◾നിയമനത്തട്ടിപ്പ് ആരോപണം വീണ്ടും. തിരുവനന്തപുരം ജില്ലാ മര്‍ക്കന്റയില്‍ സഹകരണ സംഘത്തിലെ നിയമനത്തിനു സിപിഎം തിരുവനന്തപുരം ജില്ലാ സെക്രട്ടറി ആനാവൂര്‍ നാഗപ്പന്‍ നല്‍കിയ കത്ത് പുറത്തായി. ശുപാര്‍ശക്കത്ത് നല്‍കിയതില്‍ തെറ്റെന്താണെന്ന് ആനാവൂര്‍ നാഗപ്പന്‍. ജൂനിയര്‍ ക്ലര്‍ക്ക്, ഡ്രൈവര്‍ തസ്തികകളിലേക്ക് നിയമിക്കേണ്ടവരുടെ പേരു നല്‍കിയ കത്താണ് പുറത്തുവന്നത്. അറ്റന്‍ഡര്‍ നിയമനം വേണ്ടെന്നു പറഞ്ഞത് സംഘത്തിന്റെ ബാധ്യത കണക്കിലെടുത്താണെന്നും അദ്ദേഹം വിശദീകരിച്ചു.
◾ആനാവൂര്‍ നാഗപ്പന്റെ ശുപാര്‍ശക്കത്ത് തങ്ങള്‍ക്കു ലഭിച്ചിട്ടില്ലെന്ന് തിരുവനന്തപുരം ജില്ലാ മര്‍ക്കന്റയില്‍ സഹകരണ സംഘം പ്രസിഡന്റ് വി. പാപ്പച്ചന്‍. എന്നാല്‍ ആനാവൂര്‍ നാഗപ്പന്‍ നിര്‍ദേശിച്ചവര്‍ ടെസ്റ്റ് പാസായി ജോലി ചെയ്യുന്നുണ്ടെന്നും വിശദീകരിച്ചു.
◾യുജിസി ചട്ടങ്ങള്‍ ലംഘിച്ചു നിയമനം ലഭിച്ച വൈസ് ചാന്‍സലര്‍മാരെ പുറത്താക്കണമെന്ന കോടതി വിധി കേരള വെറ്ററിനറി സര്‍വകലാശാലയുടെ വൈസ് ചാന്‍സലര്‍ക്കും ബാധകമാകും. നിയമനം പ്രതിസന്ധിയിലാക്കിയ വിസിമാരുടെ എണ്ണം 12 ആയി. വിസി വിരമിച്ച കാര്‍ഷിക സര്‍വകലാശാലയില്‍ പകരം ആരെയും നിയമിച്ചിട്ടില്ല. അഞ്ചു സര്‍വകലാശാലകളില്‍ സ്ഥിരം വൈസ് ചാന്‍സലര്‍മാരില്ല.
*നാടിനും നഗരത്തിനും കെ.എസ്.എഫ്.ഇ. ഭദ്രത സ്മാര്‍ട്ട് ചിട്ടികള്‍*
നിരവധി സമ്മാനപദ്ധതികള്‍ കോര്‍ത്തിണക്കി കൊണ്ട് ആവിഷ്‌ക്കരിച്ച ചിട്ടി പദ്ധതിയാണ് കെ.എസ്.എഫ്.ഇ. ഭദ്രത സ്മാര്‍ട്ട് ചിട്ടികള്‍ 2022. ബംബര്‍ സമ്മാനമായി 1 കോടി വിലയുള്ള ഫ്‌ലാറ്റ്/ വില്ല അല്ലെങ്കില്‍ 1കോടി രൂപ ഒരാള്‍ക്ക് സമ്മാനമായി നല്‍കുന്നു. മേഖലാ തല സമ്മാനങ്ങളായി 70ഇലക്ട്രിക് കാറുകള്‍ (Tata Tigor EV XE)അല്ലെങ്കില്‍ പരമാവധി 12.50ലക്ഷം രൂപ വീതം 70പേര്‍ക്കും കൂടാതെ 100ഹോണ്ട ഇലക്ട്രിക് സ്‌ക്കൂട്ടറുകള്‍ അല്ലെങ്കില്‍ പരമാവധി 75000/-രൂപ വീതം 100 പേര്‍ക്കും ലഭിക്കുന്നതാണ്.
ഉടന്‍ തന്നെ അടുത്തുള്ള കെ.എസ്.എഫ്.ഇ. ശാഖ സന്ദര്‍ശിക്കൂ. ചിട്ടിയില്‍ അംഗമാകൂ.
*ksfe.com/offers/ksfe-bhadratha-smart-chits-2022*
◾കെപിസിസി അധ്യക്ഷ സ്ഥാനത്തുനിന്നു മാറാന്‍ സന്നദ്ധത അറിയിച്ച് രാഹുല്‍ ഗാന്ധിക്കു താന്‍ കത്തയച്ചെന്ന പ്രചാരണം വ്യാജവാര്‍ത്തയാണെന്നു കെ. സുധാകരന്‍. രാഹുല്‍ഗാന്ധിക്കല്ല, എഐസിസി പ്രസിഡന്റ് ഖര്‍ഗെയ്ക്കാണു കത്തയക്കേണ്ടത്. രാജിക്കത്ത് നുണവാര്‍ത്തയാണെന്ന് കോണ്‍ഗ്രസ് നേതാവ് രമേശ് ചെന്നിത്തലയും പ്രതിപക്ഷ നേതാവ് വി.ഡി. സതീശനും പ്രതികരിച്ചു. സുധാകരനൊപ്പമെന്ന് ഇരുവരും പറഞ്ഞു.
