◾മുഖ്യമന്ത്രിക്കും സര്‍ക്കാരിനുമെതിരേ ഗവര്‍ണറുടെ വാര്‍ത്താ സമ്മേളനം ഇന്ന്. രാജ്ഭവനില്‍ രാവിലെ 11.45 നാണ് വാര്‍ത്താസമ്മേളനം. ചരിത്ര കോണ്‍ഗ്രസില്‍ തന്നെ ആക്രമിക്കാന്‍ ശ്രമിച്ചതിന്റെ വീഡിയോ ദൃശ്യങ്ങളും അനര്‍ഹമായ പല ആനുകൂല്യങ്ങളും ആവശ്യപ്പെട്ട് മുഖ്യമന്ത്രി അയച്ച കത്തുകളും പുറത്തുവിടുമെന്ന് ഗവര്‍ണര്‍ നേരത്തെ പ്രഖ്യാപിച്ചിരുന്നു. മുഖ്യമന്ത്രിക്കും സര്‍ക്കാരിനുമെതിരെ രാജ്ഭവനില്‍ ഗവര്‍ണര്‍ വാര്‍ത്താ സമ്മേളനം വിളിക്കുന്നത് അത്യസാധാരണ നടപടിയാണ്.
◾വര്‍ഗീയത ആളിക്കത്തിക്കുന്ന ബിജെപി കപടദേശീയവാദവുമായി ജനങ്ങളെ കബളിപ്പിക്കുകയാണെന്ന് മുഖ്യമന്ത്രി പിണറായി വിജയന്‍. കര്‍ണാടകത്തിലെ ബാഗേപള്ളിയില്‍ സിപിഎം റാലിയില്‍ പ്രസംഗിക്കുകയായിരുന്നു അദ്ദേഹം. കേരളം അടക്കമുള്ള സര്‍ക്കാരുകളെ കേന്ദ്ര സര്‍ക്കാര്‍ സാമ്പത്തികമായും മറ്റു മാര്‍ഗങ്ങളിലൂടേയും സമ്മര്‍ദത്തിലാക്കുകയാണ്. കോണ്‍ഗ്രസ് ബിജെപിയുടെ റിക്രൂട്ടിംഗ് ഏജന്‍സിയായി മാറിയെന്നും പിണറായി കുറ്റപ്പെടുത്തി.
◾
*_KSFE_ GOLD LOAN*
*മനുഷ്യപ്പറ്റുള്ള ഗോള്‍ഡ് ലോണ്‍*
നിങ്ങളുടെ അടിയന്തിര സാമ്പത്തിക ആവശ്യങ്ങള്‍ക്ക് *_KSFE_* നല്‍കുന്നു സ്വര്‍ണ പണയ വായ്പ. മിതമായ പലിശ നിരക്കില്‍ ലളിതമായ നടപടിക്രമങ്ങളിലൂടെ 25 ലക്ഷം രൂപ വരെ പ്രതിദിനം നിങ്ങള്‍ക്ക് നേടാം. 12 മാസത്തെ വായ്പാ കാലയളവില്‍ നിശ്ചിത പലിശ അടച്ചതിന് ശേഷം ഒരു വര്‍ഷത്തേക്ക് വായ്പ പുതുക്കാന്‍ കഴിയും, കൂടാതെ പരമാവധി 36 മാസം വരെ ഈ സൗകര്യം ഉപയോഗിക്കാം. *കൂടുതല്‍ വിവരങ്ങള്‍ക്ക് : www.ksfe.com*
◾നടിയെ ആക്രമിച്ച കേസ് ജഡ്ജി ഹണി എം വര്‍ഗീസിന്റെ കോടതിയില്‍നിന്നു മാറ്റണമെന്ന് ആവശ്യപ്പെട്ട് അതിജീവിത നല്‍കിയ ഹര്‍ജി ഹൈക്കോടതി ഇന്നു വീണ്ടും പരിഗണിക്കും. അതിജീവിതയുടെ ആവശ്യപ്രകാരം ഹര്‍ജിയില്‍ രഹസ്യവാദമാണ് നടക്കുന്നത്. വിചാരണ എറണാകുളം പ്രത്യേക സിബിഐ കോടതിയില്‍നിന്ന് പ്രിന്‍സിപ്പല്‍ സെഷന്‍സിലേക്കു മാറ്റിയതിനെതിരെയാണ് ഹര്‍ജി. ജഡ്ജിയുടെ ഭര്‍ത്താവും കേസിലെ എട്ടാം പ്രതിയായ ദിലീപും തമ്മില്‍ ബന്ധമുണ്ടെന്നാണ് അതിജീവിതയുടെ ആരോപണം.
◾കൊല്ലത്തെ അഭിഭാഷക സമരം കൂടുതല്‍ ജില്ലകളിലേക്കു വ്യാപിപ്പിക്കാന്‍ നീക്കം. കരുനാഗപ്പള്ളിയില്‍ അഭിഭാഷകനെ മര്‍ദ്ദിച്ച പൊലീസുകാര്‍ക്കെതിരെ നടപടി ആവശ്യപ്പെട്ടാണു സമരം. അതേസമയം സംഭവവുമായി ബന്ധപ്പെട്ട അന്വേഷണ റിപ്പോര്‍ട്ട് ഡിഐജി ആര്‍ നിശാന്തിനി സംസ്ഥാന പൊലീസ് മേധാവിക്ക് അടുത്ത ദിവസം സമര്‍പ്പിക്കും.
