സര്ക്കാര് ജീവനക്കാരെ നിരന്തരം ദ്രോഹിക്കുന്ന പിണറായി സര്ക്കാരിന്റെ നടപടികളുടെ തുടര്ച്ച മാത്രമാണ് ജീവാനന്ദം പദ്ധതിയെന്ന് കെപിസിസി പ്രസിഡന്റ് കെ സുധാകരൻ. സംസ്ഥാനത്തിന്റെ മോശം സാമ്പത്തികസ്ഥിതി മറികടക്കാന് സര്ക്കാര് ജീവനക്കാരെ കൂടുതല് ദുരിതത്തിലാക്കുന്ന പദ്ധതികള് അടിച്ചേല്പ്പിക്കുന്നത് ജനാധിപത്യ ഭരണത്തിന് ഭൂഷണമല്ലെന്നും, പദ്ധതിയുമായി ബന്ധപ്പെട്ട് ജീവനക്കാര്ക്ക് നിരവധി ആശങ്കകളുണ്ടെന്നും സുധാകരൻ പറഞ്ഞു. പദ്ധതി നിര്ബന്ധിതമല്ലെന്ന് ധനമന്ത്രി വിശദീകരിക്കുന്നുണ്ടെങ്കിലും കാര്യമായ കൂടിയാലോചന ഇല്ലാതെയാണ് സര്ക്കാര് ജീവാനന്ദം പദ്ധതിക്ക് രൂപം നല്കിയത്. ജീവനക്കാരുടെ പ്രതികരണം പ്രതികൂലമായപ്പോള് ഇത് നിര്ബന്ധിത പദ്ധതിയല്ല എന്ന വിശദീകരണം നല്കുകയാണെന്നും സുധാകരൻ കൂട്ടിച്ചേർത്തു.
