വാട്സാപ്പിലെ ഓഡിയോ, വീഡിയോ കോളുകളില്‍ വമ്പന്‍ മാറ്റവുമായി മെറ്റയുടെ ഉടമസ്ഥതിയലുള്ള കമ്പനി. ഡെസ്‌ക്ടോപ്പ്, മൊബൈല്‍ വേര്‍ഷനുകളിലും പുതിയ ഫീച്ചര്‍ ലഭ്യമാകും. തിരഞ്ഞെടുക്കപ്പെടുന്ന നമ്പറുകളിലേക്ക് മാത്രം ഗ്രൂപ്പ് കോളുകള്‍ എന്നതാണ് ഇതിലെ ഒന്നാമത്തെ മാറ്റം. ഒരു ഗ്രൂപ്പില്‍ നിന്ന് വോയിസ് അല്ലെങ്കില്‍ വീഡിയോ കോളിന് ശ്രമിച്ചാല്‍ അത് ആ ഗ്രൂപ്പിലെ എല്ലാ അംഗങ്ങളെയും ഉള്‍പ്പെടുത്തിക്കൊണ്ടുള്ളതാകും. പുതിയ ഫീച്ചര്‍ അപ്‌ഡേറ്റ് ചെയ്യുന്നതോടെ ഗ്രൂപ്പിലെ തിരഞ്ഞെടുത്ത അംഗങ്ങളെ മാത്രം ഉള്‍പ്പെടുത്തി കോളുകള്‍ ചെയ്യാനാകും. ഇന്‍സ്റ്റാഗ്രാമിന് സമാനമായി വീഡിയോ കോളില്‍ ഇഫക്ടുകള്‍ കൂട്ടുന്നതാണ് രണ്ടാമത്തെ മാറ്റം. പുതിയ പത്ത് ഇഫക്ടുകളാണ് വാട്‌സ്ആപ്പ് വീഡിയോ കോളില്‍ പുതുതായി കൊണ്ടുവരുന്നത്. ഡെസ്‌ക്ടോപ്പില്‍ വാട്‌സ്ആപ്പിന്റെ ഉപയോഗം കൂടുതല്‍ സൗകര്യപ്രദവും എളുപ്പവുമാക്കുന്നതിനായാണ് മറ്റൊരു പുതിയ ഫീച്ചര്‍. ഇതിലൂടെ ഡെസ്‌ക്ടോപ്പില്‍ നിന്ന് എളുപ്പത്തില്‍ കോളുകള്‍ ആരംഭിക്കാനും കോള്‍ ലിങ്ക് ക്രിയേറ്റ് ചെയ്യാനും ഉള്‍പ്പടെ സാധിക്കും. വാട്സാപ്പ് വീഡിയോ കോളുകളുടെ നിലവാരം വര്‍ദ്ധിപ്പിക്കുന്നതാണ് മറ്റൊരു മാറ്റം. ഡെസ്‌ക്ടോപ്പില്‍ നിന്ന് ആയാലും മൊബൈലില്‍ നിന്ന് ആയാലും കൂടുതല്‍ വ്യക്തതയും മികവുമുള്ള അനുഭവം ഉപയോക്താക്കള്‍ക്ക് ഇത് സമ്മാനിക്കും.