞ ചിത്രം പാപ്പന്‍ ഇതുവരെ 11.56 കോടിയാണ് സ്വന്തമാക്കിയിരിക്കുന്നത്. ആദ്യദിനം ചിത്രം 3.16 കോടിയാണ് നേടിയിരുന്നത്. രണ്ടാം ദിനം 3.87 കോടിയും നേടി. രണ്ട് ദിവസം കൊണ്ട് ചിത്രം നേടിയത് 7.03 കോടിയാണ്. സുരേഷ് ഗോപിയുടെ എക്കാലത്തെയും മികച്ച ഓപണിംഗ് കളക്ഷനുകളില്‍ ഒന്നാണ് ഇത്. ഒട്ടുമിക്ക എല്ലാ തിയറ്ററുകളിലും ഹൗസ് ഫുള്‍ ഷോയുമായാണ് പാപ്പന്‍ മുന്നേറുന്നത്. ഒരിടവേളയ്ക്കു ശേഷം സുരേഷ് ഗോപി പൊലീസ് വേഷത്തില്‍ എത്തുന്ന ചിത്രമാണിത്. ഗോകുല്‍ സുരേഷും ചിത്രത്തില്‍ ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്.
◼️നടന്‍ ഉണ്ണി മുകുന്ദന്റേതായി അണിയറയില്‍ ഒരുങ്ങുന്ന ചിത്രമാണ് ‘ഷെഫീക്കിന്റെ സന്തോഷം’. തിരക്കഥ എഴുതി സിനിമ സംവിധാനം ചെയ്യുന്നത് നവാഗതനായ അനൂപ് പന്തളമാണ്. പ്രഖ്യാപന സമയം മുതല്‍ ശ്രദ്ധനേടിയ ചിത്രത്തിന്റെ സെക്കന്‍ഡ് ലുക്ക് മോഷന്‍ പോസ്റ്റര്‍ പുറത്തുവിട്ടിരിക്കുകയാണ് അണിയറ പ്രവര്‍ത്തകര്‍. അറബി വേഷം കെട്ടി ഒട്ടകപ്പുറത്തിരിക്കുന്ന ഉണ്ണി മുകുന്ദനെയാണ് പോസ്റ്ററില്‍ കാണാനാവുക. മേപ്പടിയാന്റെ വിജയത്തിന് ശേഷം ഉണ്ണി മുകുന്ദന്‍ നിര്‍മിക്കുന്ന രണ്ടാമത്തെ ചിത്രം കൂടിയാണ് ‘ഷെഫീക്കിന്റെ സന്തോഷം’. ചിത്രത്തില്‍ അച്ഛനും അഭിനയിക്കുന്ന സന്തോഷം ഉണ്ണി നേരത്തെ പങ്കുവെച്ചിരുന്നു. മനോജ് കെ ജയന്‍, ദിവ്യാ പിള്ള, ബാല, ആത്മീയ രാജന്‍, ഷഹീന്‍ സിദ്ദിഖ്, മിഥുന്‍ രമേശ്, സ്മിനു സിജോ, ജോര്‍ഡി പൂഞ്ഞാര്‍ എന്നിവരും മറ്റ് മുഖ്യവേഷങ്ങളിലുണ്ട്.
◼️ഉല്‍പ്പാദനത്തിനാവശ്യമായ പ്രധാന ഘടകങ്ങളുടെ വിതരണത്തിന്റെ ദൗര്‍ലഭ്യം മൂലം ലോകമെമ്പാടുമുള്ള വാഹന നിര്‍മ്മാതാക്കള്‍ കനത്ത വെല്ലുവിളി നേരിടുകയാണ്. ഇതേ കാരണത്താല്‍ ജര്‍മ്മന്‍ ആഡംബര വാഹന നിര്‍മ്മാതാക്കളായ ഔഡിക്ക് ഉയര്‍ന്ന ഡിമാന്‍ഡ് ലിസ്റ്റ് ഉള്ളതായി റിപ്പോര്‍ട്ട്. വിതരണ ശൃംഖലയിലെ തടസങ്ങള്‍ ഇപ്പോഴും ഒരു ആശങ്കയായി തുടരുന്നതിനാല്‍ ഉപഭോക്തൃ ആവശ്യം ഉയര്‍ന്നു. ഔഡിയുടെ പ്രീമിയം മോഡലുകള്‍ക്ക് ആവശ്യാനുസരണം ഉയര്‍ന്ന ഡിമാന്‍ഡാണ്. അടുത്ത ഏഴ് മാസം മുതല്‍ ഒരു വര്‍ഷം വരെ ഔഡിയുടെ ഓര്‍ഡര്‍ ബുക്കുകള്‍ നിറഞ്ഞിരിക്കുകയാണ്. ഔഡിയുടെ പ്രവര്‍ത്തന ലാഭം 4.9 ബില്യണ്‍ യൂറോ എന്ന പുതിയ ഉയരത്തിലെത്തി.
