‘കുര്ബാനി’ല്, ഹരിത സാവിത്രി അന്വേഷിക്കുന്നത് മനുഷ്യാന്തസ്സിന്റെ തകര്ച്ചയെക്കുറിച്ചാണ്. ആ തകര്ച്ച ഒരു വിലാപത്തിലൂടെയോ നെടുവീര്പ്പിലൂടെയോ വായുവില് അലിയിച്ചുകളയാന് ഹരിത ഒരുക്കവുമല്ല. താനേ തകര്ന്നുപോകുന്ന ഒന്നല്ല ദെമീറിന്റെയും ഇസെലിന്റെയും അന്തസ്സ്. മറിച്ച് അത് തകര്ക്കപ്പെടുന്നതാണ്. ഭരണകൂടമാണത് ചെയ്യുന്നത്. അതിന്റെ മോഡസ് ഓപ്പറാന്ഡി ഒരുക്കുന്നതാകട്ടെ ഉള്ഭരണകൂടവും. പോലീസും രഹസ്യാന്വേഷണസംഘങ്ങളും ഒരു സമഗ്രാധിപത്യഭരണകൂടത്തിനു കീഴില് വെറും ക്വട്ടേഷന് സംഘങ്ങള് കൂടിയാണ്. അവരുടെ സര്ഗ്ഗാത്മകത ഹിംസയുടെ അന്തമില്ലാത്ത ശ്രേണികള് നിര്മ്മിച്ചുകൊണ്ടിരിക്കുന്നു. അവര് മനുഷ്യരെ തകര്ക്കുന്നു. ശാരീരികമായി മാത്രമല്ല, മനുഷ്യാന്തസ്സിനെ തകര്ത്ത് അവരെ നിതാന്തമായ അപമാനത്തിലേക്ക് തള്ളിവിടുന്നു. ഹരിത സാവിത്രിയുടെ പുതിയ നോവല്. ‘കുര്ബാന്’. മാതൃഭൂമി. വില 323 രൂപ.
