ജാപ്പനീസ് ഇരുചക്ര വാഹന ബ്രാന്‍ഡായ സുസുക്കി മോട്ടോര്‍സൈക്കിള്‍ ഇന്ത്യ 2023 ജൂലൈയില്‍ 1,07,836 യൂണിറ്റുകളുടെ വില്‍പ്പന കണക്കുകള്‍ റിപ്പോര്‍ട്ട് ചെയ്തു. സുസുക്കി മോട്ടോര്‍സൈക്കിള്‍ ഇന്ത്യ ഒരു ലക്ഷത്തിലധികം പ്രതിമാസ വില്‍പ്പന രേഖപ്പെടുത്തുന്നത് ഇതാദ്യമാണെന്നാണ് റിപ്പോര്‍ട്ടുകള്‍. ഈ കണക്കില്‍ ആഭ്യന്തര വിപണിയില്‍ വിറ്റ 80,309 യൂണിറ്റുകളും 2023 ജൂലൈയില്‍ അന്താരാഷ്ട്ര വിപണികളിലേക്ക് കയറ്റുമതി ചെയ്ത 27,527 യൂണിറ്റുകളും ഉള്‍പ്പെടുന്നു. 2022 ജൂലൈയെ അപേക്ഷിച്ച് ഏകദേശം 41.5 ശതമാനം വാര്‍ഷിക വില്‍പ്പന വളര്‍ച്ച കമ്പനിക്ക് ലഭിച്ചു. ആക്സസ് 125ന്റെ ഉല്‍പ്പാദനം അമ്പത് ലക്ഷം തികിഞ്ഞു എന്ന നാഴികക്കല്ലും കമ്പനി സ്വന്തമാക്കി. ഹരിയാനയിലെ ഗുരുഗ്രാമില്‍ സ്ഥിതി ചെയ്യുന്ന ഖേര്‍ക്കി ധൗല പ്ലാന്റില്‍ നിന്ന് അമ്പത് ലക്ഷം തികിഞ്ഞ ആക്സസ് 125 സുസുക്കി പുറത്തിറക്കി. 125 സിസി സ്‌കൂട്ടര്‍ സെഗ്മെന്റില്‍ ജനപ്രിയമായിക്കൊണ്ടിരിക്കുന്നതിനാല്‍ സുസുക്കിക്ക് ആക്സസ് 125 ഒരു പ്രധാന ഉല്‍പ്പന്നമാണ്.