വാട്‌സാപ്പില്‍ ക്യു ആര്‍ കോഡ് വഴി ചാറ്റ് ബാക്കപ്പ് നടത്താനുള്ള ഓപ്ഷന്‍ എത്തി. ആന്‍ഡ്രോയിഡ് ഫോണുകള്‍ക്കായുള്ള ഗൂഗിള്‍ ക്ലൗഡില്‍ നിന്നോ ഐ ഫോണുകളെങ്കില്‍ ഐക്ലൗഡില്‍ നിന്നോ ചാറ്റ് ബാക്കപ്പ് ഡൗണ്‍ലോഡ് ചെയ്യുന്ന രീതിയില്‍നിന്ന് വ്യത്യസ്തമായി, നിങ്ങളുടെ പഴയ ഫോണില്‍ സംഭരിച്ചിരിക്കുന്ന ചാറ്റ് ബാക്കപ്പ് പുതിയ ഫോണിലേക്ക് നേരിട്ട് വൈഫൈ നെറ്റ്വര്‍ക്ക് വഴി അയയ്ക്കുന്നതാണ് പുതിയ രീതി. ചുരുക്കത്തില്‍, ഡിവൈസ് ലിങ്ക് ചെയ്യുന്നത് പോലെ സിംപിള്‍ ആയിട്ട് ഇപ്പോള്‍ ചാറ്റുകളും ഇത്തരത്തില്‍ മാറ്റാം. അതായത് ചാറ്റുകള്‍ ഇല്ലാത്ത ഫോണില്‍ നിന്ന് ചാറ്റുകള്‍ ഉള്ള ഫോണിലെ ക്യൂആര്‍ കോഡ് സ്‌കാന്‍ ചെയ്താല്‍ വാട്‌സാപ് മീഡിയ ഉള്‍പ്പെടെ ഇനി എളുപ്പം ചാറ്റുകള്‍ കൈമാറാം. ഇത്തരത്തില്‍ വീഡിയോയും ഡോക്യുമെന്റുകളും അടങ്ങുന്ന വലിയ മീഡിയ ഫയലുകളും എളുപ്പത്തില്‍ കൈമാറാം എന്നത് ഈ ഫീച്ചറിന്റെ പ്രത്യേകതയാണ്. ഇതിനായി ആദ്യം തന്നെ രണ്ടു ഫോണുകളും ഒരേ വൈഫൈയുമായി കണക്റ്റ് ചെയ്യുക. ചാറ്റ് ഹിസ്റ്ററി കൈമാറ്റം ചെയ്യപ്പെടേണ്ട ഫോണിലെ വാട്‌സ്ആപ്പ് തുറന്ന ശേഷം പുതിയ ഫോണിലെ സെറ്റിംഗ്സില്‍ നിന്ന് ചാറ്റ്, ചാറ്റ് ഹിസ്റ്ററി ട്രാന്‍സ്ഫര്‍ എന്നിവ ക്ലിക്ക് ചെയ്യുക. തുടര്‍ന്ന് പഴയ ഫോണില്‍ ക്യൂആര്‍ കോഡ് സ്‌കാന്‍ ചെയ്യുന്നതോടെ ചാറ്റ് ഹിസ്റ്ററി ട്രാന്‍സ്ഫര്‍ ആരംഭിക്കും. പെട്ടെന്ന് പൂര്‍ത്തിയാകുകയും ചെയ്യും.