◾ഡോ. എപിജെ അബ്ദുല്‍ കലാം സാങ്കേതിക സര്‍വകലാശാല വൈസ് ചാന്‍സലര്‍ നിയമനം റദ്ദാക്കിയ വിധിക്കു മുന്‍കാല പ്രാബല്യം നല്‍കരുതെന്ന് ആവശ്യപ്പെട്ട് ഡോ. രാജശ്രീ സുപ്രീംകോടതിയില്‍ ഹര്‍ജി നല്‍കി. ശമ്പളവും അനൂകൂല്യവും തിരിച്ചുപിടിക്കരുതെന്നാണ് ഹര്‍ജിയിലെ ആവശ്യം.
◾നിയമസഭാ സമ്മേളനം ഡിസംബര്‍ അഞ്ചിന് ആരംഭിക്കാന്‍ മന്ത്രിസഭാ യോഗം തീരുമാനിച്ചു. 14 യൂണിവേഴ്സിറ്റികളുടെ ചാന്‍സലര്‍ സ്ഥാനത്തുനിന്ന് ഗവര്‍ണറെ നീക്കം ചെയ്യുന്ന ബില്‍ നിയമസഭയില്‍ പാസാക്കും. ഇതോടെ ഗവര്‍ണര്‍ക്കു സമര്‍പ്പിച്ചതായി പറയുന്ന ഓര്‍ഡിനന്‍സിനു പ്രസക്തി ഇല്ലാതാകും. സഭാ സമ്മേളനം എന്ന് അവസാനിക്കുമെന്നു വെളിപെടുത്തിയിട്ടില്ല.
*ജോയ്ആലുക്കാസ് വിശേഷങ്ങള്‍*
ജോയ്ആലുക്കാസിലെ എല്ലാ സ്വര്‍ണാഭരണങ്ങള്‍ക്കും ഇപ്പോള്‍ പണിക്കൂലിയില്‍ വന്‍ ഇളവ്. സ്വര്‍ണം, ഡയമണ്ട്, മറ്റു ജ്വല്ലറി കളക്ഷനുകളെല്ലാം സ്വര്‍ണ വിപണിയിലെ തന്നെ ഏറ്റവും കുറഞ്ഞ പണിക്കൂലിയിലാണ് ലഭ്യമാക്കുന്നത്. ജോയ്ആലുക്കാസില്‍ നിന്ന് പര്‍ച്ചേയ്സ് ചെയ്യുന്ന ആഭരണങ്ങള്‍ക്ക് ഒരു വര്‍ഷത്തേക്ക് സൗജന്യ ഇന്‍ഷുഷറന്‍സും ലൈഫ്ടൈം ഫ്രീ മെയിന്റനന്‍സും ലഭിക്കുന്നതാണ്. ഒപ്പം എക്സ്ചേഞ്ച് ഓഫറും പ്രയോജനപ്പെടുത്താവുന്നതാണ്.
➖➖➖
◾മുഖ്യമന്ത്രി പിണറായി വിജയന്‍ ആയുര്‍വേദ ചികില്‍സയില്‍. അടുത്ത ദിവസങ്ങളിലെ പൊതുപരിപാടികള്‍ റദ്ദാക്കി. ക്ളിഫ് ഹൗസില്‍തന്നെയാണ് ആയുര്‍വേദ ചികില്‍സ.
◾തിരുവനന്തപുരത്തെ നിയമന ശുപാര്‍ശ കത്തുകളില്‍ വിജിലന്‍സ് അന്വേഷണം വൈകും. മേയര്‍ ആര്യ രാജേന്ദ്രന്റേയും കൗണ്‍സിലര്‍ ഡി.ആര്‍.അനിലിന്റേയും ശുപാര്‍ശ കത്തുകളെ കുറിച്ചും പിന്‍വാതില്‍ നിയമനങ്ങളെ കുറിച്ചുമുള്ള വിജിലന്‍സിന്റെ പ്രാഥമിക അന്വേഷണം പൂര്‍ത്തിയാക്കാന്‍ 45 ദിവസം വേണമെന്നാണ് വിജിലന്‍സ് നിലപാട്. പ്രാഥമിക അന്വേഷണ റിപ്പോര്‍ട്ടിന്റെ അടിസ്ഥാനത്തില്‍ മാത്രമേ തുടരന്വേഷണം വേണോയെന്നു തീരുമാനിക്കൂ.
◾മണ്ഡല മകരവിളക്ക് തീര്‍ഥാടനത്തിനായി ശബരിമല നട ഇന്നു വൈകുന്നേരം അഞ്ചിനു തുറക്കും. തന്ത്രി കണ്ഠരര് രാജീവരരുടെ കാര്‍മ്മികത്വത്തില്‍ മേല്‍ശാന്തി എന്‍ പരമേശ്വരന്‍ നമ്പൂതിരി ശ്രീകോവില്‍ തുറന്ന് ദീപം തെളിയിക്കും. പുതിയ മേല്‍ശാന്തിമാരായ കെ ജയരാമന്‍ നമ്പൂതിരിയുടെയും ഹരിഹരന്‍ നമ്പൂതിരിയുടേയും സ്ഥാനരോഹണവും ഇന്നു നടക്കും.
