ആസൂത്രണ ബോര്‍ഡിൽ വനിതാ അംഗത്തെ ഉടനടി നിയമിക്കണമെന്ന ആവശ്യത്തിലുറച്ച് മന്ത്രി ബിന്ദു കൃഷ്ണ. ഈ ആവശ്യം ഉന്നയിച്ച് നൽകിയ കത്തിൽ മുഖ്യമന്ത്രിയുടെ തുടര്‍ നടപടിക്ക് കാക്കുകയാണ് മന്ത്രി. ആസൂത്രണ ബോര്‍ഡിൽ അഞ്ച് അംഗങ്ങള്‍, അഞ്ചും പുരുഷന്മാര്‍. നയരൂപീകരണത്തിലും ആസൂത്രണത്തിലും ഉന്നതമായ പങ്കുള്ള ആസൂത്രണ ബോര്‍ഡിൽ ഒരു വനിത പോലുമില്ല. അതും ലിംഗ സമത്വത്തിനും സ്ത്രീശാക്തീകരണത്തിനും മുന്‍ഗണന നൽകുന്ന സംസ്ഥാനത്ത്. ബോര്‍ഡിന്‍റെ ഘടനാ പ്രശ്നം ചൂണ്ടിക്കാട്ടി വനിതാ ശിശു വികസന വകുപ്പ് മന്ത്രി ബിന്ദു കൃഷ്ണ മുഖ്യമന്ത്രിക്ക് എഴുതിയ കത്തിലെ വാചകങ്ങളാണിത്.