◾ആര്‍എസ്എസ് മേധാവി മോഹന്‍ ഭാഗവത്തിനെ സന്ദര്‍ശിച്ച ഗവര്‍ണര്‍ ആരിഫ് മുഹമ്മദ് ഖാന് പിന്തുണയുമായി കേന്ദ്രമന്ത്രി വി മുരളീധരന്‍. കേരളത്തിലെ ഗവര്‍ണര്‍ പല നേതാക്കളെയും മതമേധാവികളെയും സന്ദര്‍ശിച്ചിട്ടുണ്ട്. കൊളോണിയല്‍ ശൈലി ഗവര്‍ണര്‍ തുടരണമെന്ന് പറയുന്നതെന്തിന്? ഗവര്‍ണര്‍ക്കെതിരായ വധശ്രമത്തില്‍ മുഖ്യമന്ത്രി പ്രതിക്കൂട്ടിലാണ്. മുരളീധരന്‍ പറഞ്ഞു.
*ജോയ്ആലുക്കാസ് വിശേഷങ്ങള്‍*
ജോയ്ആലുക്കാസിലെ എല്ലാ സ്വര്‍ണാഭരണങ്ങള്‍ക്കും ഇപ്പോള്‍ പണിക്കൂലിയില്‍ വന്‍ ഇളവ്. സ്വര്‍ണം, ഡയമണ്ട്, മറ്റു ജ്വല്ലറി കളക്ഷനുകളെല്ലാം സ്വര്‍ണ വിപണിയിലെ തന്നെ ഏറ്റവും കുറഞ്ഞ പണിക്കൂലിയിലാണ് ലഭ്യമാക്കുന്നത്. ജോയ്ആലുക്കാസില്‍ നിന്ന് പര്‍ച്ചേയ്സ് ചെയ്യുന്ന ആഭരണങ്ങള്‍ക്ക് ഒരു വര്‍ഷത്തേക്ക് സൗജന്യ ഇന്‍ഷുഷറന്‍സും ലൈഫ്ടൈം ഫ്രീ മെയിന്റനന്‍സും ലഭിക്കുന്നതാണ്. ഒപ്പം എക്സ്ചേഞ്ച് ഓഫറും പ്രയോജനപ്പെടുത്താവുന്നതാണ്.
➖➖➖➖➖➖➖➖
◾ഗവര്‍ണര്‍ ആരിഫ് മുഹമ്മദ് ഖാനെ ഭീഷണിപ്പെടുത്തി വരുതിയിലാക്കാമെന്ന മുഖ്യമന്ത്രിയുടെയും സിപിഎമ്മിന്റെയും മോഹം നടപ്പില്ലെന്ന് ബിജെപി സംസ്ഥാന അധ്യക്ഷന്‍ കെ. സുരേന്ദ്രന്‍. അഴിമതിക്കെതിരെ ശബ്ദമുയര്‍ത്തുന്ന ഗവര്‍ണറെ സംരക്ഷിക്കാന്‍ കേരളത്തിലെ ജനങ്ങള്‍ രംഗത്തുവരുമെന്നും കെ. സുരേന്ദ്രന്‍ പറഞ്ഞു.
◾ആര്‍എസ്എസ് മേധാവി മോഹന്‍ ഭാഗവതിനെ ഗവര്‍ണര്‍ ആരിഫ് മുഹമ്മദ് ഖാന് സന്ദര്‍ശിച്ചത് എല്ലാ പ്രോട്ടോക്കോളും ലംഘിച്ചാണെന്ന് സിപിഎം കണ്ണൂര്‍ ജില്ലാ സെക്രട്ടറി എം വി ജയരാജന്‍. പ്രാദേശിക ആര്‍എസ്എസ് നേതാവിന്റെ വീട്ടിലായിരുന്നു സന്ദര്‍ശനം. ചരിത്ര കോണ്‍ഗ്രസിലും പ്രോട്ടോക്കോള്‍ ലംഘിച്ചത് ഗവര്‍ണറാണ്. ആര്‍എസ്എസ് മേധാവിയെ രഹസ്യമായി കണ്ടതിലൂടെ ഗവര്‍ണറുടെ നയം വ്യക്തമായെന്നും അദ്ദേഹം പറഞ്ഞു
◾കോഴിക്കോട്ടെ കൂളിമാട് പാലത്തിന്റെ തകര്‍ച്ചയ്ക്ക് ഉത്തരവാദികളായ ഉദ്യോഗസ്ഥര്‍ക്കെതിരെ നടപടിയുണ്ടാകുമെന്ന് പൊതുമരാമത്ത് മന്ത്രി മുഹമ്മദ് റിയാസ്. 15 മാസത്തിനുള്ളില്‍ നടപടിയെടുത്ത ഉദ്യോഗസ്ഥരുടെ എണ്ണമെടുത്താല്‍ ജാഥക്കുള്ള ആളുണ്ടാകുമെന്നും അദ്ദേഹം കൂട്ടിച്ചേര്‍ത്തു.