◾എറണാകുളം ജില്ലയില്‍ ഇന്നു സ്വകാര്യ ബസ് പണിമുടക്ക്. എറണാകുളം ജില്ല ബസുടമ തൊഴിലാളി സംയുക്ത സമരസമിതിയാണ് സൂചന പണിമുടക്കു നടത്തുന്നത്. പൊലീസും മോട്ടോര്‍ വാഹന വകുപ്പും ബസ് തൊഴിലാളികളെയും ഉടമകളെയും ദ്രോഹിക്കുന്നുവെന്ന് ആരോപിച്ചാണ് സമരം. ഈ മാസം 30 ന് അനിശ്ചിതകാല സമരം നടത്തുമെന്നും സമരസമിതി ഭാരവാഹികള്‍ പറഞ്ഞു.
◾വിഴിഞ്ഞം തുറമുഖത്തു നടക്കുന്ന സമരത്തില്‍ സംസ്ഥാന സര്‍ക്കാരിനെ വിമര്‍ശിച്ച് ഗൗതം അദാനി കമ്പനി കോടതിയില്‍. പോലീസ് സംരക്ഷണം നല്‍കാനുള്ള കോടതി ഉത്തരവ് സര്‍ക്കാര്‍ നടപ്പാക്കുന്നില്ലെന്ന് അദാനി വിമര്‍ശിച്ചു. രണ്ടര മാസമായിട്ടും ഒരു മാറ്റവും ഇല്ലെന്നും അദാനി ഗ്രൂപ്പ് കോടതിയില്‍ പറഞ്ഞു.
◾എറണാകുളത്ത് സ്വിഗ്ഗിക്ക് പിറകേ, സൊമാറ്റോ ഓണ്‍ലൈന്‍ വിതരണക്കാരും സമരത്തിലേക്ക്. നാളെ ആലോചനാ യോഗം ചേര്‍ന്ന് തീരുമാനമെടുക്കും.
◾തിരുവനന്തപുരം സംസ്‌കൃത കോളജിനു മുന്നില്‍ ഗവര്‍ണറുടെ തന്തയ്ക്കു വിളിച്ച് അധിക്ഷേപിച്ചുകൊണ്ട് എസ്എഫ്ഐയുടെ പേരില്‍ പ്രത്യക്ഷപ്പെട്ട ബാനറിനെതിരേ എന്തു നടപടിയെടുത്തെന്ന ചോദ്യവുമായി രാജ്ഭവന്‍. സംസ്‌കൃത യൂണിവേഴ്സിറ്റി വൈസ് ചാന്‍സലറോടും സംസ്‌കൃത കോളേജിലെ പ്രിന്‍സിപ്പലിനോടും വിശദീകരണം തേടി. പിറകേ, വിവാദ ബാനര്‍ അപ്രത്യക്ഷമായി.
◾ബോളിവുഡ് നടി സണ്ണി ലിയോണിനെതിരായ വഞ്ചനാ കേസ് ഹൈക്കോടതി സ്റ്റേ ചെയ്തു. എഫ്ഐആര്‍ റദ്ദാക്കണമെന്ന സണ്ണി ലിയോണിന്റെ ഹര്‍ജി പരിഗണിച്ചാണ് നടപടി. പണം വാങ്ങിയിട്ടും സ്റ്റേജ് പരിപാടി നടത്തിയില്ലെന്നാരോപിച്ച് എറണാകുളം സ്വദേശി ഷിയാസ് നല്‍കിയ കേസിലാണ് സ്റ്റേ. പണം തരാതേയും പരിപാടി നടത്താതേയും സംഘാടകരാണു വഞ്ചിച്ചതെന്നാണ് സണ്ണി ലിയോണിന്റെ വാദം.
◾സാമ്പത്തിക തട്ടിപ്പു കേസില്‍ പ്രതിയായ കോന്നി സ്റ്റേഷനിലെ സിപിഒയും കൊക്കാത്തോട് സ്വദേശിയുമായ ബിനു കുമാര്‍ പത്തനംതിട്ട എആര്‍ ക്യാംപില്‍ ജീവനൊടുക്കി. കേസില്‍ കുടുങ്ങിയ ബിനുകുമാര്‍ കുറേ നാളായി ജോലിക്ക് എത്തിയിരുന്നില്ല. ഒറ്റയ്ക്കു താമസിച്ചിരുന്ന സ്ത്രീയില്‍നിന്ന് 15 ലക്ഷം രൂപ തട്ടിയെടുത്തെന്നാണ് കേസ്.
◾തൃശൂര്‍ രാമനിലയം ഗസ്റ്റ് ഹൗസില്‍ താമസിച്ച പ്രമുഖരുടെ ചിത്രങ്ങളില്‍നിന്നു മുന്‍ മുഖ്യമന്ത്രിയും സിപിഐ നേതാവുമായ സി അച്യുത മേനോന്റെ ചിത്രം ഒഴിവാക്കി. സിപിഐ നേതാവ് ബിനോയ് വിശ്വം എംപി ടൂറിസം മന്ത്രി മുഹമ്മദ് റിയാസിനു പരാതി നല്‍കി. മുന്‍ പ്രധാനമന്ത്രി ഇന്ദിരാഗാന്ധി, മുന്‍ മുഖ്യമന്ത്രി ഇഎംഎസ്, മുന്‍ മുഖ്യമന്ത്രി കെ കരുണാകരന്‍ എന്നിവരുടെ ചിത്രങ്ങളും രാമനിലയത്തിലെ പഴയ കെട്ടിടത്തില്‍ രേഖപ്പെടുത്തിയിട്ടുണ്ട്.
