ബോക്‌സ്ഓഫിസില്‍ റെക്കോര്‍ഡുകള്‍ തിരുത്തി മുന്നേറുമ്പോള്‍ ആരാധകരെ ആവേശത്തിലാക്കുന്ന മറ്റൊരു വാര്‍ത്തയുമായി ‘പുഷ്പ 2’ ടീം. ജനുവരി 17 മുതല്‍ 20 മിനിറ്റ് അധികമുള്ള സിനിമയുടെ പുതിയ പതിപ്പ് ആകും പ്രദര്‍ശിപ്പിക്കുക. റീലോഡഡ് വേര്‍ഷന്‍ എന്ന ക്യാപ്ഷനോടെയാണ് നിര്‍മാതാക്കള്‍ ഈ വിവരം പങ്കുവച്ചിരിക്കുന്നത്.ഇതോടെ, ചിത്രത്തിന്റെ ദൈര്‍ഘ്യം മൂന്ന് മണിക്കൂര്‍ 40 മിനിറ്റ് ആയി ഉയരും. സിനിമയില്‍ നിന്നും കട്ട് ചെയ്തു കളഞ്ഞ ചില പ്രധാനപ്പെട്ട രംഗങ്ങള്‍ പുതിയ പതിപ്പിലുണ്ടാകുമെന്നാണ് റിപ്പോര്‍ട്ട്. മൂന്ന് മണിക്കൂര്‍ 20 മിനിറ്റായിരുന്നു ആദ്യം പുറത്തിറങ്ങിയ പതിപ്പിന്റെ ദൈര്‍ഘ്യം. ചിത്രത്തിന്റെ പുതിയ ടീസറില്‍ ഈ രംഗങ്ങളുെട ചില ഗ്ലിംപ്‌സുകള്‍ ഉള്‍പ്പെടുത്തിയിട്ടുണ്ട്. ഇന്ത്യന്‍ സിനിമാ ലോകത്ത് തന്നെ അതിവേഗം 1000 കോടി കലക്ഷന്‍ നേടുന്ന ചിത്രമായി മാറിയ ‘പുഷ്പ 2: ദ റൂള്‍’ 32 ദിവസം കൊണ്ട് 1831 കോടി ആഗോള കലക്ഷന്‍ സ്വന്തമാക്കി കഴിഞ്ഞു. ഇതോടെ ബാഹുബലി 2ന്റെ കലക്ഷനെയും ചിത്രം മറികടന്നു. 2000 കോടി കലക്ഷന്‍ നേടിയ ആമിര്‍ ഖാന്‍ ചിത്രം ദങ്കല്‍ ആണ് ഇന്ത്യയിലെ ഏറ്റവും വലിയ പണംവാരി ചിത്രം.