ബൈക്ക് പ്രേമികള്‍ക്ക് സന്തോഷ വാര്‍ത്തയുമായി എത്തിയിരിക്കുകയാണ് ജാവ യെസ്ഡി മോട്ടോര്‍സൈക്കിള്‍. ഇത്തവണ കമ്പനിയുടെ ഏറ്റവും കൂടുതല്‍ വിറ്റഴിക്കപ്പെടുന്ന രണ്ട് മോഡലുകളായ ജാവ 42 സ്‌പോര്‍ട്‌സ് സ്‌ട്രൈപ്പ്, യെസ്ഡി റോഡ്സ്റ്റര്‍ എന്നിവയുടെ ഏറ്റവും പുതിയ കളര്‍ വേരിയന്റുകളിലുള്ള ബൈക്കുകളാണ് വിപണിയില്‍ അവതരിപ്പിച്ചത്. പുതിയ നിറങ്ങളില്‍ അവതരിപ്പിച്ചതോടെ, രണ്ട് ബൈക്കുകളെയും കൂടുതല്‍ ജനപ്രിയമാക്കാന്‍ സാധിക്കുമെന്നാണ് വിലയിരുത്തല്‍. ജാവ 42 സ്‌പോര്‍ട്‌സ് സ്‌ട്രൈപ്പിന് കോസ്മിക് കാര്‍ബണ്‍ ഷേഡ് ആണ് നല്‍കിയിട്ടുള്ളത്. ഈ മോഡല്‍ ബൈക്കുകളുടെ എക്‌സ് ഷോറൂം വില 1,95,142 രൂപയാണ്. അതേസമയം, ഗ്ലോസ് ഫിനിഷിലുള്ള ക്രിംസണ്‍ ഡ്യുവല്‍ ടോണാണ് യെസ്ഡി റോഡ്സ്റ്റര്‍ ശ്രേണിക്ക് നല്‍കിയിരിക്കുന്നത്. 2,03,829 രൂപയാണ് ഇവയുടെ എക്‌സ് ഷോറൂം വില. നിലവില്‍, ഇന്ത്യയിലുടനീളം 400 ടച്ച് പോയിന്റുകളാണ് കമ്പനിക്ക് ഉള്ളത്.