◾നരവംശ ശാസ്ത്രമേഖലയില്‍ പ്രവര്‍ത്തിച്ചിരുന്ന ഡോ. പി.ആര്‍.ജി. മാത്തൂര്‍ അന്തരിച്ചു. 88 വയസായിരുന്നു. രാജ്യാന്തര തലത്തില്‍ നിരവധി പ്രബന്ധങ്ങള്‍ അവതരിപ്പിക്കുകയും ഗവേഷണങ്ങള്‍ക്കു നേതൃത്വം നല്‍കുകയും പുസ്തകങ്ങള്‍ രചിക്കുകയും ചെയ്തിട്ടുണ്ട്.
◾അട്ടപ്പാടിയില്‍ കൊല്ലപ്പെട്ട ആദിവാസി യുവാവ് മധുവിന്റെ അമ്മയെ ഭീഷണിപ്പെടുത്തിയ കേസിലെ ഒന്നാം പ്രതി മുക്കാലി സ്വദേശി അബ്ബാസ് വിചാരണക്കോടതിയില്‍ ഹാജരായി. പതിനാല് ദിവസത്തേക്ക് റിമാന്‍ഡ് ചെയ്ത് ഉത്തരവിട്ടയുടനേ അബ്ബാസ് കോടതിയില്‍ തളര്‍ന്നു വീണു. ഇയാളെ ആശുപ്രതിയിലേക്കു മാറ്റി. മുന്‍കൂര്‍ ജാമ്യാപേക്ഷ സുപ്രീംകോടതി തള്ളിയിരുന്നു.
◾ആണ്‍കുട്ടികള്‍ അടക്കം അഞ്ചു വിദ്യാര്‍ത്ഥികളെ പീഡിപ്പിച്ച അധ്യാപകന്‍ അറസ്റ്റില്‍. കോഴിക്കോട് അത്തോളി കോടശ്ശേരി സ്വദേശി അബ്ദുള്‍ നാസറിനെയാണ് ഏലത്തൂര്‍ പൊലീസ് അറസ്റ്റു ചെയ്തത്. സ്‌കൂളില്‍ നടന്ന കൗണ്‍സിലിംഗിനിടെയാണ് പീഡനത്തിനിരയായ വിവരം കുട്ടികള്‍ വെളിപെടുത്തിയത്.
◾ഫുട്ബോള്‍ ലോകകപ്പുമായി ബന്ധപ്പെട്ട് ചാനല്‍ ലേഖകന്‍ മെസിയുടെ പേര് തെറ്റായി ഉച്ചരിച്ചതിനാലാണു താനും മേഴ്സിയെന്നു തെറ്റായി ഉച്ചരിച്ചതെന്ന് സിപിഎം നേതാവ് ഇ.പി. ജയരാജന്‍. മാധ്യമരംഗത്ത് ഇപ്പോള്‍ ബ്ലാക് മെയില്‍ പൊളിറ്റിക്സാണ് നടക്കുന്നതെന്ന് ജയരാജന്‍ പറഞ്ഞു.
◾കെപിസിസി പ്രസിഡന്റ് കെ. സുധാകരന്റെ ആര്‍എസ്എസ് അനുകൂല പ്രസ്താവനയില്‍ അതൃപ്തി അറിയിച്ച മുസ്ലിം ലീഗ് നേതാക്കള്‍ കെപിസിസി നേതാക്കളുമായി സംസാരിച്ചു. നാക്കുപിഴ സംഭവിച്ചതാണെന്ന് സുധാകരന്‍ അറിയിച്ചിട്ടുണ്ടെന്നും ഇത്തരം പിഴവുകള്‍ ഉണ്ടാകില്ലെന്നും കോണ്‍ഗ്രസ് നേതൃത്വം അറിയിച്ചെന്നും മുസ്ലിം ലീഗ് സംസ്ഥാന സെക്രട്ടറി പിഎംഎ സലാം.
◾വൈസ് ചാന്‍സലര്‍മാരെ നിയമിക്കാനുള്ള അധികാരം ഗവര്‍ണര്‍ കവര്‍ന്നെടുക്കാന്‍ ശ്രമിക്കുകയാണെന്ന് സിപിഎം സംസ്ഥാന സെക്രട്ടറി എംവി ഗോവിന്ദന്‍. കേരള പ്രവാസി സംഘം തിരുവനന്തപുരം രാജ്ഭവനു മുന്നിലേക്കു നടത്തിയ മാര്‍ച്ച് ഉദ്ഘാടനം ചെയ്യുകയായിരുന്നു അദ്ദേഹം.
◾ഇന്‍സ്റ്റഗ്രാമിലൂടെ പരിചയപ്പെട്ട പ്രായപൂര്‍ത്തിയാകാത്ത പെണ്‍കുട്ടികളെ പീഡിപ്പിച്ച പതിനെട്ടുകാരനെ കൊല്ലം കടയ്ക്കല്‍ പൊലീസ് പിടികൂടി. ഏഴാം ക്ലാസിലും എട്ടിലും പഠിക്കുന്ന പെണ്‍കുട്ടികളെ പീഡിപ്പിച്ച കടയ്ക്കല്‍ ഇടത്തറ തോട്ടത്തുവിള വീട്ടില്‍ നീരജ് ആണ് അറസ്റ്റിലായത്.