◾ജോലിതേടി മലേഷ്യയിലേക്കു പോകാനിരിക്കേ, മകന്റെ കുടുക്ക പൊട്ടിച്ച് ലോട്ടറി ടിക്കറ്റെടുത്ത ഓട്ടോ ഡ്രൈവര്‍ക്ക് 25 കോടി രൂപയുടെ ഓണം ബമ്പര്‍. തിരുവനന്തപുരം ശ്രീവരാഹം സ്വദേശി അനൂപാണ് ഭാഗ്യവാന്‍. ശനിയാഴ്ച വൈകിട്ടാണ് ടിക്കറ്റെടുത്തത്. നികുതി കഴിച്ച് 15.75 കോടി രൂപ അനൂപിനു ലഭിക്കും. രണ്ടാം സമ്മാനമായ അഞ്ചു കോടി രൂപ കോട്ടയത്ത് വിറ്റ ടിക്കറ്റിനാണ്.
◾മഞ്ചേരിയില്‍ ഒന്നാം സമ്മാനം കിട്ടിയ നിര്‍മല്‍ കേരള ഭാഗ്യക്കുറിയുടെ ലോട്ടറി ടിക്കറ്റ് തട്ടിയെടുത്ത കേസില്‍ എട്ടുപേര്‍ അറസ്റ്റില്‍. ലോട്ടറിയടിച്ച മഞ്ചേരി പാപ്പിനിപ്പാറ സ്വദേശി അലവി നല്‍കിയ പരാതിയിലാണ് അറസ്റ്റ്. അലനല്ലൂര്‍ തിരുവിഴാംകുന്ന് മൂജിബ്, പുല്‍പറ്റ കുന്നിക്കല്‍ പ്രഭാകരന്‍, ശ്രീകൃഷ്ണപുരം സ്വദേശികളായ കല്ലുരിക്കല്‍ അബ്ദുല്‍ അസീസ്, അബ്ദുല്‍ ഗഫൂര്‍, കൊങ്ങശ്ശേരി വീട്ടില്‍ അജിത് കുമാര്‍, കലസിയില്‍ വീട്ടില്‍ പ്രിന്‍സ്, ചോലക്കുന്ന് വീട്ടില്‍ ശ്രീക്കുട്ടന്‍, പാലക്കാട് കരിമ്പുഴ സ്വദേശി മുബഷിര്‍ എന്നിവരാണ് അറസ്റ്റിലായത്.
◾വിഴിഞ്ഞത്ത് തുറമുഖ നിര്‍മ്മാണ സ്ഥലത്തേക്കു സമരസമിതിയുടെ നേതൃത്വത്തില്‍ നടന്ന ബഹുജന മാര്‍ച്ചിനിടെ സംഘര്‍ഷം. സമരക്കാരും പൊലീസും തമ്മില്‍ ഉന്തുംതള്ളും. പദ്ധതി പ്രദേശത്തേക്കു കയറാനുള്ള ശ്രമം പൊലീസ് തടഞ്ഞു. പദ്ധതിയെ അനുകൂലിക്കുന്നവരേയും പൊലീസ് തടഞ്ഞു. ഇന്നു 24 മണിക്കൂര്‍ ഉപവാസ സമരം നടക്കും.
◾ആര്‍എസ്എസ് മേധാവി മോഹന്‍ ഭാഗവത് ഗുരുവായൂര്‍ ക്ഷേത്ര ദര്‍ശനം നടത്തി. ഇന്നലെ രാവിലെയായിരുന്നു ദര്‍ശനം.
◾കണ്ണൂര്‍ ജില്ലയിലെ കുറുമാത്തൂരില്‍ ചന്ദനവേട്ട. 390 കിലോയോളം ചന്ദനം പിടിച്ചെടുത്തു. ചന്ദനം മുറിച്ചു കടത്താന്‍ ശ്രമിച്ച സംഘത്തിലെ ഒരാള്‍ വനം വകുപ്പിന്റെ പിടിയിലായി. ഓടിപ്പോയ രണ്ടുപേരെ ഉടനേ പിടിക്കുമെന്ന് വനംവകുപ്പ്.
◾ഇടുക്കി വണ്ടിപ്പെരിയാറില്‍ അമ്പത്തഞ്ചുകാരിയെ പീഡിപ്പിച്ച നാല്‍പ്പത്തഞ്ചുകാരനെ പോലീസ് അറസ്റ്റ് ചെയ്തു. വണ്ടിപ്പെരിയാര്‍ അയ്യപ്പന്‍ കോവില്‍ മാട്ടുംകൂട് സ്വദേശി പുത്തന്‍പുരയ്ക്കല്‍ വിനോദ് ജോസഫാണ് പിടിയിലായത്. വീടിനോടു ചേര്‍ന്നു നടത്തുന്ന കടയില്‍ സാധനങ്ങള്‍ വാങ്ങാനെത്തിയ വിനോദ് കടയുടമയായ സ്ത്രീ സാധനങ്ങളെടുക്കാന്‍ അകത്തേക്കു കയറിയപ്പോള്‍ പുറകെയെത്തി പീഡിപ്പിച്ചെന്നാണ് കേസ്.
