മലപ്പുറത്ത് നടക്കുന്ന ദേശാഭിമാനി വാർഷികാഘോഷ പരിപാടിയിൽ നിന്നും പി കെ കുഞ്ഞാലിക്കുട്ടി പിന്മാറി. കെ ടി ജലീൽ കൂടി പങ്കെടുക്കുന്ന സിമ്പോസിയത്തിലാണ് കുഞ്ഞാലിക്കുട്ടിയുടെ പേര് ആദ്യം ഉൾപ്പെടുത്തിയിരുന്നെങ്കിലും അതിനു പകരം മറ്റൊരു വിഷയത്തിലെ സെമിനാറിൽ പങ്കെടുക്കുമെന്നായിരുന്നു ഇന്ന് രാവിലെ കുഞ്ഞാലിക്കുട്ടി അറിയിച്ചത്.
പിന്നീട് വ്യക്തിപരമായ അസൗകര്യം ചൂണ്ടിക്കാട്ടി അതിലും വരാൻ പറ്റില്ലെന്ന് സംഘടകരെ അറിയിക്കുകയായിരുന്നു. എന്നാൽ നാളെ വൈകീട്ടത്തെ ഏതെങ്കിലും പരിപാടിയിൽ എത്താൻ ശ്രമിക്കാമെന്ന് പി കെ കുഞ്ഞാലിക്കുട്ടി സംഘാടകരെ അറിയിച്ചിട്ടുണ്ട്. ഇന്നത്തെ സെമിനാറിൽ നിന്നും യൂത്ത് ലീഗ് സംസ്ഥാന അധ്യക്ഷൻ മുനവ്വറലി ശിഹാബ് തങ്ങളും പിന്മാറിയിരുന്നു.
മന്ത്രി പി.എ.മുഹമ്മദ് റിയാസ് ഉദ്ഘാടനം ചെയ്യുന്ന
ബഹുസ്വരതയും ജനാധിപത്യവും’ എന്ന വിഷയത്തെ ആസ്പദമാക്കിയുള്ള സെമിനാറിൽ കെ.ടി.ജലീലാണ് അധ്യക്ഷൻ. കുഞ്ഞാലിക്കുട്ടിക്കു പുറമേ ആര്യാടൻ ഷൗക്കത്ത്, ഡോ.ഷീന ഷുക്കൂർ, എം.സ്വരാജ് എന്നിവരും പങ്കെടുക്കുന്നുണ്ട്.
നേരത്തെ ഇപി ജയരാജൻ വിവാദത്തിലെ നിലപാട് സംബന്ധിച്ച് പി കെ കുഞ്ഞാലിക്കുട്ടി അത് സിപിഎം ന്റെ ആഭ്യന്തര വിഷയമെന്ന് പ്രതികരിച്ചിരുന്നു. എന്നാൽ പിന്നീട് തിരുത്തി , ആരോപണത്തിൽ ആന്വേഷണം വേണമെന്ന് പറഞ്ഞിരുന്നു. ലീഗില്‍ രണ്ടഭിപ്രായമില്ലെന്നും പറഞ്ഞിരുന്നു.