◾രണ്ടു മാസമായി രണ്ടു ലോറികള്‍ താമരശേരി ചുരം കയറാന്‍ അനുമതിക്കായി കാത്തുകിടക്കുന്നു. കര്‍ണാടകത്തിലേക്കു പോകാനാണു ട്രെയിലര്‍ ലോറികള്‍ റോഡരികില്‍ രണ്ടു മാസമായി കിടക്കുന്നത്. സ്വകാര്യ കമ്പനിയുടെ കര്‍ണാടകയിലെ പ്ലാന്റിലേക്കുള്ള കൂറ്റന്‍ യന്ത്രങ്ങള്‍ കൊണ്ടുപോകുന്ന ട്രെയിലര്‍ ലോറി ചുരം കയറുമ്പോള്‍ ഗതാഗത തടസമുണ്ടാകുമെന്നു ചൂണ്ടിക്കാട്ടിയാണ് കോഴിക്കോട് ജില്ലാ കളക്ടര്‍ ലോറികളെ താത്കാലികമായി തടഞ്ഞിട്ടത്.
◾മുല്ലപെരിയാര്‍ ബേബി ഡാം ബലപ്പെടുത്താന്‍ മരം മുറിക്കാന്‍ അനുമതി തേടി തമിഴ്നാട് സര്‍ക്കാര്‍ സുപ്രീം കോടതിയില്‍. 15 മരങ്ങള്‍ മുറിക്കാനാണ് അനുമതി തേടിയത്. കഴിഞ്ഞ വര്‍ഷം നവംബറില്‍ നല്‍കിയ അനുമതി പുനഃസ്ഥാപിക്കാന്‍ കേരളത്തോട് നിര്‍ദേശിക്കണമെന്നാണ് ഹര്‍ജിയിലെ ആവശ്യം.
◾യുവതിയെ കഴുത്തറത്തു കൊന്ന് വീഡിയോ ദൃശ്യങ്ങള്‍ സമൂഹമാധ്യമത്തില്‍ പങ്കുവച്ച കൊലയാളിയെ പോലീസ് തെരയുന്നു. മധ്യപ്രദേശിലെ ജബല്‍പൂരിലെ മേഖ്‌ല റിസോര്‍ട്ടില്‍ ശില്‍പ ജാരിയ എന്ന യുവതിയാണ് കൊല്ലപ്പെട്ടത്. പ്രതിയായ അഭിജിത് പതിദാറിനെ കണ്ടെത്താന്‍ പൊലീസ് വലവിരിച്ചിരിക്കുകയാണ്. തല മുറിച്ചു മാറ്റിയ മൃതദേഹത്തെ പുതപ്പുയര്‍ത്തി കാണിച്ചുകൊണ്ട് ‘വിശ്വാസ വഞ്ചനയക്കുള്ള കൂലി’യെന്ന് ആക്രോശിക്കുന്ന വീഡിയോയാണു പ്രചരിച്ചത്. ബിസിനസ് പങ്കാളിയുമായി ശില്‍പക്ക് ബന്ധമുണ്ടെന്ന് ആരോപിച്ചാണ് പട്നയിലെ വ്യാപാരിയായ ഇയാള്‍ അരുംകൊല ചെയ്തത്.
◾ഇന്ത്യയില്‍ നിന്നുള്ള മൂവായിരം യുവ പ്രഫഷനലുകള്‍ക്ക് ഓരോ വര്‍ഷവും യുകെയിലേക്കു വീസ അനുവദിക്കാന്‍ ധാരണ. . ഇന്തൊനീഷ്യയിലെ ബാലിയില്‍ ജി 20 സമ്മേളനത്തിനിടെ ബ്രിട്ടിഷ് പ്രധാനമന്ത്രി ഋഷി സുനക് പ്രധാനമന്ത്രി നരേന്ദ്ര മോദിയുമായി കൂടിക്കാഴ്ച നടത്തിയതിനു പിറകേയാണ് തീരുമാനം.
◾സ്ത്രീപക്ഷ വികസനത്തിന് പ്രാധാന്യം നല്‍കണമെന്നു പ്രധാനമന്ത്രി നരേന്ദ്ര മോദി. ജി 20 ഉച്ചകോടിയില്‍ അംഗരാജ്യ തലവന്മാരെ അഭിസംബോധന ചെയ്തു സംസാരിക്കുകയായിരുന്നു അദ്ദേഹം. ജി 20 കൂട്ടായ്മയുടെ അധ്യക്ഷ പദം ഇന്തോനേഷ്യയില്‍നിന്ന് ഇന്ത്യ ഏറ്റെടുത്തു. അടുത്ത ജി 20 ഉച്ചകോടി ഇന്ത്യയില്‍ നടക്കും. ഇത് യുദ്ധത്തിന്റെ നൂറ്റാണ്ടല്ലെന്ന പ്രധാനമന്ത്രി നരേന്ദ്ര മോദിയുടെ വാക്കുകള്‍ ഉള്‍പ്പെടുത്തിയാണു ജി 20 പ്രഖ്യാപനം തയാറാക്കിയത്.
