കഴിഞ്ഞ വര്‍ഷം യുഎഇയില്‍ ഏറ്റവും ജനകീയമായ മൊബൈല്‍ ആപ്ലിക്കേഷന്‍ എന്ന സ്ഥാനം ടിക്‌ടോക്ക് സ്വന്തമാക്കി. സെന്‍സര്‍ ടവേഴ്‌സ് സ്‌റ്റേറ്റ് ഓഫ് മൊബൈല്‍ 2025 റിപ്പോര്‍ട്ടിലാണ് ഇക്കാര്യം വെളിപ്പെടുത്തിയിരിക്കുന്നത്. ചൈനീസ് നിയന്ത്രണത്തിലുള്ള ടിക്ടോക്കില് താമസക്കാര്‍ ഓരോ ദിവസവും ശരാശരി രണ്ട് മണിക്കൂര്‍ ചെലവഴിക്കുന്നുവെന്നും റിപ്പോര്‍ട്ടില്‍ പറയുന്നു. രാജ്യത്തെ 1.12 കോടി ജനങ്ങള്‍ 763 കോടി മണിക്കൂറാണ് കഴിഞ്ഞ വര്‍ഷം ടിക്ടോക്കില് ചിലവഴിച്ചത്. ഇതനുസരിച്ച് ഓരോ താമസക്കാരനും 700 മണിക്കൂര്‍ സമയം ഇത് ഉപയോഗിച്ചിട്ടുണ്ട്. റിപ്പോര്‍ട്ടിലെ പട്ടികയില്‍ രണ്ടാം സ്ഥാനത്തെത്തിയത് ദുബൈ ആസ്ഥാനമായ ടെലഗ്രാം ആപ്പാണ്. ഓരോ ദിവസവും ശരാശരി ഒരു മണിക്കൂറാണ് ടെലഗ്രാമില്‍ താമസക്കാര്‍ ചെലവഴിക്കുന്നത്. വാട്‌സാപ്പ്, എം.എക്‌സ് പ്ലയര്‍, ഗൂഗ്ള്‍ മാപ്‌സ്, പ്ലേഇറ്റ്, ജീമെയില്‍ എന്നിവയാണ് ഇതിന് പിറകിലായി സ്ഥാനം പിടിച്ച ആപ്പുകള്‍. അതേപോലെ, യു.എ.ഇയിലുള്ളവര്‍ ഓണ്‍ലൈനിലായിരിക്കുമ്പോള്‍ മിക്ക സമയവും ചെലവഴിക്കുന്നത് സോഷ്യല്‍ മീഡിയ ആപ്പുകളിലാണെന്നും റിപ്പോര്‍ട്ടില്‍ പറയുന്നു. എ.ഐ ചാറ്റ് ബോട്ട്‌സ്, സോഫ്റ്റ്‌വെയര്‍ എന്നിവയാണ് പിന്നാലെയുള്ളത്.