പ്രേതനഗരങ്ങള്‍പോലെയാണ് പുസ്തകങ്ങള്‍ പലതും. വായിച്ചുതീര്‍ത്താലും താളുകളില്‍നിന്ന് ഭൂതാവിഷ്ടരുടെ വിലാപങ്ങള്‍ കണക്കെ ഓര്‍മ്മകള്‍ ഉതിര്‍ന്നുകൊണ്ടിരിക്കും. പ്രണയജിന്നുകളുടെ താളുകളില്‍നിന്നും അങ്ങനെ ഉയരുന്നുണ്ട്. ഉന്മാദത്തിന്റെയും വിഷാദത്തിന്റെയും നിഗൂഢതയുടെയും ആവിച്ചുരുളുകള്‍… ഭ്രമത്തിന്റെയും ഭയത്തിന്റെയും അടരുകള്‍ക്കിടയിലൂടെ കഥപ്രണയം വച്ചുനീട്ടുമ്പോഴും മനസ്സ് ഉടക്കിപ്പോകുന്നത് വിഭ്രാന്തിയുടെ ആ കെണിത്തുഞ്ചത്താകാം. വായനയുടെ വഴിയില്‍ കഥ കൈയേറുകയാണ് ജിന്നുകള്‍… കാലത്തിന്റെ പെരുങ്കടല്‍ കടന്നുവന്നവര്‍. ‘പ്രണയ ജിന്നുകള്‍’. റിഹന്‍ റഷീദ്. ഡിസി ബുക്‌സ്. വില 332 രൂപ.