◾ചണ്ഡീഗഡ് സര്‍വകലാശാലയിലെ വനിതാ ഹോസ്റ്റലില്‍നിന്നു മറ്റു കുട്ടികളുടെ ശുചിമുറി ദൃശ്യങ്ങള്‍ ചിത്രീകരിച്ചിട്ടില്ലെന്നു പോലീസ്. ശുചിമുറി ദൃശ്യങ്ങള്‍ പ്രചരിക്കപ്പെട്ട കേസില്‍ അറസ്റ്റിലായ വിദ്യാര്‍ത്ഥിനി കാമുകന് അയച്ചതു സ്വന്തം ശുചിമുറി ദൃശ്യങ്ങള്‍ മാത്രമാണെന്നാണു വിശദീകരണം. മറ്റു കുട്ടികളുടെ ശുചിമുറി ദൃശ്യങ്ങള്‍ പകര്‍ത്തുകയോ പുറത്തുവിടുകയോ ചെയ്തിട്ടില്ലെന്ന് പോലീസ് വ്യക്തമാക്കി. എന്നാല്‍ അറുപതോളം വിദ്യാര്‍ത്ഥിനികളുടെ ശുചിമുറി ദൃശ്യങ്ങള്‍ പുറത്തായെന്നാണ് വിദ്യാര്‍ത്ഥിനികളുടെ പരാതി.
◾അദാനി ഗ്രൂപ്പ് ഏറ്റെടുത്ത എസിസി സിമന്റ്സ് കമ്പനിയുടെ ചെയര്‍മാന്‍ സ്ഥാനത്തേക്ക് ഗൗതം അദാനിയുടെ മൂത്ത മകന്‍ കരണ്‍ അദാനി. 55 കാരനായ കരണിന്റെ ഇടപെടലാണ് അംബുജ സിമന്റ്സ്, എസിസി സിമന്റ്സ് എന്നിവയെ അദാനി ഗ്രൂപ്പിന്റെ കീഴിലേക്കെത്തിച്ചത്. ഇപ്പോള്‍ അദാനി പോര്‍ട്ട്സ് സിഇഒ ആണ് കരണ്‍ അദാനി.
◾ബ്രിട്ടനില്‍ എലിസബത്ത് രാജ്ഞിയുടെ മൃതദേഹ സംസ്‌കാര ചടങ്ങ് ഇന്ന്. രാഷ്ട്രപതി ദ്രൗപതി മുര്‍മു അടക്കമുള്ള രാഷ്ട്രമേധാവികള്‍ സംസ്‌കാര ചടങ്ങില്‍ പങ്കെടുക്കും.
◾ചൈനയില്‍ ബസപകടത്തില്‍ 27 പേര് മരിച്ചു. ഗ്വിയാങ് പ്രവിശ്യയിലെ സാന്‍ഡു കൗണ്ടിയില്‍ 47 പേരുമായി പോവുകയായിരുന്ന ബസ് കൊക്കയിലേക്ക് മറിയുകയായിരുന്നു. പരിക്കേറ്റ ഇരുപതുപേരെ ആശുപത്രിയില്‍ പ്രവേശിപ്പിച്ചു.
◾കാര്യവട്ടം ഗ്രീന്‍ഫീല്‍ഡ് സ്റ്റേഡിയത്തില്‍ ഈ മാസം 28ന് നടക്കുന്ന ഇന്ത്യ – ദക്ഷിണാഫ്രിക്ക ടി 20 മത്സരത്തിന്റെ ടിക്കറ്റ് വില്‍പ്പന ഇന്ന് നടന്‍ സുരേഷ് ഗോപി ഉദ്ഘാടനം ചെയ്യും. വൈകീട്ട് ഏഴര മുതല്‍ ടിക്കറ്റ് ലഭ്യമാകും.
◾ടി20 ലോകകപ്പിന് മുന്നോടിയായി ഇന്ത്യന്‍ ടീമിന്റെ പുതിയ ജേഴ്സി പുറത്തിറക്കി ബിസിസിഐ. ആകാശ നീല നിറത്തിലുള്ളതാണ് ടീമിന്റെ പുതിയ ജേഴ്സി. ബിസിസിഐയും സ്പോണ്‍സര്‍മാരായ എംപിഎല്ലും ചേര്‍ന്ന് സാമൂഹ്യമാധ്യമങ്ങളിലൂടെയാണ് ഔദ്യോഗിക ടി20 ജേഴ്സി പുറത്തിറക്കിയത്.
