സ്‌പോര്‍ട്ടി മാക്‌സി-സ്‌കൂട്ടറായ എയറോക്‌സ് 155 -ന്റെ 2025 പതിപ്പിനെ യമഹ ഇന്ത്യയില്‍ പുറത്തിറക്കി. ജാപ്പനീസ് വാഹന ഭീമന്‍ പുതിയ ഒബിഡി-2ബി എമിഷന്‍ മാനദണ്ഡങ്ങള്‍ പാലിക്കുകയും സ്‌കൂട്ടറിന്റെ ടോപ്പ് സ്‌പെക്ക് എസ് വേരിയന്റില്‍ ചില വിഷ്വല്‍ മാറ്റങ്ങള്‍ വരുത്തുകയും ചെയ്തിട്ടുണ്ട്. നിലവിലുണ്ടായിരുന്ന ഗ്രേ വെര്‍മില്യണ്‍ കളര്‍ ഷേഡിന് പകരമായി പുതിയ ഐസ് ഫ്‌ലൂ വെര്‍മില്യണ്‍ കളര്‍ ഓപ്ഷനില്‍ എയറോക്‌സ് 155 എസ് പതിപ്പ് ഇപ്പോള്‍ ലഭ്യമാണ്. വളരെ ജനപ്രിയമായ റേസിംഗ് ബ്ലൂ ഷെയ്ഡ് സ്‌കൂട്ടറില്‍ യമഹ നിലനിര്‍ത്തിയിട്ടുണ്ട്, പക്ഷേ അപ്ഡേറ്റ് ചെയ്ത ഗ്രാഫിക്‌സുമായിട്ടാണ് ഇത് വരുന്നത്. മാക്‌സി സ്‌കൂട്ടറിനെ കൂടുതല്‍ ആകര്‍ഷകമാക്കി നിലനിര്‍ത്താന്‍ ഇത് സഹായിക്കുന്നു. അതേസമയം, സ്റ്റാന്‍ഡേര്‍ഡ് മോഡല്‍ മെറ്റാലിക് ബ്ലാക്ക് കളറില്‍ തന്നെ വില്‍പ്പനയില്‍ തുടരും. മാക്‌സി സ്‌കൂട്ടറിന്റെ വിലകളെ സംബന്ധിച്ചിടത്തോളം, സ്റ്റാന്‍ഡേര്‍ഡ്, എസ് മോഡലുകള്‍ക്ക് യഥാക്രമം 1,50,130 രൂപയും 1,53,430 രൂപയുമാണ്.