സെപ്റ്റംബര് പാദഫലം പുറത്തുവന്നപ്പോള് ഏവിയേഷന് രംഗത്തെ മുന്നിരക്കാരായ സ്പൈസ്ജെറ്റും ഇന്ഡിഗോയും വലിയ നഷ്ടത്തിലേക്ക് കൂപ്പുകുത്തുന്നുവെന്ന സൂചനയാണ് നല്കുന്നത്. രണ്ടാംപാദത്തില് സ്പൈസ്ജെറ്റിന്റെ വരുമാനം ഇടിയുകയും നഷ്ടം വര്ധിക്കുകയും ചെയ്തു. കമ്പനിയുടെ വരുമാനം മുന് വര്ഷം സമാനപാദത്തിലെ 915 കോടി രൂപയില് നിന്ന് 13 ശതമാനം താഴ്ന്ന് 792 കോടിയായി. ഈ പാദത്തില് നഷ്ടത്തിലും വര്ധനയുണ്ടായി. 2024 സെപ്റ്റംബര് പാദത്തില് 458 കോടി രൂപയായിരുന്നു നഷ്ടമെങ്കില് ഇപ്പോഴത് 621 കോടി രൂപയായി. ഇതിനിടെ കമ്പനിയുമായി ബന്ധപ്പെട്ട ഇടപാടുകള് കോടതിയിലുമെത്തിയിരുന്നു. ഇന്ഡിഗോയും സെപ്റ്റംബര് പാദത്തില് കനത്ത നഷ്ടം നേരിട്ടു. ജൂലൈ-സെപ്റ്റംബര് പാദത്തില് നഷ്ടം 2,582 കോടി രൂപയാണ്. മുന് വര്ഷം സമാനപാദത്തിലെ നഷ്ടം 986.7 കോടി രൂപയാണ്. സെപ്റ്റംബര് പാദത്തില് വരുമാനം 9.3 ശതമാനം വര്ധിച്ചിരുന്നു. ചെലവ് വര്ധിച്ചതാണ് നഷ്ടത്തിന്റെ ആഘാതം കൂടാന് കാരണം. മുന് വര്ഷത്തെ 16,970 കോടിയില് നിന്ന് 18,555 കോടി രൂപയായിട്ടാണ് വരുമാനം ഉയര്ന്നത്. വിമാന ഇന്ധന വില അടക്കം കൂടിയത് ചെലവ് കൂടാന് ഇടയാക്കി.