◼️വ്യക്തിജീവിതത്തിലെ പ്രയാസങ്ങള്‍ തളര്‍ത്തിയെങ്കിലും അതിനെയെല്ലാം കരുത്തോടെ അതിജീവിച്ച, തന്റെ സ്വപ്നസാഷാത്കാരത്തിനായി കഠിനാദ്ധ്വാനം ചെയ്ത ജെ.കെ.റൗളിങ്ങിന്റെ നിശ്ചയദാര്‍ഢ്യത്തിന്റെ ഫലമാണ് അവരുടെ നേട്ടങ്ങള്‍ എല്ലാം. ജീവിതത്തില്‍ കഠിനപ്രയത്നത്തിലൂടെ മുന്നേറാന്‍, തിരിച്ചടികളെ നേരിടാന്‍, സ്വപ്നങ്ങളെ മുറുകെപ്പിടിക്കാന്‍ ആരെയും പ്രചോദിപ്പിക്കുന്നതാണ് ജെ.കെ.റൗളിങ്ങിന്റെ ജീവിതകഥ. ഇംഗ്ലണ്ടിലെ ഒരു സാധാരണ കുടുംബത്തില്‍ പിറന്ന ജൊവാന്‍ ലോകമാദരിക്കുന്ന ജെ.കെ.റൗളിങ്ങായി മാറിയ കഥ. ‘ജെ കെ റൗളിങ്’. മഞ്ജുളമാല എം വി. മാതൃഭൂമി ബുക്സ്. വില 152 രൂപ.
◼️ഇന്ന് ഓഗസ്റ്റ് 1. ലോക ശ്വാസകോശ അര്‍ബുദ ദിനം. ശ്വാസകോശാര്‍ബുദ സാധ്യത കുറയ്ക്കാന്‍ ഭക്ഷണങ്ങള്‍ വഹിക്കുന്ന പങ്ക് വളരെ വലുതാണ്. വിറ്റാമിന്‍ ഡി കൂടുതലുള്ള ഭക്ഷണക്രമം ശ്വാസകോശ അര്‍ബുദമുള്ളവര്‍ക്കും ചില ഗുണങ്ങള്‍ നല്‍കിയേക്കാം. സാല്‍മണ്‍, അയല, മത്തി തുടങ്ങിയ കൊഴുപ്പുള്ള മത്സ്യങ്ങളില്‍ അടങ്ങിയിരിക്കുന്ന വിറ്റാമിന്‍ ഡിക്ക് മറ്റ് ആരോഗ്യ ഗുണങ്ങളുണെന്ന് പഠനങ്ങള്‍ പറയുന്നു. ബ്രൊക്കോളി ഭക്ഷണത്തില്‍ ഉള്‍പ്പെടുത്തുന്നത് ശ്വാസകോശാര്‍ബുദ സാധ്യത തടയാന്‍ സഹായിക്കും. ബ്ലൂബെറി, റാസ്ബെറി, ബ്ലാക്ക്ബെറി, ക്രാന്‍ബെറി തുടങ്ങിയ ബെറികളില്‍ ആന്തോസയാനിഡിന്‍സ് എന്നറിയപ്പെടുന്ന സംയുക്തങ്ങള്‍ അടങ്ങിയിട്ടുണ്ട്. രക്തം കട്ടപിടിക്കുന്നത് തടയാന്‍ ആന്തോസയാനിഡിന്‍സ് സഹായിക്കുമെന്ന് പഠനങ്ങള്‍ പറയുന്നു. മറ്റൊരു ഭക്ഷണമാണ് തക്കാളി. തക്കാളിയില്‍ അടങ്ങിയിരിക്കുന്ന ‘ലൈക്കോപീന്‍’ ആണ് ഇതിന് സഹായിക്കുന്നത്. തക്കാളി പോഷകങ്ങളുടെയും വിറ്റാമിനുകളുടെയും കലവറയാണ്. ക്ലോറോജെനിക് ആസിഡ് എന്നറിയപ്പെടുന്ന ഫൈറ്റോകെമിക്കലിന്റെ മികച്ച ഉറവിടമാണ് ക്യാരറ്റ്. ക്യാരറ്റ് കഴിക്കുന്നത് ശ്വാസകോശ അര്‍ബുദ സാധ്യത കുറയുന്നതുമായി ബന്ധപ്പെട്ടിരിക്കുന്നു, കാരറ്റ് കഴിക്കുന്നത് ശ്വാസകോശ അര്‍ബുദ സാധ്യത 42% വരെ കുറയ്ക്കുമെന്ന് സൂചിപ്പിക്കുന്നു. ഭക്ഷണത്തില്‍ മഞ്ഞള്‍ ധാരാളമായി ഉള്‍പ്പെടുത്താം. മഞ്ഞളിലടങ്ങിയ കുര്‍ക്കുമിന്‍ ശ്വാസകോശ ക്യാന്‍സര്‍ സാധ്യതയെ കുറയ്ക്കും. ഇഞ്ചിയും ഭക്ഷണത്തില്‍ ധാരാളമായി ഉള്‍പ്പെടുത്താം. ശ്വാസ നാളിയിലുണ്ടാകുന്ന അണുബാധ തടയാന്‍ ഇവയ്ക്ക് കഴിയുമെന്നാണ് പഠനങ്ങള്‍ പറയുന്നത്. ശ്വാസകോശ ക്യാന്‍സര്‍ സാധ്യത കുറയ്ക്കാന്‍ ഗ്രീന്‍ ടീ മികച്ചതായി പഠനങ്ങള്‍ പറയുന്നു.
*ഇന്നത്തെ വിനിമയ നിരക്ക്*
ഡോളര്‍ – 79.11, പൗണ്ട് – 96.52, യൂറോ – 80.95, സ്വിസ് ഫ്രാങ്ക് – 83.13, ഓസ്‌ട്രേലിയന്‍ ഡോളര്‍ – 55.54, ബഹറിന്‍ ദിനാര്‍ – 209.79, കുവൈത്ത് ദിനാര്‍ -257.86, ഒമാനി റിയാല്‍ – 205.43, സൗദി റിയാല്‍ – 21.06, യു.എ.ഇ ദിര്‍ഹം – 21.53, ഖത്തര്‍ റിയാല്‍ – 21.72, കനേഡിയന്‍ ഡോളര്‍ – 61.86.