കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ രാജിവെച്ചത് ഇന്ത്യൻ യുവതയുടെയും വിദ്യാർത്ഥി സമൂഹത്തിന്റെയും വലിയ വിജയമാണെന്ന് എ ഐ സി സി സംഘടനാ ജനറൽ സെക്രട്ടറി കെ സി വേണുഗോപാൽ. മോദി സർക്കാരിന്റെ ധാർഷ്ട്യത്തിനേറ്റ കനത്ത തിരിച്ചടിയാണ് ഈ രാജിയെന്നും, അടി തെറ്റിയാൽ എത്ര വലിയ അധികാരികളും വീഴുമെന്നതിന്റെ തെളിവാണ് കേന്ദ്ര സർക്കാരിന്റെ ഈ മുട്ടുമടക്കലെന്നും അദ്ദേഹം പറഞ്ഞു. വിദ്യാർഥികളുടെ ഭാവിയുവെച്ച് കളിച്ച് അവരെ കഷ്ടപ്പെടുത്തിയ കേന്ദ്ര സർക്കാർ ഈ രാജി നേരത്തെ തീരുമാനിച്ചിരുന്നെങ്കിൽ പ്രശ്നങ്ങൾ നേരത്തെ അവസാനിക്കുമായിരുന്നുവെന്നും അദ്ദേഹം കുറ്റപ്പെടുത്തി. അനീതിക്കെതിരെ തെരുവിലിറങ്ങിയ യുവതയ്ക്ക് പിന്നിൽ അണിനിരക്കാൻ കഴിഞ്ഞതിൽ കോൺഗ്രസിന് അഭിമാനമുണ്ടെന്ന് വ്യക്തമാക്കിയ കെ സി വേണുഗോപാൽ, പ്രതിപക്ഷ പ്രക്ഷോഭം ഇവിടെ അവസാനിക്കുന്നില്ലെന്നും വിവരിച്ചു.
