കോമഡി ഫാമിലി എന്റര്ടെയ്നറുമായി പതിനാറ് വര്ഷങ്ങള്ക്ക് ശേഷം എവെര്ഗ്രീന് ഗ്യാങ്ന്റെ ‘പാതിരാക്കുറുക്കന്’ എന്ന ചിത്രത്തിന്റെ ഒഫീഷ്യല് ഫസ്റ്റ് ലുക്ക് പോസ്റ്റര് റിലീസായി. ജഗദീഷ്, മുകേഷ്, സിദ്ദിഖ്, അശോകന് എന്നിവരെ കേന്ദ്ര കഥാപാത്രങ്ങളാക്കി നവാഗതനായ ജയേഷ് വേണുഗോപാല് സംവിധാനം ചെയ്യുന്ന ചിത്രം സെപ്റ്റംബറില് പ്രദര്ശനത്തിനെത്തും. തികച്ചും വ്യത്യസ്തമായ സാഹചര്യങ്ങളില് നിന്നും വരുന്ന നാലുപേര് അപ്രതീക്ഷിതമായി ഒരു വലിയ പ്രതിസന്ധിയില് ചെന്നുപെടുന്നതും, തുടര്ന്നുള്ള അവരുടെ അതിജീവനവും നര്മ്മത്തിന്റെ പശ്ചാത്തലത്തില് അവതരിപ്പിക്കുന്ന ചിത്രമാണ് പാതിരാകുറുക്കന്. ഇവരെക്കൂടാതെ ഇന്ദ്രന്സ്, നിര്മല് പാലാഴി, വിനീത് തട്ടില്, റിയാസ് നര്മ്മകല, സുധീര് പറവൂര്, കുട്ടി അഖില്, അനീഷ് ഗോപാല്, ടെസ്സ ജോസഫ്, അജയന് മാടയ്ക്കല് എന്നിവര്ക്കൊപ്പം സോഷ്യല് മീഡിയ ഇന്ഫ്ലുവെന്സെഴ്സ് ആയ അശ്വിത-അശ്വിജ എന്നിവരും ചിത്രത്തില് ശ്രദ്ധേയ വേഷങ്ങളിലെത്തുന്നു.