◾ബെംഗളൂരു എഫ്‌സി ഡ്യൂറന്റ് കപ്പ് ജേതാക്കള്‍. ഇന്നലെ നടന്ന ഫൈനലില്‍ മുംബൈ സിറ്റിയെ ഒന്നിനെതിരേ രണ്ടു ഗോളുകള്‍ക്ക് പരാജയപ്പെടുത്തിയാണ് ബെംഗളൂരുവിന്റെ കിരീടനേട്ടം.
◾മൊബൈല്‍ ഫണ്ട് ട്രാന്‍സ്ഫറിന് വരുന്ന എസ്എംഎസ് ചാര്‍ജ് ഒഴിവാക്കിയെന്ന് പ്രമുഖ പൊതുമേഖല ബാങ്ക് എസ്ബിഐ. ഇതോടെ അധിക ചാര്‍ജ് ഇല്ലാതെ ഇടപാടുകാര്‍ക്ക് സുഗമമായി മൊബൈല്‍ ഫണ്ട് ട്രാന്‍സ്ഫര്‍ നടത്താമെന്നും എസ്ബിഐ അറിയിച്ചു. *99# എന്ന് ഡയല്‍ ചെയ്ത് സൗജന്യമായി ബാങ്കിങ് സേവനം പ്രയോജനപ്പെടുത്താന്‍ കഴിയുന്നതാണ് എസ്എംഎസ് സംവിധാനം. പ്രത്യേകിച്ച് ഫീച്ചര്‍ ഫോണ്‍ ഉപയോക്താക്കളെ ഉദ്ദേശിച്ചാണ് മൊബൈല്‍ ഫണ്ട് ട്രാന്‍സ്ഫറിന് വരുന്ന എസ്എംഎസ് ചാര്‍ജ് ഒഴിവാക്കിയതെന്നും എസ്ബിഐ ട്വീറ്റില്‍ വ്യക്തമാക്കുന്നു. ഫണ്ട് ട്രാന്‍സ്ഫര്‍, അക്കൗണ്ട് ബാലന്‍സ്, മിനി സ്റ്റേറ്റ്‌മെന്റ്, യുപിഐ പിന്‍ മാറ്റല്‍ തുടങ്ങി വിവിധ സേവനങ്ങളാണ് എസ്എംഎസ് സംവിധാനം വഴി ലഭ്യമാക്കുന്നത്. ജിഎസ്എം സംവിധാനമുള്ള ഫീച്ചര്‍ ഫോണുകള്‍ ഉപയോഗിക്കുന്നവര്‍ക്കാണ് ഇത് കൂടുതലായി പ്രയോജനപ്പെടുന്നത്.
◾അയച്ച സന്ദേശങ്ങള്‍ എഡിറ്റ് ചെയ്യാനുള്ള ഫീച്ചര്‍ അവതരിപ്പിക്കാന്‍ ഒരുങ്ങി പ്രമുഖ ഇന്‍സ്റ്റന്റ് മെസേജിങ് ആപ്പായ വാട്‌സ് ആപ്പ്. നിലവില്‍ അയച്ച സന്ദേശത്തില്‍ തെറ്റുകള്‍ ശ്രദ്ധയില്‍പ്പെട്ടാല്‍ മെസേജ് ഡീലിറ്റ് ചെയ്ത് പുതിയത് അയക്കാനാണ് സംവിധാനം ഉള്ളത്. പകരം അയച്ച സന്ദേശം എഡിറ്റ് ചെയ്യാന്‍ ഉപയോക്താവിന് അവസരം നല്‍കുന്ന ഫീച്ചര്‍ അവതരിപ്പിക്കാനാണ് വാട്‌സ്ആപ്പ് ശ്രമിക്കുന്നത്. നിലവില്‍ വാട്‌സ്ആപ്പ് ഫീച്ചര്‍ വികസിപ്പിച്ച് വരികയാണ്. വൈകാതെ തന്നെ പുതിയ ഫീച്ചറായി ഇത് അവതരിപ്പിക്കുമെന്നാണ് റിപ്പോര്‍ട്ടുകള്‍. ഫീച്ചര്‍ അവതരിപ്പിക്കുന്നതിന് മുന്‍പ് പരീക്ഷണാടിസ്ഥാനത്തില്‍ ബീറ്റ വേര്‍ഷനില്‍ ഇത് ലഭ്യമാക്കും.
