അരവിന്ദ് കെജ്രിവാളിന്‍റെ പിഎ ബിഭവ് കുമാറിനെതിരെ പൊലീസ് കേസെടുത്തു

അരവിന്ദ് കെജ്രിവാളിനെ സന്ദർശിക്കാൻ വസതിയിലെത്തിയ രാജ്യസഭാംഗം സ്വാതി മലിവാളിനെ അദ്ദേഹത്തിന്റെ പഴ്സനൽ അസിസ്റ്റന്റ് ബിഭവ് കുമാർ കയ്യേറ്റം ചെയ്തെന്ന പരാതിയെ തുടർന്ന് പൊലീസ് കേസെടുത്തു. സ്വാതി തന്നെ ഇക്കാര്യം പൊലീസ് കൺട്രോൾ റൂമിൽ വിളിച്ചു പരാതിപ്പെട്ടു. എന്നാൽ ഔദ്യോഗികമായി പരാതി നൽകിയിരുന്നില്ല. വ്യാഴാഴ്ച ഉച്ചയ്ക്ക് ദില്ലി പൊലീസിന്റെ ഒരു സംഘം സ്വാതിയുടെ വസതിയിലെത്തി മൊഴിയെടുത്തതിന് പിന്നാലെ സ്വാതി പരാതി നല്‍കുകയായിരുന്നു. അതോടൊപ്പം സ്വാതി മാലിവാളിന്റെ ആരോപണത്തില്‍ ബിഭവ് കുമാറിനെ വനിതാ കമ്മിഷന്‍ മൊഴിയെടുക്കാനായി വിളിപ്പിച്ചിട്ടുണ്ട്. മാധ്യമ വാർത്തകളുടെ അടിസ്ഥാനത്തിൽ വനിതാ കമ്മിഷന്‍ കേസിൽ സ്വമേധയാ ഇടപെടുകയായിരുന്നു.