പട്ടാപ്പകൽ യുവതിയെ വീട്ടിൽക്കയറി വെടിവെച്ച വനിതാ ഡോക്ടർ ആക്രമണത്തിനായി നടത്തിയത് മാസങ്ങൾ നീണ്ട തയ്യാറെടുപ്പെന്ന് വിവരം. എയർപിസ്റ്റൾ ഉപയോഗിക്കുന്നതും വെടിവെക്കുന്നതും ഇതിന്റെ ആഘാതത്തെക്കുറിച്ചുമെല്ലാം ഇന്റർനെറ്റിലൂടെ മാസങ്ങളോളം പഠിച്ചശേഷമാണ് പ്രതിയായ ഡോ. ദീപ്തി മോൾ ജോസ് ആക്രമണം നടത്തിയതെന്നാണ് പോലീസ് പറയുന്നത്. ഞായറാഴ്ച രാവിലെയാണ് ഡോ. ദീപ്തി, ചെമ്പകശ്ശേരിയിലെ ഷിനിയുടെ വീട്ടിലെത്തി വെടിയുതിർത്തത്. കൊറിയർ നൽകാനെന്ന വ്യാജേന വീട്ടിലെത്തി എയർപിസ്റ്റൾ ഉപയോഗിച്ച് വെടിവയ്ക്കുകയായിരുന്നു. കൃത്യം നടന്ന് മൂന്നാംദിവസം അന്വേഷണസംഘം പ്രതിയെ കൈയോടെ പിടികൂടുകയായിരുന്നു.