◾മഞ്ജു വാര്യര്‍, സൌബിന്‍ ഷാഹിര്‍ എന്നിവരെ പ്രധാന കഥാപാത്രങ്ങളാക്കി മഹേഷ് വെട്ടിയാര്‍ സംവിധാനം ചെയ്യുന്ന വെള്ളരി പട്ടണം എന്ന ചിത്രത്തിലെ ഗാനം അണിയറക്കാര്‍ പുറത്തിറക്കി. ‘അരികെയൊന്നു കണ്ടൊരു നേരം’ എന്നാരംഭിക്കുന്ന ഗാനം ഒരു മെലഡിയാണ്. വിനായക് ശശികുമാറിന്റെ വരികള്‍ക്ക് ഈണമിട്ടിരിക്കുന്നത് സച്ചിന്‍ ശങ്കര്‍ മന്നത്ത് ആണ്. കെ എസ് ഹരിശങ്കറും നിത്യ മാമ്മനും ചേര്‍ന്നാണ് ആലപിച്ചിരിക്കുന്നത്. ആക്ഷേപഹാസ്യ സ്വഭാവത്തിലുള്ള ചിത്രത്തില്‍ ഒരു രാഷ്ട്രീയ പ്രവര്‍ത്തകനായാണ് സൌബിന്‍ ഷാഹിര്‍ എത്തുന്നത്. ലീഡര്‍ കെ പി സുരേഷ് എന്നാണ് സൌബിന്‍ അവതരിപ്പിക്കുന്ന കഥാപാത്രത്തിന്റെ പേര്. കോട്ടയം രമേശ്, സലിം കുമാര്‍, സുരേഷ് കൃഷ്ണ, കൃഷ്ണശങ്കര്‍, ശബരീഷ് വര്‍മ, അഭിരാമി ഭാര്‍ഗവന്‍, മാല പാര്‍വതി, വീണ നായര്‍, പ്രമോദ് വെളിയനാട് എന്നിവരും ചിത്രത്തില്‍ മറ്റു കഥാപാത്രങ്ങളെ അവതരിപ്പിച്ചിരിക്കുന്നു.
◾ധ്യാന്‍ ശ്രീനിവാസനെ നായകനാക്കി ജസ്പാല്‍ ഷണ്‍മുഖന്‍ സംവിധാനം ചെയ്യുന്ന ചിത്രമാണ് സ്വര്‍ഗ്ഗത്തിലെ കട്ടുറുമ്പ്. കെ എന്‍ ശിവന്‍കുട്ടന്‍ കഥയെഴുതി മൈന ക്രിയേഷന്‍സ് നിര്‍മ്മിക്കുന്ന ചിത്രമാണിത്. ഒരു ഗ്രാമത്തിലെ എംഎ, ബിഎഡ് ബിരുദധാരിയായ ജോസ് എന്ന വ്യക്തി ഹയര്‍സെക്കന്‍ഡറി വിഭാഗത്തില്‍ അധ്യാപകനായി ജോലിക്കു കയറുന്നു. ഇയാളുടെ നാട്ടില്‍ നടക്കുന്ന ഒരു സംഭവവികാസം ഒരു ക്രൈം ആയി മാറുന്ന കഥയാണ് സ്വര്‍ഗ്ഗത്തിലെ കട്ടുറുമ്പ്. ഹാസ്യത്തിനും പാട്ടുകള്‍ക്കും ഏറെ പ്രാധാന്യം നല്‍കിക്കൊണ്ടാണ് ചിത്രം ഒരുങ്ങുന്നത്. ഗായത്രി അശോക് ആണ് ചിത്രത്തിലെ നായിക. അപ്പാനി ശരത്, ശ്രീകാന്ത് മുരളി, ജോയ് മാത്യു, ചെമ്പില്‍ അശോകന്‍, ഗൗരി നന്ദ, അംബിക മോഹന്‍, മഹേശ്വരി അമ്മ, പാഷാണം ഷാജി, നിര്‍മ്മല്‍ പാലാഴി, ഉല്ലാസ് പന്തളം, ജയകൃഷ്ണന്‍, ചാലിപാലാ, സുധി കൊല്ലം, കോബ്ര രാജേഷ്, നാരായണന്‍കുട്ടി, പുന്നപ്ര അപ്പച്ചന്‍, രാജേഷ് പറവൂര്‍ എന്നിവര്‍ ചിത്രത്തില്‍ പ്രധാന വേഷങ്ങളില്‍ എത്തുന്നു.
◾2021 ഡിസംബറില്‍ ആദ്യമായി അനാച്ഛാദനം ചെയ്ത ബിഎസ്എ ഗോള്‍ഡ് സ്റ്റാര്‍ 650 റെട്രോ-സ്റ്റൈല്‍ മോട്ടോര്‍സൈക്കിള്‍ ഇതിനകം യുകെയിലും യൂറോപ്യന്‍ വിപണിയിലും വില്‍പ്പനയ്ക്ക് എത്തിയിട്ടുണ്ട്. ഇപ്പോള്‍, മോഡല്‍ 2023 മുതല്‍ ലോകമെമ്പാടും ലോഞ്ച് ഉണ്ടാകും എന്ന് കമ്പനി സ്ഥിരീകരിച്ചു. 2023 മാര്‍ച്ചില്‍ മോഡല്‍ ഇന്ത്യയിലേക്ക് എത്താന്‍ സാധ്യതയുണ്ട്. മോഡലിന് യുകെയില്‍ 6500 പൗണ്ട് (ഏകദേശം 6.23 ലക്ഷം രൂപ) മുതലാണ് വിലയെങ്കില്‍, പ്രാദേശിക ഉല്‍പ്പാദനം കാരണം ഇന്ത്യയില്‍ ഏകദേശം 2.9 ലക്ഷം രൂപ വിലവരുമെന്ന് പ്രതീക്ഷിക്കുന്നു. ശക്തിക്കായി, ബിഎസ്എ ഗോള്‍ഡ് സ്റ്റാര്‍ 650, ഡിഒഎച്ച്സി സജ്ജീകരണത്തോടുകൂടിയ 652 സിസി, ഫോര്‍-വാല്‍വ്, ലിക്വിഡ്-കൂള്‍ഡ് എഞ്ചിന്‍ ഉപയോഗിക്കുന്നു. മോട്ടോര്‍ 6,000 ആര്‍പിഎമ്മില്‍ 45 ബിഎച്ച്പി പവറും 4,000 ആര്‍പിഎമ്മില്‍ 55 എന്‍എം ടോര്‍ക്കും പുറപ്പെടുവിക്കുന്നു. ഇത് അഞ്ച് സ്പീഡ് ഗിയര്‍ബോക്സുമായി വരുന്നു.
