ഇന്ത്യയെ ഒരൊറ്റ രാഷ്ട്രമായി നിലനിര്‍ത്തുന്നതില്‍ പ്രധാന പങ്കുവഹിച്ച നായകന്മാരെക്കുറിച്ചൊരു സിനിമയൊരുങ്ങുന്നു.
കശ്മീര്‍ ഫയല്‍സ് എന്ന ചിത്രത്തിലൂടെ പ്രശസ്തനായ സംവിധായകൻ വിവേക് അഗ്നിഹോത്രിയും മറ്റ്
ആറ് സംവിധായകരും ഒരുക്കുന്ന ഈ സിരീസിന് വണ്‍ നേഷന്‍ എന്നാണ് പേരിട്ടത്. പ്രിയദര്‍ശന്‍, ഡോ. ചന്ദ്ര പ്രകാശ് ദ്വിവേദി, ജോണ്‍ മാത്യു മാത്തന്‍, മജു ബൊഹറ, സഞ്ജയ് സിങ് ചൗഹാന്‍ എന്നിവരാണ് മറ്റു സംവിധായകർ. വിഷ്ണുവര്‍ദ്ധന്‍, ഹിതേഷ് താക്കര്‍ എന്നിവര്‍ ചേര്‍ന്നാണു സിരീസ് നിര്‍മിക്കുന്നത്. “വണ്‍ നേഷന്‍ ” ഇന്ത്യയിലെ വാഴ്ത്തപ്പെടാത്ത നായകരെക്കുറിച്ചായിരിക്കുമെന്നു സംവിധായകന്‍ വിവേക് അഗ്നിഹോത്രി ട്വിറ്ററില്‍ കുറിച്ചു.
ഇപ്പോള്‍ പുതിയ ചിത്രമായ ദ വാക്‌സിന്‍ വാറിന്റെ പണിപ്പുരയിലാണ് വിവേക് അഗ്നിഹോത്രി. ഡല്‍ഹി കലാപത്തിന്റെ പശ്ചാത്തലത്തിലൊരുങ്ങുന്ന ദ ഡല്‍ഹി ഫയല്‍സ് എന്നൊരു ചിത്രവും വിവേക് അഗ്നിഹോത്രി പ്രഖ്യാപിച്ചിരുന്നു.