മുകേഷ് അംബാനി കുടുംബം കഴിഞ്ഞ വര്‍ഷം സ്വന്തമാക്കിയ മൂന്നാമത്തെ റോള്‍സ് റോയ്സ് കള്ളിനന്റെ പെയിന്റിനു മാത്രം ഒരു കോടിയിലേറെ ചെലവായെന്ന് റിപ്പോര്‍ട്ട്. ടസ്‌കന്‍ സണ്‍ കളറാണ് പുതിയ റോള്‍സ് റോയ്സിന് നല്‍കിയിരിക്കുന്നത്. പ്രത്യേകം കസ്റ്റമൈസേഷനും ഇഷ്ട നമ്പറുമൊക്കെ ചേര്‍ന്നതോടെ വലിയ തുകയാണ് ഈ കാറിനു മുടക്കേണ്ടി വന്നത്. പ്രത്യേകം നിര്‍മിച്ച 21 ഇഞ്ച് വീലുകളാണ് കള്ളിനനില്‍ ഉള്ളത്. വാര്‍ത്താ ഏജന്‍സി പിടിഐയുടെ റിപ്പോര്‍ട്ടു പ്രകാരം അംബാനിയുടെ റോള്‍സ് റോയ്സ് കള്ളിനന് 13.14 കോടി രൂപയാണ് വില. അടിസ്ഥാന വില 6.8 കോടി രൂപയാണെങ്കിലും വാഹനത്തിന്റെ കസ്റ്റമൈസേഷനുകളാണ് വില പിന്നെയും കൂട്ടിയത്. വാഹനത്തിന് 0001 എന്ന നമ്പറാണുള്ളത്. ഇതിനുവേണ്ടി മാത്രം റീജനല്‍ ട്രാസ്പോര്‍ട്ട് ഓഫീസ് 12 ലക്ഷം രൂപ ഈടാക്കി. 20 ലക്ഷം രൂപയാണ് നികുതി അടച്ചിട്ടുള്ളത്. 2037 ജനുവരി വരെയുള്ള റജിസ്ട്രേഷനും റോഡ് സുരക്ഷാ നികുതിയായി 40,000 രൂപയും അടച്ചിട്ടുണ്ട്. റോള്‍സ് റോയ്സ് ഫാന്റം ഡ്രോപ്ഹെഡ് കൂപ്പെ, 13 കോടി വിലയുള്ള പുതു തലമുറ ഫാന്റം എക്സ്റ്റെന്‍ഡഡ് വീല്‍ബേയ്സ് എന്നിവക്കു പുറമേയാണ് മൂന്ന് റോള്‍സ് റോയ്സ് കള്ളിനന് എസ്.യു.വികളുമുള്ളത്.