◾ഉണ്ണി ആറിന്റെ ഏറ്റവും പുതിയ കഥാസമാഹാരം. വാത്സ്യായന ക്ഷേത്രത്തില്‍ തൊഴുതാല്‍ ലൈംഗിക ശക്തി കൂടുമോ? ഇന്ത്യയിലെ ഏക വാത്സ്യായന ക്ഷേത്രം കേരളത്തിലോ? ആരും കേള്‍ക്കാത്ത ആ ക്ഷേത്രത്തിന്റെ രഹസ്യം ചുരുളഴിയുന്നു. കാമം ജാതി വിശ്വാസം പക തുടങ്ങി മലയാളി ജീവിതത്തിന്റെ ഉള്‍വഴികള്‍ തെളിച്ചു കാട്ടുന്ന 6 കഥകളുടെ സമാഹാരം. ‘മലയാളി മെമ്മോറിയല്‍’. ഉണ്ണി ആര്‍. ഡിസി ബുക്സ്.വില 152 രൂപ.
◾അന്‍പത് വയസ്സിന് താഴെയുള്ളവര്‍ക്കാണ് മറ്റുള്ളവരെ അപേക്ഷിച്ച് അര്‍ബുദ രോഗം പിടിപെടാനുള്ള സാധ്യത ഇപ്പോള്‍ കൂടുതലെന്ന് പുതിയ പഠനം. 1990കള്‍ക്ക് ശേഷം യുവാക്കള്‍ക്ക് അര്‍ബുദം വരാനുള്ള സാധ്യത ഗണ്യമായി വര്‍ധിച്ചതായും ബ്രിഗ്ഹാം ആന്‍ഡ് വിമന്‍സ് ഹോസ്പിറ്റലിലെ ഗവേഷകര്‍ നടത്തിയ പഠനത്തില്‍ കണ്ടെത്തി. നേച്ചര്‍ റിവ്യൂസ് ക്ലിനിക്കല്‍ ഓങ്കോളജി ജേണലിലാണ് ഗവേഷണത്തിലെ കണ്ടെത്തലുകള്‍ പ്രസിദ്ധീകരിച്ചത്. മദ്യപാനം, ഉറക്കക്കുറവ്, പുകവലി, അമിതഭാരം, സംസ്‌കരിച്ച ഭക്ഷണത്തിന്റെ ഉയര്‍ന്ന തോതിലെ ഉപയോഗം എന്നിവയെല്ലാം വളരെ ചെറുപ്പത്തില്‍ തന്നെ അര്‍ബുദം വരാനുള്ള അപകടസാധ്യത ഉയര്‍ത്തുന്നതായി ഗവേഷകര്‍ പറയുന്നു. ഇപ്പോഴത്തെ ചെറുപ്പക്കാര്‍ക്ക് ഏതാനും ദശാബ്ദങ്ങള്‍ക്ക് മുന്‍പുള്ള ചെറുപ്പക്കാരെ അപേക്ഷിച്ച് ശരിയായ ഉറക്കം കിട്ടാത്ത അവസ്ഥയുണ്ടെന്നും പഠനറിപ്പോര്‍ട്ട് ചൂണ്ടിക്കാട്ടി. മനുഷ്യരുടെ പോഷണം, ജീവിതശൈലി, ശരീരഭാരം, പാരിസ്ഥിതികമായ ഘടകങ്ങള്‍, ഉള്ളിലും ചുറ്റിലുമുള്ള സൂക്ഷ്മജീവികള്‍ എന്നിവയിലെല്ലാം അടുത്ത ഏതാനും ദശകങ്ങളിലായി വലിയ മാറ്റങ്ങള്‍ വന്നിട്ടുണ്ടെന്ന് ഗവേഷകര്‍ പറയുന്നു. ഇതെല്ലാം അര്‍ബുദ സാധ്യത വര്‍ധിപ്പിക്കുന്നുണ്ട്. ഓരോ തലമുറ കഴിയുമ്പോഴും അര്‍ബുദ രോഗ സാധ്യത ഉയരുന്നതായാണ് ഗവേഷകരുടെ നിഗമനം. പഠനത്തില്‍ ഗവേഷകര്‍ ഉള്‍പ്പെടുത്തിയ 14 തരം അര്‍ബുദങ്ങളില്‍ എട്ടെണ്ണവും ദഹനസംവിധാനവുമായി ബന്ധപ്പെട്ടതാണ്. നാം കഴിക്കുന്ന ഭക്ഷണം ഉള്ളിലെ ബാക്ടീരിയ അടക്കമുള്ള സൂക്ഷ്മജീവികളെ സ്വാധീനിക്കുന്നുണ്ടെന്നും ഇതിലുണ്ടാകുന്ന മാറ്റങ്ങള്‍ അര്‍ബുദം ഉള്‍പ്പെടെ പലവിധ രോഗങ്ങളിലേക്ക് നയിക്കാമെന്നും പഠനറിപ്പോര്‍ട്ട് കൂട്ടിച്ചേര്‍ക്കുന്നു. എന്നാല്‍ കുറഞ്ഞ, ഇടത്തരം വരുമാനക്കാരായ രാജ്യങ്ങളില്‍ നിന്നുള്ള വിവരങ്ങള്‍ ആവശ്യത്തിന് ലഭ്യമല്ലാത്തത് അര്‍ബുദബാധയുടെ ദീര്‍ഘകാല പാറ്റേണ്‍ നിര്‍ണയിക്കുന്നതില്‍ തടസ്സമായതായി ഗവേഷകര്‍ പറയുന്നു.
