മ്യൂച്വല്‍ ഫണ്ടില്‍ മാസം തോറും നിശ്ചിതുക നിക്ഷേപിക്കുന്നവരുടെ എണ്ണത്തില്‍ റെക്കോഡ് വര്‍ധനവ്. മ്യൂച്വല്‍ ഫണ്ടില്‍ സിസ്റ്റമാറ്റിക് ഇന്‍വെസ്റ്റ്‌മെന്റ് പ്ലാന്‍ വഴി നിക്ഷേപം നടത്തിയവരുടെ എണ്ണം ജൂലൈയില്‍ എക്കാലത്തെയും ഉയര്‍ന്ന നിരക്കായ 15,245 കോടി രൂപയിലെത്തി. ജൂലൈയിലെ പ്രതിമാസ എസ്ഐപി വിഹിതം ജൂണിലെ വിഹിതത്തേക്കാള്‍ (14,734 കോടി രൂപ) കൂടുതലാണ്, മെയ് മാസത്തിലെ സിസ്റ്റമാറ്റിക് ഇന്‍വെസ്റ്റ്‌മെന്റ് പ്ലാന്‍വഴിയുള്ള നിക്ഷേപം 14,749 കോടി രൂപയായിരുന്നു. ചെറുകിട നിക്ഷേപകരുടെ താല്‍പര്യം കുതിച്ചുയര്‍ന്നതോടെയാണ് റെക്കോഡ് നേട്ടത്തിലെത്തിയത്. 33 ലക്ഷത്തിലധികം പുതിയ എസ്ഐപി അക്കൗണ്ടുകള്‍ രജിസ്റ്റര്‍ ചെയ്യുകയും, പ്രതിമാസ സംഭാവനയായി 15,215 കോടി രൂപയുടെ റെക്കോര്‍ഡ് നേട്ടം നേടുകയും ചെയ്തതായി ആംഫി അറിയിച്ചു.
2022 ഒക്ടോബര്‍ മുതല്‍ എസ്ഐപി വഴിയുള്ള നിക്ഷേപം 13,000 കോടി രൂപയ്ക്ക് മുകളിലാണ്. ഇതോടെ, നടപ്പു സാമ്പത്തിക വര്‍ഷത്തെ ആദ്യ നാല് മാസങ്ങളില്‍ (ഏപ്രില്‍-ജൂലൈ മാസങ്ങളില്‍) മൊത്തം നിക്ഷേപം ഏകദേശം 58,500 കോടി രൂപയിലെത്തി. എസ്ഐപി മ്യൂച്വല്‍ ഫണ്ടുകള്‍ വാഗ്ദാനം ചെയ്യുന്ന ഒരു നിക്ഷേപ രീതിയാണ്. ഇതില്‍ ഒരു വ്യക്തിക്ക് നിശ്ചിത ഇടവേളകളില്‍ നിശ്ചിത തുക നിക്ഷേപിക്കാവുന്നതാണ്. പ്രതിമാസം 500 രൂപ മുതല്‍ നിക്ഷേപിക്കുകയും ചെയ്യാം. അതേസമയം ജൂലൈയില്‍ ഇക്വിറ്റി മ്യൂച്വല്‍ ഫണ്ടുകള്‍ പ്രതിമാസം 12 ശതമാനം ഇടിവ് രേഖപ്പെടുത്തി. മുന്‍ മാസത്തെ 8,637 കോടിയില്‍ നിന്ന് ജൂലൈയില്‍ 7,626 കോടി രൂപയിലേക്ക് നിക്ഷേപം കുറഞ്ഞു.