◾യുഎസ് പ്രസിഡന്റു സ്ഥാനത്തേക്ക് മല്‍സരിക്കുമെന്ന് മുന്‍ പ്രസിഡന്റ് ഡോണള്‍ഡ് ട്രംപ്. ഫ്ളോറിഡയിലെ മാരാലാഗോ എസ്റ്റേറ്റിലാണ് പ്രഖ്യാപനം. അമേരിക്കയുടെ മടങ്ങിവരവ് തുടങ്ങിയെന്ന് ട്രംപ് അവകാശപ്പെട്ടു. എന്നാല്‍ ട്രംപിന് റിപ്പബ്ലിക്കന്‍ പാര്‍ട്ടിയുടെ അംഗീകാരം ലഭിച്ചിട്ടില്ല.
◾പോളണ്ട് അതിര്‍ത്തി ഗ്രാമത്തില്‍ മിസൈല്‍ സ്ഫോടനം. റഷ്യന്‍ മിസൈലാണെന്നാണ് ആദ്യം പ്രചരിച്ചത്. എന്നാല്‍ റഷ്യന്‍ മിസൈലിനെ പ്രതിരോധിക്കാന്‍ യുക്രെയിന്‍ വിട്ട പ്രതിരോധ മിസൈലാണെന്നും റിപ്പോര്‍ട്ടുണ്ട്. വിഷയം ബാലിയില്‍ ജി 20 ഉച്ചകോടിക്കിടെ ലോക രാഷ്ട്രത്തലവന്മാര്‍ക്കിടയില്‍ ചര്‍ച്ചയായി.
◾നാസയുടെ ആര്‍ട്ടിമിസ് 1 വിജയകരമായി വിക്ഷേപിച്ചു. ഒറൈയോണ്‍ പേടകത്തെ എസ്എല്‍എസ് റോക്കറ്റ് ആണ് വിജയകരമായി ഭ്രമണപഥത്തില്‍ എത്തിച്ചത്.
◾സംസ്ഥാനത്ത് സ്വര്‍ണവില ഉയര്‍ന്നു. ഇന്നലെ മൂന്ന് തവണയാണ് സ്വര്‍ണവില പരിഷ്‌കരിച്ചത്. രാവിലെ 280 രൂപ ഉയര്‍ന്നെങ്കിലും മണിക്കൂറുകള്‍ക്ക് ശേഷം രണ്ട് തവണയായി 600 രൂപ ഇടിഞ്ഞു. ഇന്ന് രാവിലെ സ്വര്‍ണവില 160 രൂപ ഉയര്‍ന്നിരിക്കുകയാണ്. ഒരു പവന്‍ സ്വര്‍ണത്തിന്റെ ഇന്നത്തെ വിപണി നിരക്ക് 38400 രൂപയാണ്. ഒരു ഗ്രാം 22 കാരറ്റ് സ്വര്‍ണത്തിന്റെ വില ഇന്ന് 20 രൂപ ഉയര്‍ന്നു. വിപണിയില്‍ നിലവിലെ വില 4800 രൂപയാണ്. ഒരു ഗ്രാം 18 കാരറ്റ് സ്വര്‍ണത്തിന്റെ വില രാവിലെ 15 രൂപ വര്‍ദ്ധിച്ചു. ഒരു ഗ്രാം 18 കാരറ്റ് സ്വര്‍ണത്തിന്റെ വിപണിയിലെ വില 3985 രൂപയാണ്. സംസ്ഥാനത്ത് വെള്ളിയുടെ വിലയില്‍ മാറ്റമില്ല.
◾മണപ്പുറം ഫിനാന്‍സ് ലിമിറ്റഡ് 2022 സെപ്റ്റംബര്‍ 30ന് അവസാനിച്ച രണ്ടാം പാദത്തില്‍ 409.48 കോടി രൂപയുടെ സംയോജിത അറ്റാദായം നേടി. മുന്‍ വര്‍ഷത്തെ 369.88 കോടി രൂപയെ അപേക്ഷിച്ച് 10.70 ശതമാനവും ആദ്യ പാദത്തെ അപേക്ഷിച്ച് 45.25 ശതമാനവും വര്‍ദ്ധനയാണ് രേഖപ്പെടുത്തിയത്. കമ്പനി കൈകാര്യം ചെയ്യുന്ന സംയോജിത ആസ്തി 7.89 ശതമാനം വര്‍ധിച്ച് 30,664.96 കോടി രൂപയിലെത്തി. മുന്‍ വര്‍ഷം ഇത് 28,421.63 കോടി രൂപയായിരുന്നു. സബ്‌സിഡിയറികളെ ഒഴിവാക്കിയുള്ള അറ്റാദായം 348.71 കോടി രൂപയാണ്. സംയോജിത പ്രവര്‍ത്തന ലാഭം മുന്‍ വര്‍ഷം ഇതേ പാദത്തിലെ 1,531.92 കോടി രൂപയില്‍ നിന്ന് 1,696.26 കോടി രൂപയായും വര്‍ദ്ധിച്ചു.