*ശുഭദിനം*
*കവിത കണ്ണന്‍*
ആ ചിത്രകാരന്‍ വളരെ പ്രശസ്തനായിരുന്നു. ഒരു ദിവസം ഒരു യുവതി അവരുടെ നായ്കുട്ടിയുമായി എത്തി. തങ്ങളുടെ ഒരു ചിത്രം വരയ്ക്കണമെന്നായിരുന്നു ആവശ്യം. പറഞ്ഞ ദിവസം തന്നെ അയാള്‍ ചിത്രം വരച്ചുനല്‍കി. ചിത്രം വാങ്ങാന്‍ അവര്‍ എത്തി. ചിത്രം ഒട്ടും ഇഷ്ടമാകാത്തതുകൊണ്ട് അവര്‍ പറഞ്ഞു: എന്റെ നായ്ക്ക് പോലും ഈ ചിത്രം ഇഷ്ടപ്പെട്ടതേയില്ല. എനിക്കീ ചിത്രം വേണ്ട. അവര്‍ തിരിഞ്ഞു നടക്കാന്‍ തുടങ്ങിയതും അയാള്‍ പറഞ്ഞു: ഈ ചിത്രത്തില്‍ നാളെ ഞാന്‍ ചില തിരുത്തലുകള്‍ വരുത്താം. നാളെ വന്നു നോക്കൂ..യുവതി അടുത്തദിവസം നായയുമായി എത്തി. ചിത്രം കാണിച്ചതും നായ്ക്കുട്ടി ആ ചിത്രത്തില്‍ നക്കാന്‍ തുടങ്ങി. നായ്ക്കുട്ടിക്ക് ചിത്രം ഇഷ്ടപ്പെട്ടതുകൊണ്ട് അവര്‍ അതിന്റെ പണം നല്‍കി ചിത്രവുമായി മടങ്ങി. ഇതെല്ലാം കണ്ടുകൊണ്ടിരുന്ന ഒരു സുഹൃത്ത് ചോദിച്ചു: താങ്കള്‍ ആ ചിത്രത്തില്‍ ഒരു മാറ്റം പോലും വരുത്തിയതേയില്ലല്ലോ.. ഇന്നലെ ചിത്രത്തില്‍ നോക്കാതിരുന്ന നായ ഇന്ന് അത് നക്കാന്‍ തുടങ്ങി. അതെങ്ങിനെ? അയാള്‍ പറഞ്ഞു: ഞാന്‍ ആ ചിത്രത്തിന്റെ അടിഭാഗത്ത് നെയ് പുരട്ടിയിരുന്നു! അര്‍ഹിക്കുന്നതേ നല്‍കാവൂ.. അത് അളന്ന് തന്നെ നല്‍കുകയും വേണം. അല്ലെങ്കില്‍ അതെത്ര വിശിഷ്ടമായാലും ആളുകള്‍ വലിച്ചെറിയും. അധികബഹുമാനം നല്‍കിയാല്‍ അവര്‍ അതൊരു അലങ്കാരമായി കൊണ്ടുനടക്കും. അതുപോലെ അളവ് കുറഞ്ഞുപോയാല്‍ നിര്‍ബന്ധബുദ്ധിയോടെ പിടിച്ചുവാങ്ങുകയും ചെയ്യും. താല്‍ക്കാലിക ലാഭത്തിന് വേണ്ടി ഒരിക്കല്‍ നടത്തുന്ന ഒത്ത് തീര്‍പ്പ് ചിലപ്പോള്‍ സമാന സൗജന്യങ്ങളിലേക്കു തുറക്കുന്ന വാതിലായിരിക്കും. എല്ലാം അറിഞ്ഞ് അളന്നുനല്‍കാന്‍ നമുക്ക് ശീലിക്കാം – ശുഭദിനം.