◾ദേശീയ അവാര്‍ഡ് ജേതാവ് നഞ്ചിയമ്മ ‘സിഗ്നേച്ചര്‍’ എന്ന ചിത്രത്തിനുവേണ്ടി പാടിയ ‘അട്ടപ്പാടി സോംഗ്’ പുറത്തെത്തി. ദിലീപ് ആണ് ഗാനത്തിന്റെ പ്രകാശനം നിര്‍വ്വഹിച്ചത്. ഊര് മൂപ്പന്‍ തങ്കരാജ് മാഷ് ആണ് ഈ ഗാനത്തിന്റെ രചനയും സംഗീത സംവിധാനവും നിര്‍വ്വഹിച്ചിട്ടുള്ളത്. കാര്‍ത്തിക് രാമകൃഷ്ണന്‍, ടിനി ടോം, ആല്‍ഫി പഞ്ഞിക്കാരന്‍ എന്നിവരെ പ്രധാന കഥാപാത്രങ്ങളാക്കി മനോജ് പാലോടന്‍ സംവിധാനം ചെയ്യുന്ന സിഗ്നേച്ചര്‍ നവംബര്‍ 18 ന് തിയറ്ററുകളിലേക്ക് എത്തും. പ്രണയവും പ്രതികാരവും അട്ടപ്പാടിയുടെ ജീവിതവുമായി ഇഴ ചേര്‍ത്ത് കഥ പറയുന്ന ഈ ചിത്രത്തില്‍ ബാലചന്ദ്രന്‍ ചുള്ളിക്കാട്, ചെമ്പില്‍ അശോകന്‍, ഷാജു ശ്രീധര്‍, നിഖില്‍, സുനില്‍, അഖില എന്നിവര്‍ക്കൊപ്പം മുപ്പതോളം ഗോത്രവര്‍ഗ്ഗക്കാരും അഭിനയിക്കുന്നുണ്ട്. സിഗ്നേച്ചറിന്റെ കഥ, തിരക്കഥ, സംഭാഷണം ഫാദര്‍ ബാബു തട്ടില്‍ സി എം ഐ ആണ് എഴുതിയിരിക്കുന്നത്.
◾രതീഷ് ബാലകൃഷ്ണന്‍ പൊതുവാള്‍ തിരക്കഥയൊരുക്കുന്ന ചിത്രമാണ് മദനോത്സവം. രതീഷിന്റെ ചീഫ് അസോസിയേറ്റ് ആയിരുന്ന സുധീഷ് ഗോപിനാഥിന്റെ സംവിധാന അരങ്ങേറ്റമാണ് ഈ ചിത്രം. ഒരു പ്രധാന കഥാപാത്രത്തെ അവതരിപ്പിക്കുന്ന ബാബു ആന്റണി ചിത്രത്തില്‍ ജോയിന്‍ ചെയ്തു. ബാബു ആന്റണിക്കൊപ്പം സുരാജ് വെഞ്ഞാറമൂട്, രാജേഷ് മാധവന്‍, സുധി കോപ്പ, പി പി കുഞ്ഞികൃഷ്ണന്‍, ഭാമ അരുണ്‍ എന്നിവരാണ് ചിത്രത്തില്‍ പ്രധാന കഥാപാത്രങ്ങളെ അവതരിപ്പിക്കുന്നത്. ഇ സന്തോഷ് കുമാറിന്റേതാണ് ചിത്രത്തിന്റെ കഥ. കാഞ്ഞങ്ങാട് ആണ് സിനിമയുടെ ചിത്രീകരണം പുരോഗമിക്കുന്നത്. അജിത് വിനായക ഫിലിംസ് ആണ് ചിത്രത്തിന്റെ നിര്‍മ്മാണം. വളരെ രസകരമായ സോങ് ടീസറിലൂടെയായിരുന്നു ചിത്രത്തിന്റെ പ്രഖ്യാപനം.
◾ജാപ്പനീസ് വാഹന ബ്രാന്‍ഡായ കാവസാക്കി മോട്ടോഴ്‌സ് ഇന്ത്യ 2023 നിഞ്ച 650 പുറത്തിറക്കി. 7.12 ലക്ഷം രൂപ എക്‌സ് ഷോറൂം വിലയിലാണ് ബൈക്ക് എത്തുന്നത്. 2023 കവാസാക്കി നിന്‍ജ 650 സിംഗിള്‍ ലൈം ഗ്രീന്‍ ഷേഡില്‍ എത്തുന്നു. പുതിയ ഫീച്ചറുകളുടെ ഒരു നീണ്ട നിരയാണ് ബൈക്കിലെ ഏറ്റവും വലിയ അപ്‌ഡേറ്റ്. പുതുക്കിയ നിഞ്ച 650, ഡ്യുവല്‍-ചാനല്‍ എബിഎസിന് പുറമേ, സ്റ്റാന്‍ഡേര്‍ഡായി കവാസാക്കി ട്രാക്ഷന്‍ കണ്‍ട്രോള്‍ സഹിതമാണ് എത്തുന്നത്. അതുകൊണ്ടുതന്നെ നിലവിലെ പതിപ്പിനേക്കാള്‍ വിലകളില്‍ 17,000 രൂപയോളം വര്‍ധനയുണ്ടായി. 2023 നിഞ്ജ 650 -ന് 649 സിസി പാരലല്‍-ട്വിന്‍ എഞ്ചിന്‍ ലഭിക്കുന്നു. ഈ എഞ്ചിന്‍ 8,000 ആര്‍പിഎമ്മില്‍ 67 ബിഎച്ച്പിയും 6,700 ആര്‍പിഎമ്മില്‍ 64 എന്‍എം പീക്ക് ടോര്‍ക്കും വികസിപ്പിക്കുന്നു. ആറ് സ്പീഡ് ഗിയര്‍ബോക്സാണ് ട്രാന്‍സ്മിഷന്‍.
◾‘വേവുകാലം’ എന്ന ഈ കാവ്യസമാഹാരത്തില്‍ നാല്പത്തൊന്ന് കവിതകളാണുള്ളത്. വേവിന്റെ കാലമാണിത്. ഈ കാലത്തെ അതിന്റെ സകല രൂക്ഷതയോടെയും അടയാളപ്പെടുത്തുന്നു കെ.ടി രാജീവ്. എന്നാല്‍ വേവിന്റെ കവിതകള്‍ മാത്രമല്ല ഇത്. സൗന്ദര്യാനുഭവത്തിന്റെ കൂടി കവിതകളാണ്. കവിത ഏതെങ്കിലും ഒരു തലത്തില്‍ ഒതുക്കേണ്ടതല്ലല്ലോ. സ്ഥൂലത്തില്‍നിന്നു സൂക്ഷ്മത്തിലേക്കും സൂക്ഷ്മത്തില്‍നിന്നും സ്ഥൂലത്തിലേക്കും മാറിമാറി സഞ്ചരിക്കാനും മഹാവൃക്ഷത്തെ വിത്തിലേക്ക് എന്നവിധം ബൃഹത്വത്തെ സംക്ഷേപത്വത്തിലേക്കു കൈയടക്കത്തോടെ ഒതുക്കിയെടുക്കാനും കഴിയുന്നു രാജീവിന്. ചിന്ത പബ്ളിക്കേഷന്‍സ്. വില 133 രൂപ.
◾ഉറക്കക്കുറവ്, കൂര്‍ക്കംവലി എന്നിവ മെറ്റബോളിക്-അസോസിയേറ്റഡ് ഫാറ്റി ലിവര്‍ ഡിസീസ് ഉണ്ടാകാനുള്ള സാധ്യതയുമായി ബന്ധപ്പെട്ടിരിക്കുന്നതായി പഠനം. രാത്രിയില്‍ ഉറക്കം കുറവുള്ളവര്‍ക്ക് ഫാറ്റി ലിവര്‍ ഉണ്ടാകാനുള്ള സാധ്യത കൂടുതലാണെന്ന് പഠനം കണ്ടെത്തി. ഇന്റര്‍നാഷണല്‍ ജേണല്‍ ഓഫ് ഒബിസിറ്റിയില്‍ പഠനം പ്രസിദ്ധീകരിച്ചു. കരളില്‍ കൊഴുപ്പ് അടിഞ്ഞുകൂടുന്നതിനെ നോണ്‍-ആല്‍ക്കഹോളിക് ഫാറ്റി ലിവര്‍ ഡിസീസ് എന്ന് പറയുന്നു. അതിന്റെ കൂടുതല്‍ ഗുരുതരമായ രൂപമായ നോണ്‍-ആല്‍ക്കഹോളിക് സ്റ്റീറ്റോഹെപ്പറ്റൈറ്റിസ് എന്നിവ യുഎസിലും ലോകമെമ്പാടുമുള്ള വിപുലമായ കരള്‍ രോഗങ്ങളുടെ വര്‍ദ്ധിച്ചുവരുന്ന അനുപാതത്തിന് കാരണമാകുന്നു. മിക്ക കേസുകളിലും കരള്‍ കൊഴുപ്പ് അടിഞ്ഞുകൂടുന്നത് അമിതവണ്ണവും പ്രമേഹവുമായി ബന്ധപ്പെട്ടിരിക്കുന്നു. ഫാറ്റി ലിവര്‍ രോഗം ലിവര്‍ ഫൈബ്രോസിസ്, സിറോസിസ്, ലിവര്‍ ക്യാന്‍സര്‍ എന്നിവയ്ക്ക് വരെ കാരണമാകും. ഉറക്കത്തിലെ അസ്വസ്ഥതകള്‍ ഉപാപചയ അവസ്ഥകളുമായി ബന്ധപ്പെട്ടതാണെന്ന് മുന്‍ ഗവേഷണങ്ങള്‍ സൂചിപ്പിക്കുന്നു. രാത്രി 11 മണിക്ക് മുമ്പ് ഉറങ്ങേണ്ടത് മൊത്തത്തിലുള്ള ആരോഗ്യത്തിന് പ്രധാനമാണെന്ന് ഗവേഷകര്‍ പറഞ്ഞു. കുറഞ്ഞ ഉറക്ക നിലവാരമുള്ള ആളുകള്‍ക്ക് മെറ്റബോളിക്-അസോസിയേറ്റഡ് ഫാറ്റി ലിവര്‍ ഡിസീസ് അപകടസാധ്യത കൂടുതലാണ്. അതേസമയം നല്ലതോ മിതമായതോ ആയ ഉറക്ക നിലവാരമുള്ളവര്‍ക്ക് ഈ അവസ്ഥ ഉണ്ടാകാനുള്ള സാധ്യത കുറവാണെന്നും ഗവേഷകര്‍ പറഞ്ഞു.
*ഇന്നത്തെ വിനിമയ നിരക്ക്*
ഡോളര്‍ – 81.27, പൗണ്ട് – 96.57, യൂറോ – 84.41, സ്വിസ് ഫ്രാങ്ക് – 86.19, ഓസ്‌ട്രേലിയന്‍ ഡോളര്‍ – 55.02, ബഹറിന്‍ ദിനാര്‍ – 215.77, കുവൈത്ത് ദിനാര്‍ -264.23, ഒമാനി റിയാല്‍ – 211.24, സൗദി റിയാല്‍ – 21.63, യു.എ.ഇ ദിര്‍ഹം – 22.13, ഖത്തര്‍ റിയാല്‍ – 22.33, കനേഡിയന്‍ ഡോളര്‍ – 61.27.